Diwali Offers: హోండా, వోక్స్‌వ్యాగన్, హ్యుందాయ్ సెడాన్లపై దీపావళి బంపర్ ఆఫర్లు.. రూ.1.25 లక్షల వరకు బెనిఫిట్స్
దీపావళి పండుగ సందర్భంగా హోండా సిటీ, వోక్స్‌వ్యాగన్ విర్టస్, హ్యుందాయ్ వెర్నా సహా టాప్ 5 సెడాన్లపై రూ.1.25 లక్షల వరకు డిస్కౌంట్లు అందుబాటులో ఉన్నాయి.
Diwali 2026 Offers On Sedans: దీపావళి పండుగ దగ్గరపడుతోంది. ఈ సందర్భంగా, కార్ల కంపెనీలు పండుగ సీజన్ అమ్మకాలను పెంచుకునేందుకు భారీ ఆఫర్లు ప్రకటిస్తున్నాయి. కాంపాక్ట్ SUVలు, హ్యాచ్‌బ్యాక్ కార్లపై అందుబాటులో ఉన్న ప్రయోజనాల గురించి ఇప్పటికే 'abp దేశం' కథనాల్లో తెలుసుకున్నాం. ఇప్పుడు సెడాన్ కార్ల వంతు వచ్చింది. కొన్ని పాపులర్‌ సెడాన్లపై రూ.1.25 లక్షల వరకు ప్రయోజనాలు లభిస్తున్నాయి. మరికొన్ని మోడళ్లపై రూ.50,000 నుంచి రూ.80,000 వరకు తగ్గింపులు ఉన్నాయి.
Honda City: రూ.1.25 లక్షల వరకు ప్రయోజనాలు
ఈ జాబితాలో హోండా సిటీ మొదటి స్థానంలో ఉంది. దీని పెట్రోల్ వేరియంట్లపై గరిష్ఠంగా రూ.1.25 లక్షల వరకు ప్రయోజనాలు అందిస్తున్నారు. మాస్ మార్కెట్ సెడాన్లలో ఇదే అత్యధిక ఆఫర్. ఈ ఆఫర్‌లో రూ.60,000 వరకు నగదు తగ్గింపు ఉంది. ఏదైనా పాత కారును ఎక్స్ఛేంజ్ చేస్తే రూ.50,000 వరకు బోనస్ లభిస్తుంది. పాత హోండా కారుకు అదనంగా రూ.6,000 వరకు ఎక్స్ఛేంజ్ బోనస్ ఇచ్చే అవకాశం ఉంది. వీటితో పాటు రూ.4,000 వరకు లాయల్టీ బోనస్, రూ.5,000 వరకు కార్పొరేట్ ప్రయోజనం ఉన్నాయి.
అన్ని వేరియంట్లతో పాటు రూ.19,000 విలువైన డ్యాష్‌క్యామ్‌ను ఉచితంగా అందిస్తున్నారు. ఎక్స్‌టెండెడ్ వారంటీపై రూ.16,900 తగ్గింపు కూడా ఉంది. హోండా సిటీ ధరలు రూ.12.08 లక్షల నుంచి రూ.17.44 లక్షల వరకు ఉన్నాయి.
సిటీ హైబ్రిడ్‌పై మాత్రం ఈ స్థాయిలో ఆఫర్లు లేవు. ఇప్పటికే హోండా కస్టమర్లుగా ఉన్నవారికి రూ.6,000 వరకు ఎక్స్ఛేంజ్ బోనస్, రూ.4,000 లాయల్టీ బోనస్, రూ.5,000 కార్పొరేట్ ప్రయోజనం అందిస్తున్నారు. దీని ధర రూ.21.44 లక్షలు.
Volkswagen Virtus: రూ.80,000 వరకు ప్రయోజనాలు
వోక్స్‌వ్యాగన్ విర్టస్‌పై కూడా దీపావళి సందర్భంగా ఆకర్షణీయమైన ఆఫర్లు ఉన్నాయి. ఈ సెడాన్‌పై మొత్తం రూ.80,000 వరకు ప్రయోజనాలు పొందవచ్చు. ఇందులో రూ.50,000 వరకు క్యాష్‌ డిస్కౌంట్, రూ.30,000 వరకు ఎక్స్ఛేంజ్ బోనస్ ఉన్నాయి.
వోక్స్‌వ్యాగన్ విర్టస్ ధరలు రూ.10.71 లక్షల నుంచి రూ.19.20 లక్షల వరకు ఉన్నాయి.
