రెనాల్ట్‌ డస్టర్‌ హైబ్రిడ్‌ vs మారుతి విక్టోరిస్‌ హైబ్రిడ్‌.. మైలేజీ, ఫీచర్లు, ధరలో ఏది ఎక్కువ బెనిఫిట్‌ ఇస్తుంది?
రెనాల్ట్‌ డస్టర్‌ హైబ్రిడ్‌, మారుతి విక్టోరిస్‌ హైబ్రిడ్‌ SUV ధరలు, మైలేజీ, ఇంజిన్‌ సామర్థ్యం, ఫీచర్లు, భద్రత అంశాలను పోల్చి చూసి ఏది మెరుగైన ఎంపికో తెలుసుకోండి.
Renault Duster hybrid vs Maruti Victoris hybrid: హైబ్రిడ్‌ SUV కొనేవాళ్లకు పరిశీలనలో ఉండాల్సిన కార్లు రెనాల్ట్‌ డస్టర్‌ హైబ్రిడ్‌, మారుతి విక్టోరిస్‌ హైబ్రిడ్‌. పెట్రోల్‌ ఖర్చును తగ్గించుకోవడంతో పాటు మంచి పనితీరు, ఆధునిక ఫీచర్లు కోరుకునే వారికి ఈ రెండు మోడళ్లు ఆకర్షణీయమైన ఎంపికలు. అయితే ధర, ఇంజిన్‌ సామర్థ్యం, మైలేజీ, ఫీచర్ల విషయంలో వీటి మధ్య కొన్ని కీలకమైన తేడాలు ఉన్నాయి. టాప్ వేరియంట్లను పోల్చి చూస్తే ఏ కారు ఎక్కువ విలువను అందిస్తుందో తెలుసుకుందాం.
ధరలో డస్టర్‌దే పైచేయి!
రెనాల్ట్‌ డస్టర్‌ స్ట్రాంగ్‌ హైబ్రిడ్‌ ఈ-టెక్‌ 160 టాప్ ఎమోషన్‌ వేరియంట్‌ ధర రూ.19.49 లక్షలు. మారుతి విక్టోరిస్‌ జెడ్ఎక్స్ఐ ప్లస్‌ (ఓ) హైబ్రిడ్‌ వేరియంట్‌ ధర రూ.19.98 లక్షలు. అంటే డస్టర్‌ ధర రూ.49 వేలు తక్కువ. రెండు కార్లలోనూ ఆధునిక ఫీచర్లు ఉన్నప్పటికీ, తక్కువ ధరకు ఎక్కువ పవర్‌ కావాలనుకునే వారికి డస్టర్‌ ఆకర్షణీయంగా కనిపిస్తుంది.
కొలతల్లో డస్టర్‌ పెద్దది!
పరిమాణం విషయంలోనూ డస్టర్‌కు కొన్ని ప్రయోజనాలు ఉన్నాయి. దీని పొడవు 4,346mm కాగా, విక్టోరిస్‌ పొడవు 4,360mm ఈ విషయంలో మారుతి కారు 14mm ముందుంది. అయితే డస్టర్‌ వెడల్పు 1,815mm, ఎత్తు 1,694mmగా ఉన్నాయి. విక్టోరిస్‌ వెడల్పు 1,795mm, ఎత్తు 1,655mm మాత్రమే.
డస్టర్‌ వీల్‌బేస్‌ 2,657mm కాగా, విక్టోరిస్‌ది 2,600mm గ్రౌండ్‌ క్లియరెన్స్‌ కూడా డస్టర్‌లో 212mmగా ఉంది. విక్టోరిస్‌లో ఇది 210mm డస్టర్‌ బూట్‌ స్పేస్‌ 372 లీటర్లు. విక్టోరిస్‌ బూట్‌ స్పేస్‌ 300 లీటర్ల కంటే తక్కువగా ఉంటుందని అంచనా.
ఇది కూడా చదవండి: Renault Duster Hybrid లాంచ్.. 29 కి.మీ మైలేజ్ ఇచ్చే కారు ధర హైదరాబాద్‌లో ఎంతంటే
పవర్‌లో డస్టర్‌ ముందంజ!
రెండు SUVల్లోనూ అట్కిన్సన్‌ సైకిల్‌పై పనిచేసే నేచురల్లీ ఆస్పిరేటెడ్‌ పెట్రోల్‌ ఇంజిన్లు ఉన్నాయి. డస్టర్‌లో 1,789cc ఇంజిన్‌ 110hp పవర్‌, 175Nm టార్క్‌ ఉత్పత్తి చేస్తుంది. విక్టోరిస్‌లోని 1,490cc ఇంజిన్‌ 92hp పవర్‌, 122Nm టార్క్‌ అందిస్తుంది.
ఎలక్ట్రిక్‌ మోటార్‌ విషయంలో మాత్రం విక్టోరిస్‌ 80hp పవర్‌తో ముందుంది. డస్టర్‌ మోటార్‌ 50hp పవర్‌ అందిస్తుంది. అయితే టార్క్‌ విషయంలో డస్టర్‌ ఎలక్ట్రిక్‌ మోటార్‌ 208Nm ఉత్పత్తి చేస్తుంది. విక్టోరిస్‌ మోటార్‌ 141Nm అందిస్తుంది. మొత్తం కలిపి డస్టర్‌ గరిష్ఠ పవర్‌ 160hp. విక్టోరిస్‌లో ఇది 116hp.
