2027 Triumph Tiger 1200 వచ్చేసింది.. ధర తెలిస్తే షాక్ అవుతారు! ఇందులోని రాడార్ టెక్నాలజీకి ఫిదా అవ్వాల్సిందే!
2027 ట్రయంఫ్ టైగర్ 1200 భారత్‌లో విడుదలైంది. జీటీ ప్రో, ర్యాలీ ఎక్స్‌ప్లోరర్ వేరియంట్ల ధరలు, 158HP ఇంజిన్, రాడార్ ఫీచర్ల వివరాలు తెలుసుకోండి.
2027 Triumph Tiger 1200 Details In Telugu: ట్రయంఫ్ మోటార్‌సైకిల్స్ భారత మార్కెట్లో మరో అదిరిపోయే బైక్‌ను తీసుకొచ్చింది. తన ఫ్లాగ్‌షిప్ అడ్వెంచర్ బైక్ టైగర్ 1200కు కొత్త రూపాన్ని ఇచ్చింది. 2027 మోడల్ ధరలను ప్రకటించింది. ఇందులో GT Pro, Rally Explorer అనే రెండు వేరియంట్లు అందుబాటులో ఉంటాయి. ఈ బైక్‌లు 2027 మార్చి నుంచి భారత మార్కెట్లో విక్రయానికి రానున్నాయి. ధరలు చూస్తే మాత్రం సామాన్యులకు షాక్ తప్పదు. ఎందుకంటే ఈ బైక్ ధరతో ఒక మంచి లగ్జరీ కారు కొనొచ్చు. అయితే, ఇందులో అందించిన పవర్ఫుల్ ఇంజిన్, మోడ్రన్‌ టెక్నాలజీలు కచ్చితంగా ఆకట్టుకుంటాయి.
2027 ట్రయంఫ్ టైగర్ 1200 ధరలు
కొత్త టైగర్ 1200 జీటీ ప్రో వేరియంట్ ఎక్స్-షోరూమ్ ధర రూ.20.99 లక్షలు. ర్యాలీ ఎక్స్‌ప్లోరర్ వేరియంట్ ధర రూ.23.49 లక్షలు. గత మోడళ్లతో పోలిస్తే కొత్త వెర్షన్‌లో ఇంజిన్, ఛాసిస్, భద్రతా వ్యవస్థల్లో కీలక మార్పులు చేశారు.
శక్తిమంతమైన 1,160cc ఇంజిన్
ఈ బైక్‌లో 1,160cc లిక్విడ్ కూల్డ్ ఇన్‌లైన్ ట్రిపుల్ ఇంజిన్ ఉంటుంది. ఇది 9,250rpm వద్ద 158HP శక్తిని ఉత్పత్తి చేస్తుంది. గత మోడల్‌తో పోలిస్తే 8HP పవర్ పెరిగింది. 6,750rpm వద్ద 130Nm టార్క్ అందిస్తుంది. తక్కువ rpm వద్ద కూడా మెరుగైన టార్క్ లభించేలా ఇంజిన్‌ను అభివృద్ధి చేశారు. సిలిండర్ హెడ్, పిస్టన్లు, ఎగ్జాస్ట్ వ్యవస్థలో మార్పులు చేశారు. తేలికైన వాల్వ్‌లు, మెరుగైన ఫ్యూయల్ ఇంజెక్షన్ వ్యవస్థను అందించారు. కొత్త గేర్ రేషియోల వల్ల తక్కువ వేగంలోనూ బైక్‌ను నియంత్రించడం సులభమవుతుంది.
వీల్ సైజులో కీలక మార్పు
కొత్త టైగర్ 1200 రెండు వేరియంట్లలోనూ ముందు 19 అంగుళాలు, వెనుక 17 అంగుళాల చక్రాలు ఉంటాయి. గత మోడళ్లలో ఉన్న 21 అంగుళాల ముందు చక్రానికి ఈసారి స్వస్తి చెప్పారు. జీటీ ప్రోలో కాస్ట్ అల్యూమినియం వీల్స్ అందించారు. ర్యాలీ ఎక్స్‌ప్లోరర్‌లో స్పోక్ వీల్స్ ఉంటాయి.
ఇది కూడా చదవండి: రూ.16.99 లక్షలు పెట్టి Renault Duster Hybrid కొనడం మంచిదేనా? మైలేజీ, ఫీచర్లు, బూట్ స్పేస్‌పై పూర్తి విశ్లేషణ
అధునాతన సస్పెన్షన్, బ్రేకులు
ఈ బైక్‌లో షోవా సెమీ యాక్టివ్ సస్పెన్షన్ వ్యవస్థను ఏర్పాటు చేశారు. ముందు 49mm USD ఫోర్క్, వెనుక మోనోషాక్ ఉంటాయి. రెండింటిలోనూ 200 మి.మీ. సస్పెన్షన్ ట్రావెల్ లభిస్తుంది. రోడ్డుపై పరిస్థితులకు అనుగుణంగా సస్పెన్షన్ తన సెట్టింగులను మార్చుకుంటుంది. ఆరు యాక్సిస్ ఐఎంయూ సహా పలు సెన్సర్ల నుంచి సమాచారం తీసుకుని పనిచేస్తుంది. బ్రేకింగ్ కోసం ముందు రెండు 320mm డిస్క్‌లు, బ్రెంబో స్టైలెమా కాలిపర్లు ఉన్నాయి. వెనుక 282mm డిస్క్ బ్రేక్ ఇచ్చారు. జీటీ ప్రో బరువు 250 కిలోలు కాగా, ర్యాలీ ఎక్స్‌ప్లోరర్ బరువు 268 కిలోలు.
