Bike Pillion Seat: తల్లిదండ్రులతో బైక్‌పై ప్రయాణిస్తున్నారా? వెనుక కూర్చునేవారికి సౌకర్యవంతమైన సీట్‌ ఉన్న 5 బైక్స్

Comfortable Pillion Seats: తల్లిదండ్రులు, వృద్ధ కుటుంబ సభ్యులతో సౌకర్యంగా ప్రయాణించేందుకు హోండా యూనికార్న్, టీవీఎస్ రోనిన్ సహా భారత్‌లో పరిశీలించదగిన 5 బైక్స్ వివరాలు.

తెలుగులో ఆటోమొబైల్‌ వార్తలు

Source : https://x.com/

Comfortable Bike Pillion Seats: కుటుంబ సభ్యులతో కలిసి బైక్‌పై ప్రయాణించాలనుకున్నప్పుడు కొన్ని విషయాలు ప్రత్యేకంగా గుర్తుంచుకోవాలి. ముఖ్యంగా తల్లిదండ్రులు లేదా వృద్ధులను వెనుక కూర్చోబెట్టుకుని తీసుకెళ్లేటప్పుడు బైక్ ఎంపిక విషయంలో జాగ్రత్త అవసరం. రైడర్‌కు సౌకర్యంగా అనిపించే సీటు.. వెనుక కూర్చునే వారికి కూడా అదే స్థాయిలో సౌకర్యం ఇస్తుందని చెప్పలేం. గుంతలు, స్పీడ్ బ్రేకర్లు ఉన్న రోడ్లపై ఎక్కువ దూరం ప్రయాణిస్తే వెనుక కూర్చున్నవారికి ఇబ్బంది కలగవచ్చు.

అందుకే పిలియన్ సీటు వెడల్పు, కుషనింగ్, బైక్ ఎత్తు, వెనుక కూర్చునేవారు పట్టుకునే గ్రాబ్ రైల్, సస్పెన్షన్ పనితీరు వంటి అంశాలను పరిశీలించాలి. బైక్‌పైకి ఎక్కడం, దిగడం సులభంగా ఉండటం కూడా ముఖ్యమే. ఈ అంశాలను దృష్టిలో పెట్టుకుంటే పరిశీలించదగిన ఐదు బైక్స్ ఇవి.

1. Honda Unicorn

ధర: రూ.1.15 లక్షల నుంచి (ఎక్స్-షోరూమ్)

రోజువారీ ప్రయాణాలతో పాటు తల్లిదండ్రులను కూడా వెంట తీసుకెళ్లాలనుకునేవారికి హోండా యూనికార్న్ మంచి ఎంపికగా నిలుస్తుంది. ఇందులో పొడవైన, చదునైన, ఒకే ముక్కగా ఉండే సీటు ఉంది. మంచి కుషనింగ్ ఉండటంతో రైడర్‌తో పాటు వెనుక కూర్చునే వ్యక్తికి కూడా తగినంత స్థలం లభిస్తుంది. గ్రాబ్ రైల్‌ను సులభంగా పట్టుకునేలా ఏర్పాటు చేశారు. పిలియన్ ఫుట్‌పెగ్స్ స్థానం కూడా సౌకర్యవంతంగా ఉంటుంది.

ఈ బైక్‌లోని సస్పెన్షన్ రోజువారీ రోడ్లపై ఎదురయ్యే గుంతలు, ఎగుడుదిగుళ్ల ప్రభావాన్ని తగ్గించడంలో సహాయపడుతుంది. స్పోర్టీ రైడింగ్ కంటే ప్రశాంతమైన ప్రయాణానికి ప్రాధాన్యం ఇచ్చే వారికి యూనికార్న్‌ను పరిశీలించవచ్చు.

2. TVS Ronin

ధర: రూ.1.30 లక్షల నుంచి (ఎక్స్-షోరూమ్)

కమ్యూటర్ బైక్‌కు భిన్నంగా కొంత ప్రత్యేకమైన రూపం, సౌకర్యవంతమైన రైడింగ్ అనుభూతి కావాలనుకునేవారు టీవీఎస్ రోనిన్‌ను చూడవచ్చు. ఇందులో ఇంజిన్ పనితీరు మెరుగ్గా ఉండటంతో పాటు తక్కువ వేగాల్లోనూ మంచి పికప్ లభిస్తుంది. రైడర్ కూర్చునే విధానం కూడా రిలాక్స్‌డ్‌గా ఉంటుంది.

