Adani Group: అదానీ సిమెంట్ బిజినెస్‌కు భారీ బూమ్‌ - ఏకంగా రూ.10,422 కోట్ల డీల్
Ambuja Cement Update: పెన్నా సిమెంట్ కొనుగోలు వల్ల దక్షిణ భారత్‌లో అదానీ సిమెంట్ వ్యాపారం మరింత బలోపేతం అవుతుంది. గ్రూప్‌లోని సిమెంట్ కంపెనీల సంఖ్య 4కు చేరుతుంది.
Ambuja Cement To Buy Penna Cement: అదానీ గ్రూప్‌ చైర్మన్ గౌతమ్ అదానీ, దేశంలో తన సిమెంట్ వ్యాపారాన్ని మరింత దూకుడుగా పెంచుతున్నారు. హైదరాబాద్‌ కేంద్రంగా పని చేస్తున్న పెన్నా సిమెంట్ ఇండస్ట్రీస్ లిమిటెడ్‌ను అదానీ కొనబోతున్నారు. అదానీ గ్రూప్‌లోని అంబుజా సిమెంట్స్ ఈ డీల్ కోసం రంగంలోకి దిగింది. పెన్నా సిమెంట్‌లో 100 శాతం వాటాను రూ. 10.422 కోట్లకు కొనుగోలు చేయబోతున్నట్లు ప్రకటించింది.
డీల్ క్లోజ్‌ అయిన తర్వాత, అంబుజా సిమెంట్స్ వార్షిక సిమెంట్ ఉత్పత్తి సామర్థ్యం ఏడాదికి మరో 14 మిలియన్ టన్నులు పెరుగుతుంది, మొత్తం సామర్థ్యం ఏడాదికి 89 మిలియన్ టన్నులకు చేరుతుంది.
పెన్నా సిమెంట్‌తో డీల్ గురించి స్టాక్ ఎక్స్ఛేంజీలకు సమర్పించిన రెగ్యులేటరీ ఫైలింగ్‌లో అంబుజా సిమెంట్స్ సమాచారం ఇచ్చింది. ఈ నెల 13న జరిగిన కంపెనీ డైరెక్టర్ల బోర్డ్‌ సమావేశం నిర్వహించామని, పెన్నా సిమెంట్ ఇండస్ట్రీస్ లిమిటెడ్‌లో (PCIL) 100 శాతం వాటా కొనుగోలు చేసేందుకు బోర్డ్‌ అంగీకరించిందని రెగ్యులేటరీ ఫైలింగ్‌లో వెల్లడించింది.
పెన్నా సిమెంట్, ప్రస్తుతం, ప్రమోటర్ పి ప్రతాప్‌ రెడ్డి & అతని కుటుంబ సభ్యుల చేతుల్లో ఉంది. ప్రతాప్‌ రెడ్డి కుటుంబం నుంచి పెన్నా సిమెంట్‌లో వాటాలను అంబుజా సిమెంట్స్ కొనుగోలు చేస్తుంది. ఈ డీల్‌కు అవసమైన రూ. 10.422 కోట్లను సొంత నిధుల నుంచి అంబుజా సిమెంట్స్ సమకూరుస్తుంది. అంటే, బాహ్య నిధుల సమీకరణ జోలికి వెళ్లదు.
పెరగనున్న అదానీ సిమెంట్ మార్కెట్ షేర్‌
"అంబుజా సిమెంట్స్ మరింత వేగంగా వృద్ధి చెందడంలో పెన్నా సిమెంట్ కొనుగోలు ఒక కీలక ఘట్టంగా నిలుస్తుంది. ఈ ఒప్పందం తర్వాత, దక్షిణ భారతదేశంలో అంబుజా సిమెంట్స్ ఉనికి మరింత బలోపేతం అవుతుంది. మొత్తం దేశంలో సిమెంట్ పరిశ్రమలో అగ్రగామిగా నిలుస్తుంది. దేశంలోని అన్ని మార్కెట్‌లో అంబుజా సిమెంట్స్ ఉనికి ఉంటుంది. భారతదేశవ్యాప్తంగా అంబుజా సిమెంట్ మార్కెట్ వాటా 2 శాతం పెరుగుతుంది, దక్షిణ భారతదేశంలో 8 శాతానికి పెరుగుతుంది. వ్యాపార విస్తరణ లక్ష్యానికి అనుగుణంగా పెన్నా సిమెంట్‌ను కొనుగోలు చేస్తున్నాం. ఈ డీల్ పూర్తి కావడానికి 3 నుంచి 4 నెలల సమయం పడుతుంది" - అంబుజా సిమెంట్స్ CEO అజయ్ కపూర్
పెన్నా సిమెంట్ కొనుగోలుతో చాలా లాభాలు
పెన్నా సిమెంట్ కొనుగోలు వల్ల అంబుజా సిమెంట్స్‌కు చాలా ప్రయోజనాలు ఉన్నాయి. కేవలం ఫ్యాక్టరీనే కాదు, పెన్నా సిమెంట్‌కు ఉన్న సున్నపు రాయి గనులు కూడా అంబుజా సిమెంట్స్ చేతిలోకి వెళ్తాయి. పెన్నా సిమెంట్‌కు దక్షిణాది రాష్ట్రాల్లో బలమైన ఉనికి ఉంది. ఇది అంబుజా సిమెంట్స్‌కు కలిసి వస్తుంది. పెన్నా సిమెంట్‌కు శ్రీలంకలో ఒక అనుబంధ సంస్థ ఉంది. ఇది కూడా అంబుజా పరమవుతుంది. ఫలితంగా, భారత్‌తో పాటు శ్రీలంకలోనూ మార్కెట్ వాటా పెంచుకునే ఛాన్స్‌ అంబుజా సిమెంట్స్‌కు (అదానీ గ్రూపునకు) లభిస్తుంది.
పెన్నా సిమెంట్‌కు రెండు తెలుగు రాష్ట్రాలతో పాటు రాజస్థాన్‌లో సిమెంట్ ఫ్లాంట్స్‌ ఉన్నాయి. ఏటా 14 మిలియన్ టన్నుల సిమెంట్ ఉత్పత్తి సామర్థ్యం దీని సొంతం. ఇంకా... కృష్ణపట్నంలో 2 మిలియన్ టన్నులు, జోధ్‌పూర్‌లో మరో 2 మిలియన్ టన్నుల సామర్థ్యంతో రెండు ఫ్లాంట్స్‌ నిర్మాణం జరుగుతోంది. మరో ఏడాదిలో వీటి నుంచి కూడా ఉత్పత్తి ప్రారంభం అవుతుంది.
ప్రస్తుతం, అదానీ గ్రూపు చేతిలో మూడు సిమెంట్ కంపెనీలు (ACC లిమిటెడ్, అంబుజా సిమెంట్స్, సంఘీ ఇండస్ట్రీస్) ఉన్నాయి. ఇకపై పెన్నా సిమెంట్ కూడా ఈ లిస్ట్‌కు యాడ్‌ అవుతుంది.
మరో ఆసక్తికర కథనం: తెలుగు రాష్ట్రాల్లో మారిన పెట్రోల్‌, డీజిల్‌ ధరలు - ఈ రోజు రేట్లు ఇవి
టాప్ హెడ్ లైన్స్
ట్రెండింగ్ వార్తలు