రాడార్ టెక్నాలజీతో భద్రత
కొత్త మోడల్‌లో ముందు, వెనుక బాష్ రాడార్ వ్యవస్థను అందించడం మరో ప్రత్యేకత. దీని ద్వారా అడాప్టివ్ క్రూయిజ్ కంట్రోల్, గ్రూప్ రైడ్ అసిస్ట్, ఎమర్జెన్సీ బ్రేక్ అసిస్ట్, ముందస్తు ఢీకొనే ప్రమాద హెచ్చరికలు వంటి ఫీచర్లు పనిచేస్తాయి. బ్లైండ్ స్పాట్ అసిస్ట్, వెనుక నుంచి వచ్చే వాహనాల దూరాన్ని తెలియజేసే వ్యవస్థ కూడా ఉన్నాయి.
ఇక 7 అంగుళాల TFT టచ్‌స్క్రీన్ డిస్‌ప్లే ఇచ్చారు. ఇందులో వైర్‌లెస్ ఆపిల్ కార్‌ప్లే, ఆండ్రాయిడ్ ఆటో సదుపాయాలు ఉంటాయి. ఫోన్ ఛార్జింగ్ కోసం ట్యాంక్‌పై ప్రత్యేక కంపార్ట్‌మెంట్‌తో పాటు USB-C పోర్ట్ అందించారు. జీటీ ప్రోలో ఏడు రైడింగ్ మోడ్‌లు ఉంటాయి. ర్యాలీ ఎక్స్‌ప్లోరర్‌లో అదనంగా ఆఫ్‌రోడ్ ప్రో మోడ్ ఇవ్వడంతో మొత్తం ఎనిమిది మోడ్‌లు లభిస్తాయి.
ఇది కూడా చదవండి: E20, E100, B100 ఇంధనాలపై కేంద్రం కొత్త నిబంధనలు.. మారుతి WagonR Flex Fuel ప్రత్యేకతలివే!
రెండు వేరియంట్ల మధ్య తేడాలివే
జీటీ ప్రోలో 20 లీటర్ల ఇంధన ట్యాంక్ ఉంటుంది. ర్యాలీ ఎక్స్‌ప్లోరర్‌లో 30 లీటర్ల భారీ ట్యాంక్ అందించారు. అంతేకాకుండా టైర్ ప్రెజర్ మానిటరింగ్ సిస్టమ్ (TPMS), ఇంజిన్ గార్డ్, అదనపు ఇంజిన్ ప్రొటెక్షన్ బార్లు ఉన్నాయి. హ్యాండిల్‌బార్లను కూడా 10mm ఎత్తుగా, 10mm వెడల్పుగా అమర్చారు. అడ్జస్టబుల్ ఫోల్డింగ్ బ్రేక్ పెడల్ సదుపాయం కూడా ఉంది.
పోటీ బైక్‌లతో పోలిస్తే ధర ఎలా ఉంది?
భారత మార్కెట్లో ఈ బైక్‌కు BMW R 1300 GS, Ducati Multistrada V4 వంటి మోడళ్లు పోటీగా ఉన్నాయి. BMW R 1300 GS ధర రూ.24 లక్షల నుంచి ప్రారంభమవుతుంది. దాని GSA వెర్షన్ ధర రూ.26.50 లక్షలుగా ఉంది. Ducati Multistrada V4 ప్రారంభ ధర రూ.25.06 లక్షలు. వీటితో పోలిస్తే కొత్త టైగర్ 1200 వేరియంట్ల ధరలు తక్కువగా ఉన్నాయి.
పవర్ఫుల్ ఇంజిన్, రాడార్ ఆధారిత సేఫ్టీ ఫీచర్లు, అధునాతన సస్పెన్షన్‌తో 2027 ట్రయంఫ్ టైగర్ 1200 ప్రీమియం అడ్వెంచర్ బైక్ విభాగంలో గట్టి పోటీ ఇవ్వనుంది. రూ.20.99 లక్షల ప్రారంభ ధరతో వస్తున్న ఈ బైక్‌ను కొనుగోలు చేయాలనుకునేవారు 2027 మార్చి వరకు వేచి చూడాల్సి ఉంటుంది.
గమనిక: పేర్కొన్న ధరలన్నీ భారతదేశంలో ఎక్స్-షోరూమ్ ధరలు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
