RE Bear 650 Review: ఇంటర్‌సెప్టర్ 650 ఉండగా బేర్ 650 ఎందుకు కొనాలి? మూడు నెలల వాడకంలో తెలిసిన ఆసక్తికర విషయాలివే!
రాయల్ ఎన్‌ఫీల్డ్ బేర్ 650 బైక్‌పై మూడు నెలల లాంగ్ టర్మ్ రివ్యూ. ఇంజిన్, రైడింగ్ సౌకర్యం, బరువు, సస్పెన్షన్, ఇంటర్‌సెప్టర్‌తో పోలిక వివరాలు.
Royal Enfield Bear 650 Review: కొత్త బైక్ కొనేటప్పుడు ధర, మైలేజ్, పనితీరు, సౌకర్యం వంటి అంశాలను చాలామంది పరిశీలిస్తారు. రోజువారీ ప్రయాణాలకు ఎంతవరకు ఉపయోగపడుతుందో కూడా చూస్తారు. ఈ లెక్కలన్నింటినీ పక్కన పెడితే, కొన్ని బైక్‌లు మనసును నేరుగా ఆకట్టుకుంటాయి. రాయల్ ఎన్‌ఫీల్డ్ బేర్ 650 అలాంటి మోటార్‌సైకిల్. మూడు నెలల పాటు రోజువారీ ప్రయాణాల్లో ఉపయోగించిన తర్వాత ఈ బైక్‌పై ఆసక్తికరమైన విషయాలు బయటపడ్డాయి. ఇది అందరికీ సరైన ఎంపిక కాకపోవచ్చు. కానీ ప్రత్యేకమైన రైడింగ్ అనుభూతిని కోరుకునేవారిని మాత్రం ఆకట్టుకుంటుంది.
భారత రోడ్లపై బేర్ 650 ప్రయాణం
బేర్ 650ను ఎడారి రేసింగ్ స్ఫూర్తితో రూపొందించినట్లు రాయల్ ఎన్‌ఫీల్డ్ చెబుతోంది. అయితే, భారత్‌లో ఈ బైక్‌ను కొనేవారిలో చాలామంది ఎడారుల్లో ప్రయాణించరు. నగరాల్లో గుంతలు, స్పీడ్ బ్రేకర్లు, ట్రాఫిక్ మధ్యే ఎక్కువగా నడుపుతారు. అప్పుడప్పుడు వారాంతాల్లో లాంగ్ రైడ్లకు వెళ్తారు.ఈ పరిస్థితుల్లో బేర్ 650 ఎంతవరకు ఉపయోగపడుతుందన్నది అసలు ప్రశ్న. రోజువారీ ప్రయాణాలకు ఇది అత్యంత తెలివైన ఎంపిక అని చెప్పలేం. రాయల్ ఎన్‌ఫీల్డ్ షోరూమ్‌లోనే దీనికి బదులుగా మరిన్ని ఆల్టర్‌నేటివ్‌ మోడళ్లు ఉన్నాయి. అయినప్పటికీ, దీని ప్రత్యేకమైన రూపం, రైడింగ్ శైలి ఆకట్టుకుంటాయి.
ఇంటర్‌సెప్టర్ 650తో పోలిస్తే ఎలా ఉంది?
దీర్ఘ ప్రయాణాల్లో సౌకర్యం కోరుకునేవారికి క్లాసిక్ 650 మంచి ఎంపిక. టూరింగ్‌తో పాటు ఆఫ్‌రోడింగ్ చేయాలనుకునేవారికి హిమాలయన్ 450 ఉపయోగపడుతుంది. తక్కువ ధరలో పవర్‌ఫుల్‌ ట్విన్ సిలిండర్ బైక్ కావాలంటే ఇంటర్‌సెప్టర్ 650ను పరిశీలించవచ్చు. ప్రత్యేకమైన రూపానికి ప్రాధాన్యం ఇచ్చేవారికి షాట్‌గన్ 650 కూడా ఆకర్షణీయంగా ఉంటుంది.
ఇన్ని మోడళ్ల మధ్య కూడా బేర్ 650 ప్రత్యేక స్థానంలో నిలుస్తుంది. ఇది పూర్తిస్థాయి ఆఫ్‌రోడర్ కాదు. హైవేలపై సౌకర్యంగా దూసుకెళ్లే క్రూయిజర్ కూడా కాదు. దీని ప్రారంభ ఎక్స్‌షోరూమ్ ధర సుమారు రూ.3.4 లక్షలు. అందువల్ల ధర విషయంలోనూ అందరికీ అందుబాటులో ఉండే ఎంపిక కాదు.
ఇది కూడా చదవండి: హోండా కార్లపై బిగ్‌ డీల్స్‌.. సిటీ, ఎలివేట్, అమేజ్ కొనేవాళ్లకు రూ.2.35 లక్షల వరకు భారీ డిస్కౌంట్లు!
ఇంజిన్, పనితీరు ఎలా ఉన్నాయి?