వెనుక కూర్చునే వారికి కూడా దీని సీటింగ్ పొజిషన్ సౌకర్యవంతంగా ఉంటుంది. రోడ్డు పరిస్థితులు మారినప్పుడు బైక్ రైడ్, హ్యాండ్లింగ్ మధ్య మంచి బ్యాలెన్స్‌ కనిపిస్తుంది. మరో ముఖ్యమైన విషయం ఏమిటంటే.. టీవీఎస్ ఇందులో అదనపు యాక్సెసరీగా బ్యాక్‌రెస్ట్‌ను అందిస్తోంది. వెనుక కూర్చునే వృద్ధులకు వెన్నుకు అదనపు ఆధారం కావాలంటే ఈ ఎంపికను పరిశీలించవచ్చు.

ఇది కూడా చదవండి: కాలంతో పాటు బైక్‌లు మారుతున్నా సర్వీసింగ్‌ తీరు మారడం లేదు.. ఇంకా మెరుగుపడాలి!

3. Royal Enfield Bullet 350

ధర: రూ.1.67 లక్షల నుంచి (ఎక్స్-షోరూమ్)

సంప్రదాయ రూపం, నిటారుగా కూర్చునే రైడింగ్ పొజిషన్ ఉన్న బైక్ కావాలనుకునేవారికి రాయల్ ఎన్‌ఫీల్డ్ బుల్లెట్ 350 నచ్చవచ్చు. ఇందులో రైడర్, పిలియన్ ఇద్దరికీ అనువైన సీటు ఉంటుంది. సీటు ఎత్తు కూడా అందుబాటులో ఉండటంతో బైక్ ఎక్కడం, దిగడం కొంత సులభంగా ఉంటుంది.

బుల్లెట్ 350 రైడ్ క్వాలిటీ మరో ప్రత్యేకత. రోడ్డుపై స్థిరంగా ప్రయాణిస్తూ గుంతలు, అసమాన రహదారులపై కూడా నమ్మకమైన అనుభూతిని అందిస్తుంది. అయితే ఒక విషయం గుర్తుంచుకోవాలి. ఈ బైక్ బరువు ఎక్కువ. ట్రాఫిక్‌లో తక్కువ వేగంతో నడిపేటప్పుడు, ఇరుకైన ప్రదేశాల్లో తిప్పేటప్పుడు లేదా వెనుక ప్రయాణికుడితో బ్యాలెన్స్ చేయాల్సి వచ్చినప్పుడు కొంత కష్టం కావచ్చు. బరువైన బైక్‌ను నియంత్రించగలిగే సామర్థ్యం ఉన్నవారే దీన్ని ఎంచుకోవడం మంచిది.

4. Honda H’ness CB350

ధర: రూ.1.93 లక్షల నుంచి (ఎక్స్-షోరూమ్)

వైబ్రేషన్లు, రోడ్డు మీద గుంతల వల్ల వచ్చే కుదుపులను ఇష్టపడని వారికి హోండా హైనెస్ సీబీ350 మరో ఎంపిక. దీని ఇంజిన్ ప్రశాంతమైన పనితీరును అందిస్తుంది. వేగంగా దూసుకెళ్లడం కంటే సాఫీగా ప్రయాణించడానికి అనువుగా ఉంటుంది. వెనుక ప్రయాణికుడు ఉన్నప్పుడు ఈ లక్షణం ఉపయోగపడుతుంది.

గుంతలు, స్పీడ్ బ్రేకర్లు, దెబ్బతిన్న రోడ్లపై ప్రయాణాన్ని సౌకర్యవంతంగా ఉంచేందుకు దీని సస్పెన్షన్ సహాయపడుతుంది. విశాలమైన సీటింగ్, రిలాక్స్‌డ్ రైడింగ్ స్వభావం వల్ల కుటుంబ సభ్యులతో కలిసి కొంత దూరం ప్రయాణించాలనుకునేవారు ఈ బైక్‌ను పరిశీలించవచ్చు.

