Nissan CNG SUV: బడ్జెట్ ఫ్రెండ్లీ, మెగా మైలేజ్తో వచ్చిన నిస్సాన్ CNG SUV - మారుతి బ్రెజ్జాకి గట్టి పోటీ
Nissan Magnite CNG SUV: నిస్సాన్, తన పాపులర్ SUV మాగ్నైట్ CNG వేరియంట్ను లాంచ్ చేసింది. దీని ప్రారంభ ఎక్స్-షోరూమ్ ధర రూ. 6.89 లక్షలు. ఆన్-రోడ్ ధర ఇంకొంచం ఎక్కువ ఉంటుంది.
Nissan Magnite CNG SUV Price, Mileage And Features: భారతదేశంలోకి కొత్త, తక్కువ ధర SUV వచ్చింది. నిస్సాన్ ఇండియా, తన హిట్ సబ్-కాంపాక్ట్ SUV మాగ్నైట్ CNG వెర్షన్ను లాంచ్ చేసింది. తక్కువ ఇంధన ఖర్చు, స్టైలిష్ & పవర్ఫుల్ SUV కోరుకునేవాళ్లకు సరిపోయే కార్ ఇది. భారతీయ మార్కెట్లో దీని ఎక్స్-షోరూమ్ ధర (Nissan Magnite CNG SUV ex-showroom price) రూ. 6.89 లక్షల నుంచి ప్రారంభం అవుతుంది.
రెట్రోఫిట్ CNG ఆప్షన్
నిస్సాన్ మాగ్నైట్ CNG అనేది కంపెనీ తయారు చేసిన ప్రత్యేక మోడల్ కాదు. కానీ, ప్రస్తుతం ఉన్న 1.0-లీటర్ పెట్రోల్ ఇంజిన్ వేరియంట్పై డీలర్ స్థాయిలో CNG కిట్ను ఇన్స్టాల్ చేసి డెలివెరీ చేస్తున్నారు. ఈ కిట్ను మోటోజెన్ అందిస్తోంది & ప్రభుత్వం ఆమోదించిన ఫిట్టింగ్ సెంటర్లలో ఇన్స్టాల్ చేస్తారు.
కొత్త మాగ్నైట్ CNGని ఎక్కడ కొనాలి?
ప్రస్తుతం, నిస్సాన్ మాగ్నైట్ CNG దిల్లీ-NCR, హరియాణా, ఉత్తరప్రదేశ్, మహారాష్ట్ర, గుజరాత్, కేరళ & కర్ణాటక రాష్ట్రాల్లో మాత్రమే అందుబాటులో ఉంది. దీని బుకింగ్ జూన్ 1, 2025 నుంచి ప్రారంభమవుతుంది. ఆ తరువాత, ఆంధ్రప్రదేశ్ & తెలంగాణ సహా మిగిలిన రాష్ట్రాల్లోనూ అందుబాటులోకి వస్తుంది.
వ్యయం & అదనపు అంశాలు
నిస్సాన్ మాగ్నైట్ CNG వెర్షన్ కొనుగోలు చేసేవాళ్లు పెట్రోల్ మోడల్ కంటే దాదాపు రూ.75,000 ఎక్కువ ఖర్చు చేయాలి. అయితే, పెట్రోల్తో పోలిస్తే CNG కోసం తక్కువ ఖర్చు, మెరుగైన మైలేజ్ & తక్కువ నిర్వహణ వ్యయం కారణంగా ఈ అదనపు ఖర్చు (రూ.75,000) మొత్తం అతి త్వరలోనే తిరిగి వస్తుంది. ఆ తర్వాత అంతా మిగులే కనిపిస్తుంది.
ఇంజిన్ స్పెసిఫికేషన్లు & మైలేజ్
మాగ్నైట్ CNG 1.0-లీటర్, 3-సిలిండర్ పెట్రోల్ ఇంజిన్తో పవర్ పొందుతుంది, ఇది 72PS శక్తిని & 96Nm టార్క్ను ఉత్పత్తి చేస్తుంది. CNG మోడ్లో కొంచెం తక్కువ పవర్ జనరేట్ కావచ్చు, కానీ పెరిగే మైలేజ్ ఈ లోటును భర్తీ చేయగలదు. నిస్సాన్ మాగ్నైట్ పెట్రోల్ వేరియంట్ల మైలేజ్ మాన్యువల్ & ఆటోమేటిక్ ట్రాన్స్మిషన్తో 17.9 km నుంచి 19.9 km వరకు ఉంటుంది. CNG మోడల్ మైలేజ్ కిలోకు 24 km వరకు ఉంటుంది. ఈ కారు, మారుతి బ్రెజ్జాకు (Maruti Brezza) ప్రత్యామ్నాయంగా ప్రత్యక్ష పోటీ ఇస్తుంది.
టర్బో-CNG వేరియంట్ వస్తుందా?
ప్రస్తుతం, నిస్సాన్ మాగ్నైట్ CNGలో టర్బోచార్జ్డ్ ఇంజిన్ ఆప్షన్ అందుబాటులో లేదు. ప్రస్తుతం, భారత మార్కెట్లో, టాటా నెక్సాన్ CNG మాత్రమే టర్బో-CNG ఇంజిన్తో వస్తుంది. నిస్సాన్ కంపెనీ, మాగ్నైట్ CNGని బేస్ మోడల్ XE నుంచి మిడ్-స్పెక్ XV వరకు మొత్తం 6 పెట్రోల్ వేరియంట్లలో అందుబాటులోకి తెచ్చింది. అంటే, కస్టమర్లు వారి అవసరాలు & బడ్జెట్ ప్రకారం మెరుగైన వేరియంట్ను ఎంచుకోవచ్చు.
టాప్ హెడ్ లైన్స్
ట్రెండింగ్ వార్తలు
