MG Windsor vs Tata Punch: కొత్త ఎంజీ విండ్సర్, టాటా పంచ్ ఎలక్ట్రిక్ కార్లలో ఏదీ కొంటే బెటర్‌?
MG Windsor EV:ఎంజీ విండ్సర్ ఎలక్ట్రిక్ కొద్ది రోజుల క్రితమే మార్కెట్‌లో విడుదల అయ్యింది. ఈ కారు నేరుగా టాటా పంచ్ ఈవీకి గట్టి పోటీని ఇస్తుంది. ఈ రెండు కార్లకు సంబంధించిన కీలక తేడాలపై ఓ లుక్కేయండి!
MG Windsor EV Vs Tata Punch EV: తాజాగా ఎంజీ మోటార్స్‌ నుంచి విండ్సర్ ఈవీ మార్కెట్‌లో విడుదల అయ్యింది. ఈ కారు మార్కెట్‌లోని టాటా కార్లకు గట్టి పోటీని ఇవ్వనుంది. ఈ కారుని చాలా తక్కువ ధరలో, ఎక్కువ ఫీచర్లు, ఇతర స్పెసిఫికేషన్స్‌ అందించి ఆశ్చర్యానికి గురిచేస్తోంది. మిడిల్‌ క్లాస్ కస్టమర్లను సైతం ఆకట్టుకునేలా ఈ కారుని కంపెనీ విడుదల చేసింది. అయితే ఈ కారులోని బ్యాటరీకి అద్దె ప్రతిపాదికన చెల్లించాల్సి ఉంటుంది. ఇది మీకు అదనపు ఖర్చుగా అవుతుంది. ఇందుకోసం కిలోమీటరుకు రూ .3.50 చెల్లించాల్సి ఉంటుంది. ఈ కారు ప్రారంభ ధర రూ .9.99 లక్షలుగా కంపెనీ నిర్ణయించింది. ఈ కారుని కొనుగోలు చేసిన 3 సంవత్సరాల తర్వాత బైబ్యాక్ ప్లాన్‌లో భాగంగా 60 శాతం సొమ్ముని తిరిగి పొందవచ్చు. ఈ కారుకి ప్రత్యామ్నాయంగా భావిస్తున్న టాటా పంచ్‌కి ఈ సరికొత్త ఈవీకి మధ్య ఉండే కీలక తేడాలపై ఓ లుక్కేయండి.
డిజైన్‌లో ఏది పెద్దది?
సరికొత్త విండ్సర్ ఈవీ 4295 మిమీ పొడవు, 2126 మిమీ వెడల్పుతో వస్తుంది. అదే టాటా పంచ్ ఈవీ 3857 మిమీ పొడవు, 1742 మిమీ వెడల్పుతో పరిమాణంలో ఎంజీతో పోలిస్తే చిన్నగా ఉంటుంది. రెండు ఎలక్ట్రిక్ వాహనాలు ఏరో ఎఫిషియెన్సీ వీల్స్, లైట్ బార్లను కలిగి ఉన్నాయి. విండ్సర్ ఈవీ సరికొత్త అవతారంలో CUV (క్రాసోవర్ యుటిలిటీ వెహికిల్‌)గా వస్తుంది. టాటా పంచ్ ఈవీ మినీ ఎస్‌యూవీగా అందుబాటులో ఉంది. ఇక పంచ్ ఈవీ 2445 మిమీ వీల్‌బేస్‌, విండ్సర్ ఈవీ 2700 మిమీ వీల్ బేస్‌తో వస్తుంది.
ఏ కారులో ఎక్కువ ఫీచర్లు ఉన్నాయి?
విండ్సర్ ఈవీలో పవర్డ్ డ్రైవర్ సీటు, 15.6 అంగుళాల భారీ టచ్‌స్క్రీన్‌, డిజిటల్ డ్రైవర్ డిస్ప్లే, 360 డిగ్రీల కెమెరా, 9-స్పీకర్ ఆడియో సిస్టమ్, ఫిక్స్డ్ గ్లాస్ పనోరమిక్ రూఫ్, 135 డిగ్రీల రెక్లైన్‌ రియర్ సీట్ల టెక్నాలజీతో వస్తుంది. ఇక పంచ్ ఈవీలో వెంటిలేటెడ్ సీట్లు, 360 డిగ్రీల కెమెరా, స్టాండర్డ్ సన్ రూఫ్, ఎయిర్ ప్యూరిఫైయర్, 10.25 అంగుళాల స్క్రీన్ వంటి ఫీచర్లు ఉన్నాయి.
ఏ కారు ఎక్కువ రేంజ్ అందిస్తుంది?
ఎంజీ విండ్సర్ 38 కిలోవాట్ల LFP బ్యాటరీ ప్యాక్ ఆప్షన్‌తో వస్తుంది. అయితే ఇది 331 కి.మీ రేంజ్ అందిస్తుందని కంపెనీ పేర్కొంది. దీనిలోని సింగిల్ ఫ్రంట్ మోటార్ 136 bhp పవర్, 200 nm టార్క్‌ని ఉత్పత్తి చేస్తుంది. పంచ్ ఈవీ రెండు బ్యాటరీ ప్యాక్స్‌ ఆప్షన్స్‌తో వస్తుంది. ఇందులోని 25 కిలోవాట్ల బ్యాటరీ 315 కిలోమీటర్లు, 35 కిలోవాట్ల బ్యాటరీ ప్యాక్ 421 కిలోమీటర్ల రేంజ్‌ని అందిస్తుంది. ఇందులోని మోటార్ 122 bhp పవర్, 190 nm గరిష్ట టార్క్‌ని విడుదల చేస్తుంది.
ఏ కారు కొంటే బెటర్‌?
పంచ్ ఈవీ ధర రూ .9.99 లక్షల నుంచి రూ .13.7 లక్షల (ఎక్స్-షోరూమ్‌) మధ్య ఉండగా.. ఎంజి విండ్సర్ ప్రారంభ ధర రూ .9.99 లక్షలు లేదా బ్యాటరీ ఖర్చుతో సుమారు రూ .12 లక్షలు (ఎక్స్-షోరూమ్‌) ధరతో అందుబాటులో ఉంటుంది. పంచ్ ఈవీ ఎక్కువ రేంజ్‌ని అందిస్తుంది. అయితే విండ్సర్ ఈవీలో బూట్‌ స్పేస్‌ ఎక్కువగా ఉంటుంది. ఇక దీనిలోని ఫీచర్లు, బిగ్‌ ఇంటీరియర్ స్పేస్‌తో పాటు బైబ్యాక్ స్కీమ్స్‌ అదనపు ప్రయోజనాలను అందిస్తాయి. కావున సరికొత్త ఎంజీ ఎలక్ట్రిక్ కారుని నిరభ్యంతరంగా ట్రై చేయవచ్చు.
టాప్ హెడ్ లైన్స్
ట్రెండింగ్ వార్తలు
