BS6 Modern Diesel Car : బీఎస్6 డీజిల్ కార్ ఓనర్లకు అలర్ట్: డీపీఎఫ్ (DPF) సమస్యతో లక్షల్లో ఖర్చు అయ్యే ఛాన్స్.. ఈ టిప్స్ పాటిస్తే మీ కారు సేఫ్!
ఆధునిక డీజిల్ కార్లలో డీపీఎఫ్ సమస్యలు తలెత్తకుండా ఉండటానికి అనుసరించాల్సిన పద్ధతులు, సిటీ డ్రైవింగ్లో తీసుకోవాల్సిన జాగ్రత్తల గురించి పూర్తి సమాచారం తెలుసుకుందాం..
BS6 Modern Diesel Car Tips: ఇండియాలో డీజిల్ వాహనాలు ఇప్పుడు ఒక కొత్త దశలో ఉన్నాయి. ఐదు ఆరేళ్ల క్రితంతో పోలిస్తే ప్రస్తుత బీఎస్6 (BS6) కాలంలో డీజిల్ ఇంజిన్లు చాలా క్లీన్గా మారుతున్నాయి. సాంకేతికంగా ఇవి ఎంతో అభివృద్ధి చెందినప్పటికీ, వీటి నిర్మాణం చాలా క్లిష్టంగా మారింది. కాలుష్య నియంత్రణ కోసం డీజిల్ పార్టిక్యులేట్ ఫిల్టర్ (DPF), అడ్వాన్స్డ్ ఎగ్జాస్ట్ ట్రీట్మెంట్ సిస్టమ్స్, అడ్బ్లూ (AdBlue) లేదా డీజిల్ ఎగ్జాస్ట్ ఫ్లూయిడ్ (DEF) వంటి టెక్నాలజీలను ఇప్పుడు వాడుతున్నారు. బేసిక్ ఇంజిన్ డిజైన్ మారకపోయినా, దాని చుట్టూ ఉండే ఈ సిస్టమ్స్ వల్ల పెట్రోల్ వాహనాల కంటే డీజిల్ కార్ల మెయింటెనెన్స్ ఇప్పుడు కొంచెం ఎక్కువే అని చెప్పాలి.
అసలు డీపీఎఫ్ (DPF) అంటే ఏమిటి?
ఆధునిక డీజిల్ కార్లలో డీపీఎఫ్ అనేది అత్యంత కీలకమైన భాగం. ఇంజిన్ లోపల డీజిల్ మండేటప్పుడు వచ్చే నల్లటి పొగ (Soot) లేదా కర్బన కణాలను ఇది ఫిల్టర్ చేస్తుంది. ఈ కణాలు ఎగ్జాస్ట్ ద్వారా బయటకు రాకుండా ఈ ఫిల్టర్ ఆపుతుంది. ఓవర్ పీరియడ్ ఆఫ్ టైం ఈ ఫిల్టర్ నిండిపోకుండా ఉండటానికి 'రీజెనరేషన్' (Regeneration) అనే ప్రక్రియ జరుగుతుంది. అంటే ఎగ్జాస్ట్ సిస్టమ్ బాగా వేడెక్కి ఆ నల్లటి కణాలను కాల్చివేస్తుంది. ఇది ఆటోమేటిక్గా జరిగే ప్రక్రియ అయినప్పటికీ, మన డ్రైవింగ్ స్టైల్ దీనిపై ప్రభావం చూపుతుంది.
సమస్యేంటి..?
రీజెనరేషన్ ప్రక్రియ సరిగ్గా జరగాలంటే కారు ఎగ్జాస్ట్ సిస్టమ్ ఒక నిర్ణీత ఉష్ణోగ్రతకు చేరుకోవాలి. మీరు కారును కేవలం సిటీలో, ట్రాఫిక్ జామ్ ఉన్న చోట తక్కువ దూరాలు మాత్రమే నడిపితే ఆ వేడి పుట్టదు. దీనివల్ల ఫిల్టర్ క్రమంగా బ్లాక్ అయిపోతుంది. ఫలితంగా ఇంజిన్ పర్ఫార్మెన్స్ తగ్గిపోవడమే కాకుండా మైలేజీ కూడా పడిపోతుంది.
డీపీఎఫ్ సమస్యల నుండి బయటపడటం ఎలా?
మీరు కారును ఎక్కువగా సిటీలోనే వాడుతుంటే ఈ క్రింది జాగ్రత్తలు తప్పనిసరి అని నిపుణులు సూచిస్తున్నారు.
హైవే డ్రైవ్ చేయండి: వారానికి కనీసం ఒక్కసారైనా మీ కారును హైవే మీదకు తీసుకెళ్లండి. 1,500 నుండి 2,500 ఆర్పీఎమ్ (RPM) మధ్య స్థిరమైన వేగంతో సుమారు 45 నిమిషాల పాటు నడిపితే ఎగ్జాస్ట్ వేడెక్కి ఫిల్టర్ క్లీన్ అవుతుంది.
చిన్న ట్రిప్పులు వద్దు: కారును కేవలం రెండు మూడు కిలోమీటర్ల దూరాల కోసం తరచూ వాడటం వల్ల ఇంజిన్ సరిగ్గా వేడెక్కదు. దీనివల్ల పొగ కణాలు ఫిల్టర్లో త్వరగా పేరుకుపోతాయి. వీలైనంత వరకు చిన్న చిన్న పనులన్నింటినీ కలిపి ఒకే లాంగ్ డ్రైవ్లో పూర్తి చేయండి.
వార్నింగ్ లైట్స్ గమనించండి: కారు డ్యాష్బోర్డ్లో డీపీఎఫ్ లైట్ వెలుగుతుంటే నిర్లక్ష్యం చేయవద్దు. వెంటనే హైవే మీదకు వెళ్లి నిర్ణీత వేగంతో నడిపితే ఆ సమస్య పోతుంది. ఫిల్టర్ పూర్తిగా పాడైపోతే దానిని మార్చడానికి లక్ష రూపాయల పైనే ఖర్చవుతుంది. కేవలం ప్రొఫెషనల్ క్లీనింగ్ చేయించాలన్నా రూ. 15,000 నుండి రూ. 25,000 వరకు అవుతుంది.
మంచి ఇంధనం, అడ్బ్లూ: నమ్మకమైన పెట్రోల్ బంకుల్లోనే డీజిల్ కొట్టించండి. కల్తీ లేని ఇంధనం వల్ల పొగ తక్కువగా వస్తుంది. అలాగే మీ కారులో అడ్బ్లూ (DEF) ట్యాంక్ ఉంటే దానిని ఎప్పటికప్పుడు నింపుతూ ఉండాలి.
మోడర్న్ డీజిల్ కారును సరైన పద్ధతిలో నడిపితేనే అది లాంగ్ లైఫ్ ఇస్తుంది. కేవలం సిటీ డ్రైవింగ్ కోసమే అయితే పెట్రోల్ లేదా ఈవీ మోడళ్లు తీసుకోవడం మంచిది.
టాప్ హెడ్ లైన్స్
ట్రెండింగ్ వార్తలు