ఇది కూడా చదవండి: Maruti Fronx కంటే ఎక్కువ మైలేజ్ ఇచ్చిన Brezza Turbo.. సిటీ ట్రాఫిక్‌లో, హైవేపై మీద ఎంత ఇచ్చిందంటే?
Hyundai Verna: రూ.80,000 వరకు డిస్కౌంట్
హ్యుందాయ్ వెర్నాపై గరిష్ఠంగా రూ.80,000 వరకు ప్రయోజనాలు లభిస్తున్నాయి. ఇందులో రూ.40,000 వరకు నగదు తగ్గింపు, రూ.10,000 వరకు కార్పొరేట్ బోనస్ ఉన్నాయి. దీనితో పాటు స్క్రాపేజ్ బోనస్ లేదా ఎక్స్ఛేంజ్ బోనస్‌లో ఒకదానిని ఎంచుకోవచ్చు. పాత కారును స్క్రాప్ చేస్తే రూ.25,000 వరకు బోనస్ లభిస్తుంది. ఎక్స్ఛేంజ్ చేసుకుంటే రూ.20,000 వరకు ప్రయోజనం ఉంటుంది. కొన్ని ఎంపిక చేసిన పాత కార్ల యజమానులకు ఎక్స్ఛేంజ్ బోనస్ రూ.30,000 వరకు పెరుగుతుంది.
ఈ ప్రత్యేక జాబితాలో Maruti Alto K10, Hyundai i10, Hyundai i20, Maruti Swift, Maruti Dzire, Maruti Baleno, Maruti Celerio, Maruti S Presso, Maruti Wagon R, Maruti Ignis, Tata Tiago ఉన్నాయి. ఈ ఆఫర్లు వెర్నాలోని అన్ని వేరియంట్లకు వర్తిస్తాయి. దీని ధర రూ.10.99 లక్షల నుంచి రూ.18.31 లక్షల వరకు ఉంది.
Honda Amaze: రూ.43,000 వరకు ప్రయోజనాలు
హోండా అమేజ్‌పై రూ.43,000 వరకు ఆఫర్లు అందుబాటులో ఉన్నాయి. ఇందులో రూ.15,000 వరకు క్యాష్‌ డిస్కౌంట్, రూ.21,000 వరకు ఎక్స్ఛేంజ్ బోనస్ ఉన్నాయి. వీటికి అదనంగా రూ.4,000 వరకు లాయల్టీ బెనిఫిట్స్, రూ.3,000 వరకు కార్పొరేట్ బోనస్ లభిస్తాయి.
హోండా సిటీ మాదిరిగానే అమేజ్ ఎక్స్‌టెండెడ్ వారంటీపై కూడా రూ.16,900 తగ్గింపు ప్రకటించారు. హోండా అమేజ్ ధరలు రూ.7.65 లక్షల నుంచి రూ.10 లక్షల వరకు ఉన్నాయి.
ఇది కూడా చదవండి: సొంతంగా టాక్సీ నడిపేవాళ్లకు గొప్ప అవకాశం.. 320km రేంజ్‌ ఇచ్చే ఎలక్ట్రిక్ కారు.. రూ.4.5 లక్షలే!
Hyundai Aura: రూ.40,000 వరకు ప్రయోజనాలు
ఈ జాబితాలో చివరి స్థానంలో హ్యుందాయ్ ఆరా ఉంది. దీని CNG వేరియంట్లపై రూ.30,000 వరకు నగదు తగ్గింపు ఆఫర్ ఉంది. పెట్రోల్ వేరియంట్లపై ఈ తగ్గింపు రూ.15,000 వరకు ఉంది. అన్ని వేరియంట్లకు రూ.5,000 వరకు స్క్రాపేజ్ బోనస్, మరో రూ.5,000 వరకు గ్రామీణ ప్రాంతాల ప్రత్యేక ఆఫర్ కూడా లభిస్తుంది. వీటితో కలిపి గరిష్ఠంగా రూ.40,000 వరకు ప్రయోజనాలు పొందవచ్చు.
నగరాన్ని బట్టి డిస్కౌంట్లు, ప్రయోజనాలు మారవచ్చు. డీలర్ల వద్ద అందుబాటులో ఉన్న స్టాక్‌పై కూడా ఆఫర్లు ఆధారపడి ఉంటాయి. కచ్చితమైన వివరాల కోసం స్థానిక డీలర్‌ను సంప్రదించాలి.
గమనిక: అన్ని కార్ల ధరలు ఎక్స్-షోరూమ్ ధరలు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