ఇది కూడా చదవండి: 278cc ఇంజిన్, బ్రేంబో బ్రేక్స్, ప్రత్యేక స్టీరింగ్ సిస్టమ్.. Italjet Dragster 300 స్కూటర్‌ స్పెషాలిటీలు ఇవి

5. Jawa 42 FJ

ధర: రూ.2.15 లక్షలు (ఎక్స్-షోరూమ్)

ఆధునిక రూపంతో పాటు పాతకాలపు బైక్‌ల తరహా డిజైన్‌ను ఇష్టపడేవారికి జావా 42 ఎఫ్‌జే నచ్చవచ్చు. ఇందులో నిటారుగా కూర్చునే రైడింగ్ పొజిషన్ ఉండటంతో ఎక్కువ దూరం ప్రయాణించేటప్పుడు కూడా సౌకర్యంగా ఉంటుంది. రైడర్‌తో పాటు పిలియన్‌కు కూడా అనువైన ఎంపికగా దీన్ని పరిశీలించవచ్చు.

 తల్లిదండ్రులతో బైక్‌పై వెళ్లేముందు ఏం పరిశీలించాలి?

- ఎక్కడం, దిగడం: సీటు ఎత్తు మరీ ఎక్కువగా ఉండకూడదు. బైక్‌పైకి సులభంగా ఎక్కగలుగుతున్నారా, దిగగలుగుతున్నారా అనేది చూడాలి.
- పిలియన్ సీటు: సీటు వెడల్పు, కుషనింగ్ సరిపోతున్నాయా? వెనుక కూర్చునే వ్యక్తికి కాళ్లు పెట్టుకోవడానికి తగిన స్థలం ఉందా? పరిశీలించాలి.
- గ్రాబ్ రైల్, బ్యాక్‌రెస్ట్: ప్రయాణికుడు సులభంగా పట్టుకోగలిగే గ్రాబ్ రైల్ ఉండాలి. అవసరమైతే అనువైన బ్యాక్‌రెస్ట్‌ను అమర్చుకోవచ్చు.
- సస్పెన్షన్: గుంతలు, స్పీడ్ బ్రేకర్లు ఉన్న రోడ్డుపై టెస్ట్ రైడ్ చేసి వెనుక కూర్చునే వ్యక్తికి ఎలా అనిపిస్తుందో తెలుసుకోవాలి.
- బైక్ బరువు, బ్యాలెన్స్: పిలియన్‌తో ప్రయాణించేటప్పుడు బైక్‌ను నియంత్రించడం సులభంగా ఉందో లేదో పరీక్షించాలి. ముఖ్యంగా ట్రాఫిక్‌లో తక్కువ వేగంతో నడిపేటప్పుడు ఇది కీలకం.
- హెల్మెట్: ప్రయాణం ఎంత తక్కువ దూరమైనా వెనుక కూర్చునే వ్యక్తికి సరైన సైజులో ఉండే హెల్మెట్ తప్పనిసరిగా పెట్టాలి.

తల్లిదండ్రులతో కలిసి ప్రయాణించాలనుకునేవారు కేవలం బైక్‌ రూపం, మైలేజీ, ధర ఆధారంగా నిర్ణయం తీసుకోకూడదు. పైన చెప్పిన అంశాలను పరిగణనలోకి తీసుకోవాలి. వీలైతే, బైక్ కొనేముందు తల్లిదండ్రులతో కలిసి టెస్ట్ రైడ్ చేయడం ఉత్తమం.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.

మరిన్ని చదవండి

Vespa నుంచి మూడు గ్లోబల్‌ రేంజ్‌ ఎలక్ట్రిక్ స్కూటర్లు.. ఒక్కసారి ఛార్జ్‌ చేస్తే ఎంత దూరం ప్రయాణిస్తాయంటే?

Royal Enfield Himalayan 750 నడుపుతుంటే ఎలా అనిపించింది? ప్లస్‌లు, మైనస్‌లు