Raveena Tandon First Sports Car: బాలీవుడ్ నటి రవీనా టాండన్ ఫస్ట్ స్పోర్ట్స్ కార్.. 18 ఏళ్లకే అరుదైన రికార్డ్! అప్పట్లోనే ఆ రేంజ్ క్రేజ్
బాలీవుడ్ అలనాటి స్టార్ హీరోయిన్ రవీనా టాండన్ తన 18వ ఏట కొనుగోలు చేసిన మొదటి స్పోర్ట్స్ కార్ మాజ్డా మియాటా ఫోటోను షేర్ చేశారు. ఈ ఐకానిక్ కన్వర్టిబుల్ కార్ విశేషాలు ఇప్పుడు నెట్టింట వైరల్ అవుతున్నాయి.
Raveena Tandon First Sports Car Mazda Miata: బాలీవుడ్ సీనియర్ నటి రవీనా టాండన్ ఇన్స్టాగ్రామ్ స్టోరీస్లో పోస్ట్ చేసిన ఒక త్రోబ్యాక్ పిక్చర్ ఇప్పుడు ఆటోమొబైల్ లవర్స్ ను విపరీతంగా ఆకట్టుకుంటోంది. సాధారణంగా సెలబ్రిటీలు లగ్జరీ కార్లు కొనడం ఇప్పుడు సర్వసాధారణం, కానీ 1990ల కాలంలోనే ఒక హీరోయిన్ స్పోర్ట్స్ కార్ ను సొంతం చేసుకోవడం అంటే అది విశేషమే. రవీనా షేర్ చేసిన ఫోటోలో ఆమె తెల్లటి టాప్ ధరించి, తన స్నేహితులతో కలిసి ఎరుపు రంగు మాజ్డా మియాటా పక్కన నిలబడి ఉన్నారు. ఆ వయసులో తన సంపాదనతో కొనుగోలు చేసిన ఈ కన్వర్టిబుల్ కార్ అప్పట్లో ఒక ట్రెండ్ సెట్టర్.
మొదటి కారు మారుతి 800..
నిజానికి రవీనా టాండన్ కొన్న మొదటి కారు మాజ్డా మియాటా కాదు. గతంలో ఒక ఇంటర్వ్యూలో ఆమె తన కార్ల ముచ్చట్లు చెబుతూ, కెరీర్ మొదట్లో తాను కొన్న మొదటి కారు మారుతి సుజుకి 800 అని చెప్పారు. ఆ కాలంలో భారతీయులందరి కలల కారుగా ఉన్న మారుతి 800 రవీనాకు కూడా మొదటి వాహనం కావడం విశేషం. ఆ తర్వాత తన ఎదుగుదలకు గుర్తుగా ఈ లగ్జరీ స్పోర్ట్స్ కార్ ను ఆమె తన గ్యారేజీలోకి తెచ్చుకున్నారు.
View this post on Instagram
మాజ్డా మియాటా స్పెషాలిటీ ఏంటి?
ఆటోమొబైల్ చరిత్రలో మాజ్డా మియాటాకు ఒక ప్రత్యేకమైన స్థానం ఉంది. 1989లో చికాగో ఆటో షోలో మొదటిసారిగా పరిచయమైన ఈ కారును జపనీస్ ఫిలాసఫీ అయిన "జింబా ఇట్టాయ్" ఆధారంగా రూపొందించారు. అంటే గుర్రం, స్వారీ చేసే వ్యక్తి ఎలాగైతే ఒకరినొకరు అర్థం చేసుకుంటారో, అలాగే డ్రైవర్ కు కారుకు మధ్య ఒక అవినాభావ సంబంధం ఉండాలనేది దీని అర్థం. అందుకే ఈ కారును నడిపేవారు ఒక గొప్ప అనుభూతిని పొందుతారు. బ్రిటీష్ క్లాసిక్ రోడ్స్టర్ల నుండి స్ఫూర్తి పొంది తయారు చేసిన ఈ కారుకు ఉన్న పాప్-అప్ హెడ్ లైట్లు అప్పట్లో ఒక క్రేజీ ఫీచర్.
పవర్ ఫుల్ ఇంజిన్ - షార్ప్ పెర్ఫార్మెన్స్..
తొలినాళ్లలో వచ్చిన మాజ్డా మియాటా మోడళ్లలో 1.6 లీటర్ ఇంజిన్ ఉండేది. ఇది 115 హెచ్పి పవర్ ను ప్రొడ్యూస్ చేస్తూ, ఫైవ్-స్పీడ్ మాన్యువల్ గేర్ బాక్స్ తో వచ్చేది. లైట్ వెయిట్ డిజైన్ వల్ల ఈ కారు రోడ్లపై చాలా స్పీడ్ గా దూసుకుపోయేది. ఆ తర్వాత 1994లో దీనికి మరింత పవర్ ఫుల్ 1.8 లీటర్ ఇంజిన్ ను జత చేశారు. ఇది 130 హెచ్పి పవర్ ను ఇస్తూ, మెరుగైన బ్రేకింగ్ సిస్టమ్ తో కస్టమర్లను మెప్పించింది. కేవలం స్పీడ్ మాత్రమే కాదు, కారు హ్యాండ్లింగ్ కూడా చాలా స్పోర్టీగా ఉండటం వల్ల డ్రైవింగ్ చేసే వారికి ఎంతో కిక్ ఇచ్చేది.
చాలామంది స్పోర్ట్స్ కార్లను కొన్న కొద్దిరోజులకే మార్చేస్తుంటారు. కానీ మాజ్డా మియాటా విషయంలో మాత్రం యజమానులు దాన్ని ఏళ్ల తరబడి తమ దగ్గరే ఉంచుకుంటారని సర్వేలు చెబుతున్నాయి. రవీనా టాండన్ కూడా తన ఫోటో ద్వారా ఆ కారుతో తనకు ఉన్న ఎమోషనల్ బాండ్ ను గుర్తుచేసుకున్నారు. అప్పట్లో రవీనాకు ఉన్న స్టార్ డమ్ కు ఈ కారు ఒక పర్ఫెక్ట్ మ్యాచ్ అని ఫ్యాన్స్ కామెంట్స్ చేస్తున్నారు. పాత జ్ఞాపకాలు ఎప్పుడూ అందంగానే ఉంటాయనడానికి ఈ ఫోటోనే ఒక నిదర్శనం.
టాప్ హెడ్ లైన్స్
ట్రెండింగ్ వార్తలు