బేర్ 650లో 648 సీసీ ప్యార్లల్‌ ట్విన్ సిలిండర్ ఇంజిన్ ఉంది. ఇదే ఇంజిన్‌ను ఇంటర్‌సెప్టర్ 650, కాంటినెంటల్ జీటీ, సూపర్ మీటియర్ 650, షాట్‌గన్ 650 మోడళ్లలోనూ ఉపయోగిస్తున్నారు. ఇది 47 హెచ్‌పీ శక్తిని, 56.5 ఎన్ఎం టార్క్‌ను ఉత్పత్తి చేస్తుంది. ఆరు గేర్ల గేర్‌బాక్స్‌తో పాటు స్లిప్ అండ్ అసిస్ట్ క్లచ్ కూడా ఉంది.
ఇంజిన్ కొత్తది కాకపోయినా, బేర్ 650లో దీన్ని ప్రత్యేకంగా తీర్చిదిద్దారు. పాతకాలపు రూపానికి మోడ్రన్‌ టచ్‌ ఇచ్చారు. 830 మిల్లీమీటర్ల సీటు ఎత్తు చాలామంది రైడర్లకు అనుకూలంగా ఉండవచ్చు. 184 మిల్లీమీటర్ల గ్రౌండ్ క్లియరెన్స్ వల్ల రోడ్లు సరిగా లేని ప్రాంతాల్లోనూ కొంత ధైర్యంగా ప్రయాణించవచ్చు.
బరువు, సస్పెన్షన్ ప్రధాన సమస్యలు
బేర్ 650లో కొన్ని ఇబ్బందులూ ఉన్నాయి. ఈ బైక్ బరువు 210 కిలోలకుపైనే ఉంటుంది. ప్రయాణంలో ఆ బరువు పెద్దగా ఇబ్బంది పెట్టకపోయినా, పార్కింగ్ చేసేటప్పుడు, తక్కువ వేగంతో యూటర్న్ తీసుకునేటప్పుడు స్పష్టంగా తెలుస్తుంది.
సస్పెన్షన్ కూడా గట్టిగానే ఉంటుంది. గుంతలు, ఎగుడుదిగుడు రోడ్లపై ప్రయాణించినప్పుడు రోడ్డు ప్రకంపనలు రైడర్‌కు ఎక్కువగా అనిపిస్తాయి. నగరాల్లో రోజూ ప్రయాణించే వారికి ఇది కొంత అసౌకర్యాన్ని కలిగించవచ్చు.
వెడల్పాటి హ్యాండిల్‌బార్లు, నిటారుగా కూర్చునే విధానం సాధారణ ప్రయాణాలకు అనుకూలంగానే ఉంటాయి. అయితే, హ్యాండిల్‌బార్ల ఎత్తును కొద్దిగా పెంచితే ఎక్కువ దూరం ప్రయాణించేటప్పుడు మరింత సౌకర్యంగా ఉండవచ్చు.
ఇది కూడా చదవండి: హ్యుందాయ్ కార్లపై దసరా ఆఫర్లు.. క్రెటా నుంచి గ్రాండ్ ఐ10 నియోస్ వరకు భారీ తగ్గింపులు!
ఆధునిక ఫీచర్లు ఎలా ఉన్నాయి?
బేర్ 650లో గూగుల్ మ్యాప్స్ నావిగేషన్‌తో కూడిన వృత్తాకార టీఎఫ్‌టీ డిస్‌ప్లే ఉంది. నగరాల్లో కొత్త ప్రాంతాలకు వెళ్లేటప్పుడు ఇది ఉపయోగపడుతుంది. రైడింగ్ మోడ్‌లు, ఆధునిక కనెక్టివిటీ సదుపాయాలు కూడా ఉన్నాయి. అయినప్పటికీ, బైక్ నడిపే అనుభూతిలో మెకానికల్‌ ఫీల్‌ ఎక్కువగా కనిపిస్తుంది.
కొనాలా? వద్దా?
రోజువారీ ప్రయాణాలకు తక్కువ ఖర్చుతో ఉపయోగపడే బైక్ కావాలంటే బేర్ 650 మొదటి ఎంపిక కాకపోవచ్చు. ధర, బరువు, సస్పెన్షన్ అంశాలను పరిగణనలోకి తీసుకోవాలి. కానీ, ప్రాక్టికాలిటీకి ప్రాధాన్యం ఇచ్చేవారికి ఇంటర్‌సెప్టర్ 650 మెరుగైన ఎంపికగా నిలుస్తుంది.
బైక్‌ను కేవలం రవాణా సాధనంగా కాకుండా, ప్రత్యేకమైన అనుభూతిని ఇచ్చే వాహనంలా చూసేవారికి బేర్ 650 నచ్చుతుంది. ఒక రైడ్‌ పూర్తయిన తర్వాత మరో రైడ్‌కు వెళ్లాలనిపిస్తుంది. సాధారణ రహదారికి బదులుగా కొత్త దారిని ఎంచుకోవాలనిపిస్తుంది. ఆ ఆకర్షణను ధరల పట్టికలోనో, సాంకేతిక వివరాల్లోనో కొలవలేం. అందుకే బేర్ 650 అందరికీ అవసరమైన బైక్ కాకపోయినా, మోటార్‌సైకిల్‌పై ప్రత్యేకమైన అభిరుచి ఉన్నవారికి మాత్రం మనసుకు దగ్గరయ్యే ఎంపికగా నిలవగలదు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