గేర్‌బాక్స్‌ల్లోనూ తేడా ఉంది. డస్టర్‌లో రెండు ఎలక్ట్రిక్‌ గేర్లు, నాలుగు పెట్రోల్‌ గేర్లతో కూడిన మల్టీ మోడ్‌ ఆటోమేటిక్‌ గేర్‌బాక్స్‌ ఉంది. విక్టోరిస్‌లో e-CVT గేర్‌బాక్స్‌ ఇచ్చారు.
మైలేజీ విషయంలో ఏది బెటర్‌?
కంపెనీ ప్రకటించిన గణాంకాల ప్రకారం డస్టర్‌ లీటరుకు 29 కి.మీ. మైలేజీ ఇస్తుంది. విక్టోరిస్‌ లీటరుకు 28.65 కి.మీ. ఇంధన సామర్థ్యాన్ని అందిస్తుంది. ఈ గణాంకాల్లో డస్టర్‌ స్వల్ప ఆధిక్యంలో ఉంది. నగరాల్లో డస్టర్‌ 80 శాతం వరకు ఈవీ పవర్‌పై నడుస్తుందని రెనాల్ట్‌ చెబుతోంది. అయితే వాస్తవ రోడ్లపై పరీక్షల్లో వచ్చే మైలేజీ వివరాలు ఇంకా అందుబాటులో లేవు. కాబట్టి కొనుగోలు నిర్ణయానికి ముందు వాస్తవ వినియోగంలో వచ్చే ఫలితాలను కూడా పరిగణనలోకి తీసుకోవాలి.
ఇది కూడా చదవండి: చెరుకుతో ఇథనాల్ తయారీకి కేంద్రం 'నో'.. పెట్రోల్‌ సరఫరాపై ఎలాంటి ప్రభావం పడుతుంది?
ఫీచర్లలో ఏ కారు ముందుంది?
రెండు కార్లలోనూ ఎల్ఈడీ లైట్లు, కనెక్టెడ్‌ టెయిల్‌ ల్యాంప్స్‌, పానోరమిక్‌ సన్‌రూఫ్‌, వెంటిలేటెడ్‌ సీట్లు ఉన్నాయి. 10.1 అంగుళాల ఇన్ఫోటైన్‌మెంట్‌ స్క్రీన్‌, 10.25 అంగుళాల డిజిటల్‌ డ్రైవర్‌ డిస్‌ప్లే, వైర్‌లెస్‌ యాపిల్‌ కార్‌ప్లే, ఆండ్రాయిడ్‌ ఆటో కూడా రెండింటిలోనూ లభిస్తాయి.
డస్టర్‌లో 18 అంగుళాల అల్లాయ్‌ వీల్స్‌, పుడిల్‌ ల్యాంప్స్‌, వెల్కమ్‌ అండ్‌ గుడ్‌బై లైట్‌ యానిమేషన్లు ప్రత్యేక ఆకర్షణ. డ్యూయల్‌ జోన్‌ ఆటోమేటిక్‌ ఏసీ, ఆరు విధాలుగా సర్దుబాటు చేసుకునే పవర్డ్‌ కో డ్రైవర్‌ సీటు కూడా ఇందులో ఉన్నాయి.
విక్టోరిస్‌లో ఎనిమిది విధాలుగా సర్దుబాటు చేసుకునే డ్రైవర్‌ సీటు, ఎనిమిది స్పీకర్ల ఆడియో సిస్టమ్‌, ఇన్‌బిల్ట్‌ నావిగేషన్‌, హెడ్-అప్‌ డిస్‌ప్లే, ఎయిర్‌ ప్యూరిఫైయర్‌, యాంబియంట్‌ లైటింగ్‌ వంటి ఫీచర్లు ఉన్నాయి. ముందు, వెనుక పార్కింగ్‌ సెన్సర్లు, 360 డిగ్రీల కెమెరా కూడా దీనికి అదనపు బలం.
భద్రతలో విక్టోరిస్‌కు స్వల్ప ఆధిక్యం!
రెండు కార్లలోనూ ఆరు ఎయిర్‌బ్యాగులు, ఎలక్ట్రానిక్‌ పార్కింగ్‌ బ్రేక్‌, ఆటో హోల్డ్‌, టైర్‌ ప్రెజర్‌ మానిటరింగ్‌ సిస్టమ్‌, హిల్‌ స్టార్ట్‌ అసిస్ట్‌ ఉన్నాయి. ముందు, వెనుక డిస్క్‌ బ్రేకులు, ఎలక్ట్రానిక్‌ స్టెబిలిటీ కంట్రోల్‌ కూడా అందించారు. అయితే విక్టోరిస్‌లో 360 డిగ్రీల కెమెరా, ముందు పార్కింగ్‌ సెన్సర్లు ఉండటం ప్రయోజనం. రెండు మోడళ్లలోనూ లెవల్‌ 2 ఏడీఏఎస్‌ ఫీచర్లు లేవు.
ఏది కొనాలి?
ధర తక్కువగా ఉండాలి, ఎక్కువ పవర్‌ కావాలి, పెద్ద బ్యాటరీతో కూడిన హైబ్రిడ్‌ వ్యవస్థ కావాలంటే రెనాల్ట్‌ డస్టర్‌ మంచి ఎంపికగా కనిపిస్తుంది. ఫీచర్లలోనూ ఇది కొన్ని ప్రత్యేక ప్రయోజనాలను అందిస్తుంది. మరోవైపు, 360 డిగ్రీల కెమెరా, ఇన్‌బిల్ట్‌ నావిగేషన్‌, అదనపు ఆడియో స్పీకర్లు వంటి సౌకర్యాలు కోరుకునేవారికి మారుతి విక్టోరిస్‌ నచ్చవచ్చు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
