వర్షాకాలంలో కార్ డ్రైవింగ్ అలర్ట్ - ఈ టిప్స్ మీ తెలిస్తేనే ప్రమాదాలకు చెక్, హ్యాపీ జర్నీ
వర్షాకాలంలో కారు నడిపే వారికి కీలక సూచనలు. టైర్లు, బ్రేకులు, బ్యాటరీ, వైపర్లు, నీటిమడుగులు దాటేటప్పుడు తీసుకోవాల్సిన జాగ్రత్తలు తెలుసుకుని సురక్షితంగా ప్రయాణించండి.
Monsoon car care driving tips: దేశంలోని అనేక ప్రాంతాల్లో వర్షాలు జోరుగా కురుస్తున్నాయి. ఎండల నుంచి ఉపశమనం కలిగించే ఈ రుతుపవనాల సీజన్ వాహనదారులకు మాత్రం ఎన్నో సవాళ్లను తీసుకొస్తుంది. తడి రోడ్లు, నీటిగుంతలు, తక్కువ విజిబిలిటీ, ట్రాఫిక్ సమస్యలు, ఆకస్మిక బ్రేక్డౌన్లు డ్రైవింగ్ను ప్రమాదకరంగా మారుస్తాయి. మాన్సూన్లో డ్రైవింగ్ చేసేటప్పుడు కొన్ని జాగ్రత్తలు తీసుకుంటే ప్రమాదాలను తగ్గించుకోవచ్చు.
1. వర్షాకాలంలో కారుకు అత్యంత ముఖ్యమైన భాగం టైర్లు. రోడ్డుతో నేరుగా సంబంధం కలిగి ఉండేది టైర్లే కావడంతో వాటి స్థితి బాగుండాలి. టైర్ల ట్రెడ్ లోతు సరిపడా ఉండాలి. ట్రెడ్ అరిగిపోతే నీరు సరిగా బయటకు వెళ్లక కారుపై నియంత్రణ కోల్పోయే ప్రమాదం ఉంటుంది. అలాగే తయారీ సంస్థ సూచించిన టైర్ ప్రెషర్ను పాటించడం కూడా కీలకం.
2. బ్యాటరీ & ఎలక్ట్రికల్ వ్యవస్థపై ప్రత్యేక శ్రద్ధ అవసరం. అధిక తేమ కారణంగా వైరింగ్లో సమస్యలు తలెత్తే అవకాశం ఉంటుంది. బ్యాటరీ ఛార్జింగ్ స్థాయి, టెర్మినల్స్ పరిస్థితిని పరిశీలించాలి. హారన్, పవర్ విండోలు, వైపర్లు, రియర్ డిఫాగర్ వంటి వ్యవస్థలు సక్రమంగా పనిచేస్తున్నాయో లేదో నిర్ధారించుకోవాలి.
3. వర్షంలో విజిబిలిటీ తగ్గిపోవడం సాధారణం. అందుకే హెడ్లైట్లు, టెయిల్ ల్యాంపులు, ఫాగ్ ల్యాంపులు సరిగా పనిచేస్తున్నాయో తనిఖీ చేయాలి. వైపర్ బ్లేడ్లు గాజుపై గీతలు లేకుండా నీటిని తొలగించగలగాలి. వాషర్ ట్యాంక్లో తగినంత ద్రవం ఉండాలి. గాజుపై పేరుకుపోయిన దుమ్ము, మురికి వెంటనే తొలగించాలి.
4. బ్రేకింగ్ వ్యవస్థ కూడా పూర్తిగా సక్రమంగా ఉండాలి. తడి రోడ్లపై బ్రేకింగ్ దూరం పెరుగుతుంది. అందువల్ల బ్రేక్ ప్యాడ్లు, డిస్కులు, బ్రేక్ ఫ్లూయిడ్ పరిస్థితిని తనిఖీ చేయాలి. నీటిలో ప్రయాణించిన తర్వాత బ్రేక్లను స్వల్పంగా ఉపయోగించడం వల్ల అవి త్వరగా ఆరిపోతాయి & పనితీరు మెరుగుపడుతుంది.
