రాయల్ ఎన్‌ఫీల్డ్ షాట్‌గన్ 650 లిమిటెడ్ ఎడిషన్ - ప్రపంచవ్యాప్తంగా కేవలం 100 యూనిట్లే, ధర రూ.5.75 లక్షలే!
రాయల్ ఎన్‌ఫీల్డ్ షాట్‌గన్ 650 రఫ్ క్రాఫ్ట్స్ ఎడిషన్‌ను కంపెనీ ఆవిష్కరించింది. ప్రపంచవ్యాప్తంగా కేవలం 100 యూనిట్లు మాత్రమే అందుబాటులో ఉండగా, భారతదేశానికి 25 బైక్‌లు మాత్రమే కేటాయించారు.
Royal Enfield Shotgun 650 Rough Crafts edition: రాయల్ ఎన్‌ఫీల్డ్ అభిమానులకు ఆ కంపెనీ అదిరిపోయే సర్‌ప్రైజ్ ఇచ్చింది. పాపులర్‌ షాట్‌గన్ 650కు ప్రత్యేకమైన రఫ్ క్రాఫ్ట్స్ ఎడిషన్‌ను అధికారికంగా ఆవిష్కరించింది. ఇది సాధారణ మోడల్ కాదు. ప్రపంచవ్యాప్తంగా కేవలం 100 బైక్‌లను మాత్రమే అమ్ముతుండగా, అందులో భారతదేశానికి కేటాయించింది కేవలం 25 యూనిట్లే. దీంతో ఈ బైక్‌పై ఇప్పటికే భారీ ఆసక్తి నెలకొంది. లిమిటెడ్ ఎడిషన్ బైక్‌ను సొంతం చేసుకోవాలనుకునే వారు వెంటనే రిజిస్ట్రేషన్ పూర్తి చేసుకోవాలని కంపెనీ సూచిస్తోంది.
ఈ ప్రత్యేక ఎడిషన్ షాట్‌గన్ 650 ధర రూ.5.75 లక్షలు (ఎక్స్‌షోరూమ్)గా నిర్ణయించారు. ప్రతి బైక్‌కు ప్రత్యేక నంబర్ ఇవ్వడం ద్వారా దీనిని కలెక్టర్ల కోసం మరింత విలువైన మోడల్‌గా రూపొందించారు. రాయల్ ఎన్‌ఫీల్డ్ యాప్‌ లేదా కంపెనీ అధికారిక వెబ్‌సైట్ ద్వారా జులై 15 నుంచి జులై 30 మధ్యకాలంలో రిజిస్ట్రేషన్ చేసుకునే అవకాశం కల్పించారు.
ఈ బైక్‌కు ప్రేరణ తైవాన్‌కు చెందిన ప్రముఖ కస్టమ్ మోటార్‌సైకిల్ తయారీ సంస్థ రఫ్ క్రాఫ్ట్స్ రూపొందించిన 'కాలిబర్ రాయల్' కస్టమ్ బైక్. ఈ మోడల్‌ను తొలిసారిగా EICMA 2025లో ప్రదర్శించగా, అనంతరం భారతదేశంలో జరిగిన Motoverse 2025 కార్యక్రమంలో కూడా ఆవిష్కరించారు. ఇప్పుడు అదే డిజైన్ అంశాలను ఫ్యాక్టరీ నుంచే అందించే లిమిటెడ్ ఎడిషన్ రూపంలో రాయల్ ఎన్‌ఫీల్డ్ తీసుకొచ్చింది.
ఇది కూడా చదవండి: ఆటోమేటిక్ కంటే మాన్యువల్ డ్రైవింగే బెస్ట్! ఏకాగ్రతకు, మెదడు షార్ప్‌గా పని చేయడానికి ఇదే మంచిదట!
డిజైన్ పరంగా ఈ బైక్ ప్రత్యేక ఆకర్షణగా నిలుస్తుంది. గ్లోస్ జెట్ బ్లాక్ & మ్యాట్ స్టెల్త్ బ్లాక్ రంగుల కలయికతో పాటు చేతితో రూపొందించిన గోల్డ్ లీఫ్ స్ట్రైప్స్, గ్రే యాక్సెంట్స్, ప్రత్యేక బ్రాస్ రఫ్ క్రాఫ్ట్స్ బ్యాడ్జ్‌ను అమర్చారు. ప్రతి ఫ్యూయల్ ట్యాంక్‌పై ప్రత్యేక సీరియల్ నంబర్ ఉండటం ఈ ఎడిషన్ ప్రత్యేకత.
ఇందులో బ్లాక్ బార్ ఎండ్ మిర్రర్లు, క్విల్టెడ్ లెదర్ సీట్లు, కాంట్రాస్ట్ కట్ అల్లాయ్ వీల్స్, గోల్డ్ కలర్ ఫ్రంట్ ఫోర్క్ ట్యూబ్స్ వంటి ప్రత్యేక డిజైన్ అంశాలు కూడా ఉన్నాయి. ప్రతి బైక్‌తో పాటు కాలిబర్ రాయల్ స్కెచ్‌తో రూపొందించిన ప్రత్యేక ఆర్ట్‌వర్క్‌ను కూడా అందిస్తారు. దీనిని రఫ్ క్రాఫ్ట్స్ వ్యవస్థాపకుడు విన్స్టన్ యెహ్ స్వయంగా రూపొందించి సంతకం చేశారు.
భారత మార్కెట్‌లో ఈ 25 బైక్‌ల విక్రయం జులై 30 సాయంత్రం 7 గంటలకు ప్రారంభమవుతుంది. ముందుగా రిజిస్ట్రేషన్ చేసుకున్నవారిలో కొనుగోలు ప్రక్రియను విజయవంతంగా పూర్తి చేసిన తొలి 25 మందికే ఈ లిమిటెడ్ ఎడిషన్ బైక్ దక్కుతుంది. అందుకే ఆసక్తి ఉన్నవాళ్లు ఆలస్యం చేయకుండా ముందుగానే నమోదు చేసుకోవడం మంచిది.
ఇది కూడా చదవండి: రూ.73,850 నుంచే హీరో విడా VX2 - ఏ వేరియంట్ కొనాలి? ఫీచర్లు, ధరల పూర్తి వివరాలు
ఇంజిన్ పరంగా మాత్రం ఎలాంటి మార్పులు చేయలేదు. సాధారణ షాట్‌గన్ 650లో ఉన్న 648cc ప్యారలల్ ట్విన్, ఎయిర్/ఆయిల్ కూల్డ్ ఇంజిన్‌నే ఇందులో కొనసాగించారు. ఈ ఇంజిన్ 47hp శక్తి & 52.3Nm టార్క్‌ను ఉత్పత్తి చేస్తుంది. దీనికి 6 స్పీడ్ గేర్‌బాక్స్‌ను జత చేశారు. పనితీరు పరంగా ఎలాంటి మార్పులు లేకపోయినా, డిజైన్ & ప్రత్యేక ఎడిషన్ అంశాల కారణంగా ఈ బైక్‌కు ప్రత్యేక గుర్తింపు లభించింది.
ప్రత్యేక డిజైన్, నంబర్డ్ ఎడిషన్ & అంతర్జాతీయ స్థాయి ప్రత్యేకత కారణంగా ఈ మోడల్ భవిష్యత్తులో అరుదైన కలెక్షన్ బైక్‌గా నిలిచే అవకాశాలు కనిపిస్తున్నాయి.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
