టైర్లు ఎరుపు, తెలుపు, నీలం రంగుల్లో ఎందుకు తయారు చేయరు? నలుపు రంగు వెనుక ఉన్న అసలు కారణం ఇదే
వాహనాల టైర్లు ఎప్పుడూ నలుపు రంగులోనే ఎందుకు ఉంటాయో తెలుసా? కార్బన్ బ్లాక్ పాత్ర, టైర్ల మన్నిక, వేడి నియంత్రణ, యూవీ రక్షణ వెనుక ఉన్న శాస్త్రీయ కారణాలు తెలుసుకోండి.
Vehicle tyres black colour reason: ప్రపంచమంతా రంగులతో నిండి ఉంటుంది. మనం ఉపయోగించే దుస్తులు, మొబైల్ ఫోన్లు, కార్లు, బైక్లు, గృహోపకరణాలు ఇలా దాదాపు ప్రతి వస్తువు అనేక రంగుల్లో అందుబాటులో ఉంటుంది. అయితే వాహనాల టైర్ల విషయానికి వస్తే పరిస్థితి పూర్తిగా భిన్నంగా ఉంటుంది. కారు అయినా, బైక్ అయినా, బస్సు అయినా, ట్రక్ అయినా వాటి టైర్లు నలుపు రంగులోనే కనిపిస్తాయి.
టైర్లు తెలుపు, ఎరుపు లేదా నీలం రంగులో ఎందుకు ఉండవని ఎప్పుడైనా ఆలోచించారా? ఇది కేవలం అందం కోసం తీసుకున్న నిర్ణయం కాదు. దీని వెనుక బలమైన శాస్త్రీయ కారణాలు ఉన్నాయి. టైర్ల నలుపు రంగు వాటి పనితీరు, మన్నిక & భద్రతకు నేరుగా సంబంధం కలిగి ఉంటుంది.
తెలుపు రంగు రబ్బరు
సాధారణంగా, టైర్ల తయారీలో ఉపయోగించే సహజ రబ్బరు అసలు నలుపు రంగులో ఉండదు. సహజ రబ్బరు లేత గోధుమ లేదా పాల రంగులో కనిపిస్తుంది. ఈ రబ్బరును ఎలాంటి మార్పులు చేయకుండా నేరుగా వాహనాల టైర్ల తయారీలో ఉపయోగిస్తే అది ఎక్కువ కాలం మన్నదు. రోడ్డుపై ఉండే వేడి, రాపిడి & వాతావరణ ప్రభావాల కారణంగా రబ్బరు త్వరగా అరిగిపోతుంది. కొన్నిసార్లు పగుళ్లు కూడా వచ్చే అవకాశం ఉంటుంది.
నలుపు రంగు కారణం ఇదే...
ఈ సమస్యను అధిగమించడానికి టైర్ల తయారీ సంస్థలు రబ్బరు మిశ్రమంలో కార్బన్ బ్లాక్ అనే ప్రత్యేక పదార్థాన్ని కలుపుతాయి. ఈ కార్బన్ బ్లాక్ కారణంగానే టైర్లు నలుపు రంగులోకి మారుతాయి.
కార్బన్ బ్లాక్ అనేది కేవలం రంగును ఇచ్చే పదార్థం మాత్రమే కాదు. ఇది టైర్ల బలాన్ని గణనీయంగా పెంచే శక్తివంతమైన ఫిల్లింగ్ మెటీరియల్గా పనిచేస్తుంది. రబ్బరుతో కలిసి బలమైన బంధాన్ని ఏర్పరచి టైర్ల మన్నికను పెంచుతుంది. దీంతో టైర్లు ఎక్కువ కాలం అరిగిపోకుండా ఉపయోగించుకునే అవకాశం ఉంటుంది.
వాహనం రోడ్డుపై ప్రయాణిస్తున్నప్పుడు టైర్లు నిరంతరం రోడ్డుతో రాపిడి చెందుతాయి. ఈ రాపిడి కారణంగా భారీగా వేడి ఉత్పత్తి అవుతుంది. వేడి ఎక్కువైతే టైర్ల పనితీరు తగ్గడమే కాకుండా ప్రమాదాలు కూడా సంభవించే అవకాశం ఉంటుంది. ఇక్కడ కూడా కార్బన్ బ్లాక్ కీలక పాత్ర పోషిస్తుంది. ఇది వేడిని సమర్థవంతంగా గ్రహించి టైర్ మొత్తం ఉపరితలంపై సమానంగా పంపిణీ చేస్తుంది. ఫలితంగా ఒకే చోట అధిక ఉష్ణోగ్రత చేరకుండా నివారిస్తుంది.
అలాగే సూర్యుడి నుంచి వచ్చే అతినీలలోహిత కిరణాలు లేదా యూవీ రేడియేషన్ రబ్బరును దెబ్బతీసే అవకాశం ఉంటుంది. యూవీ కిరణాల ప్రభావంతో రబ్బరు క్రమంగా బలహీనపడి పగుళ్లు ఏర్పడవచ్చు. కార్బన్ బ్లాక్ ఈ కిరణాల ప్రభావాన్ని తగ్గించి టైర్లకు అదనపు రక్షణను అందిస్తుంది. అందుకే దీన్ని యూవీ స్టెబిలైజర్గా కూడా పరిగణిస్తారు.
ఇంకో ఆసక్తికర విషయం ఏమిటంటే, కార్బన్ బ్లాక్ కలిపిన టైర్లు స్వచ్ఛమైన రబ్బరుతో తయారైన టైర్లతో పోలిస్తే చాలా ఎక్కువ కాలం మన్నుతాయి. అందుకే ప్రపంచవ్యాప్తంగా అన్ని ప్రధాన టైర్ తయారీ సంస్థలు ఈ సాంకేతికతను ఉపయోగిస్తున్నాయి.
అంటే వాహనాల టైర్లు నలుపు రంగులో ఉండటానికి కారణం కేవలం అందం కాదు. కార్బన్ బ్లాక్ వల్ల టైర్ల బలం, మన్నిక, వేడి నియంత్రణ & యూవీ రక్షణ గణనీయంగా పెరుగుతాయి. భద్రత & పనితీరు పరంగా కూడా ఇది కీలక పాత్ర పోషిస్తుంది. అందుకే ప్రపంచవ్యాప్తంగా వాహనాల టైర్లు నలుపు రంగులోనే తయారవుతున్నాయి. ఈసారి మీ కారు లేదా బైక్ టైర్ను చూసినప్పుడు, దాని వెనుక ఉన్న ఈ ఆసక్తికరమైన శాస్త్రీయత మీకు తప్పకుండా గుర్తుకొస్తుంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