5. తేమ కారణంగా కారులో తుప్పు పట్టే ప్రమాదం ఎక్కువ. కాబట్టి కార్ బాడీపై గీతలు, పెయింట్ ఊడిపోయిన ప్రాంతాలు, తుప్పు మరకలు ఉంటే వెంటనే మరమ్మతులు చేయించాలి. డోర్ సీల్స్, విండో సీల్స్ను కూడా తరచుగా పరిశీలించాలి. డ్రెయిన్ ఛానెల్లలో ఆకులు, చెత్త పేరుకుపోకుండా శుభ్రం చేయాలి.
6. ప్రయాణానికి ముందు ఇంజిన్ ఆయిల్, కూలెంట్, వాషర్ ఫ్లూయిడ్ వంటి ద్రవాలను తనిఖీ చేయాలి. టార్చ్, మొబైల్ చార్జర్, పవర్ బ్యాంక్, టోయింగ్ రోప్, వార్నింగ్ ట్రయాంగిల్, గొడుగు వంటి అత్యవసర వస్తువులను కారులో ఉంచుకోవడం మంచిది. అదనంగా రెయిన్కోట్, పొడి బట్టలు, టవల్, ఫస్ట్ ఎయిడ్ కిట్ కూడా ఉపయోగపడతాయి.
7. వర్షాకాలంలో ఎప్పుడూ సురక్షిత దూరం పాటించాలి. ముందున్న వాహనానికి ఎక్కువ గ్యాప్ ఇవ్వడం వల్ల ఆకస్మిక పరిస్థితుల్లో స్పందించేందుకు సమయం లభిస్తుంది. అధిక వేగం, హఠాత్తుగా స్టీరింగ్ తిప్పడం, ఒక్కసారిగా బ్రేక్ వేయడం వంటి చర్యలను నివారించాలి.
8. నీటిమడుగులు కనిపిస్తే వేగాన్ని తగ్గించాలి. వాటి లోతు ఎంత ఉందో తెలియకుండా దూసుకెళ్లడం ప్రమాదకరం. నీటిలో దాగి ఉన్న గుంతలు, చెత్త లేదా తెరిచి ఉన్న డ్రెయిన్లు ప్రమాదాలకు దారి తీస్తాయి. అధిక వేగంతో నీటిని దాటితే ఆక్వాప్లానింగ్ ప్రమాదం పెరుగుతుంది.
9. ఒకవేళ వరద నీటిలోకి వెళ్లిన తర్వాత కారు ఆగిపోతే మళ్లీ స్టార్ట్ చేయడానికి ప్రయత్నించకూడదు. ముఖ్యంగా పెట్రోల్ లేదా డీజిల్ కార్లలో నీరు ఇంజిన్లోకి చేరితే భారీ నష్టం సంభవించవచ్చు. వెంటనే హజార్డ్ లైట్లు ఆన్ చేసి సురక్షిత ప్రదేశానికి వెళ్లి రోడ్సైడ్ సహాయం కోరాలి.
10. ప్రయాణానికి ముందు వాతావరణం & ట్రాఫిక్ పరిస్థితులను పరిశీలించడం కూడా చాలా ముఖ్యం. ప్రత్యామ్నాయ మార్గాలను గుర్తించుకోవాలి. నీటిమట్టం అధికంగా ఉన్న ప్రాంతాల్లో ప్రయాణాన్ని వాయిదా వేయడం లేదా సురక్షిత ప్రదేశంలో వేచి ఉండడం ఉత్తమం.
సరైన నిర్వహణ, ముందస్తు జాగ్రత్తలు & బాధ్యతాయుతమైన డ్రైవింగ్తో వర్షాకాలంలో కూడా మీ కారు సురక్షితంగా ఉండటమే కాకుండా, మీరు కూడా ప్రమాదాల నుంచి రక్షించుకోవచ్చు.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
Before You Go
Auto Expo 2023 Day 1 Highlights: ఎంతో హైప్ తో మొదలైన ఆటో ఎక్స్ పో మొదటి రోజు హైలైట్స్
టాప్ హెడ్ లైన్స్
ట్రెండింగ్ వార్తలు
