Fortuner, Kodiaqకి పోటీగా MG Majestor: టీజర్ రిలీజ్ - లుక్, ఫీచర్లు, లాంచ్ డేట్ ఇవే!
JSW MG Motor India విడుదల చేసిన MG మాజెస్టర్ టీజర్ వీడియో ఆకట్టుకుంటోంది. ఫిబ్రవరి 12న లాంచ్ కానున్న ఈ SUV, Fortuner, Kodiaqలకు గట్టి పోటీ ఇవ్వనుంది.
MG Majestor SUV Details Telugu: భారత్లో ఫుల్సైజ్ SUV సెగ్మెంట్ మరింత హీట్ ఎక్కుతోంది. ఇప్పటికే Toyota Fortuner, Skoda Kodiaq లాంటి బలమైన మోడళ్లున్న ఈ సెగ్మెంట్లోకి ఇప్పుడు ఎంజీ మాజెస్టర్ (MG Majestor) ఎంట్రీ ఇవ్వబోతోంది. ఫిబ్రవరి 12న అధికారికంగా లాంచ్ కావడానికి ముందు, JSW MG Motor India, ఈ SUV టీజర్ వీడియోను విడుదల చేసింది. ఈ వీడియోలో పూర్తిగా బయట డిజైన్ మాత్రమే చూపించారు.
MG లైనప్లో, ICE విభాగంలో ఫ్లాగ్షిప్ మోడల్గా ఉన్న MG Gloster కంటే పై స్థాయిలో ఈ మాజెస్టర్ను ప్లేస్ చేయనున్నారు. అంటే ధర, ఫీచర్లు, రోడ్ ప్రెజెన్స్ అన్నీ కూడా మరింత ప్రీమియంగా ఉండబోతున్నాయన్న మాట.
బయట డిజైన్ హైలైట్స్
టీజర్ వీడియోలో కనిపించిన MG మాజెస్టర్ లుక్ చూస్తే మొదట ఆకట్టుకునేది దాని భారీ ఫ్రంట్ గ్రిల్. మధ్యలో పెద్దగా MG లోగో పెట్టి, కింద భాగంలో సిల్వర్ కలర్ స్కిడ్ ప్లేట్ ఇచ్చారు. ఈ డిజైన్ SUVకి గట్టి, రఫ్ అండ్ టఫ్ లుక్ను ఇస్తోంది.
ముందు భాగంలో L-షేప్ LED DRLs ఇచ్చారు. ఇవి కనెక్ట్ కాకుండా విడిగా ఉండటం గమనించవచ్చు. హెడ్ల్యాంప్స్ను మాత్రం వర్టికల్గా స్టాక్ చేసిన LED యూనిట్లుగా డిజైన్ చేశారు. ఇది ప్రస్తుతం మార్కెట్లో ఉన్న చాలా SUVలతో పోలిస్తే మాజెస్టర్కు ప్రత్యేక గుర్తింపును ఇస్తుంది.
సైడ్ ప్రొఫైల్లో కనిపించిన మషీన్డ్ ఫినిష్ అలాయ్ వీల్స్ సుమారు 19 అంగుళాల సైజ్లో ఉండే అవకాశం ఉంది. టీజర్లో బ్లాక్ కలర్ బాడీ షేడ్ చూపించడంతో SUV మరింత ప్రీమియంగా కనిపిస్తోంది.
Auto Expo 2025లో ప్రదర్శన
MG మాజెస్టర్ను ఇప్పటికే Auto Expo 2025లో ప్రదర్శించారు. అయితే అప్పట్లో ఇంటీరియర్ను మాత్రం బయటకు చూపించలేదు. అయినా, అంచనాల ప్రకారం ఇందులో 12.3 అంగుళాల డిజిటల్ డ్రైవర్ డిస్ప్లే, 12.3 అంగుళాల టచ్ ఇన్ఫోటైన్మెంట్ స్క్రీన్, వైర్లెస్ చార్జర్, పానోరమిక్ సన్రూఫ్, 360 డిగ్రీ కెమెరా, పవర్డ్ సీట్లు, ఆటోమేటిక్ క్లైమేట్ కంట్రోల్, మల్టిపుల్ డ్రైవ్ మోడ్స్ వంటి ఫీచర్లు ఉండే అవకాశం ఉంది.
ఇంజిన్, గేర్బాక్స్ వివరాలు
MG మాజెస్టర్లో ఏ ఇంజిన్ ఆప్షన్లు ఇస్తారన్న విషయంపై కంపెనీ ఇంకా స్పష్టత ఇవ్వలేదు. కానీ, ఇందులో MG Glosterలో ఉన్న 2.0 లీటర్ ఫోర్ సిలిండర్ ట్విన్ టర్బో డీజిల్ ఇంజిన్నే ఉపయోగించే అవకాశం ఎక్కువగా కనిపిస్తోంది. ఈ ఇంజిన్ 215hp పవర్, 478Nm టార్క్ ఇస్తుంది. దీనికి 8-స్పీడ్ ఆటోమేటిక్ గేర్బాక్స్ జతచేసి, ఫోర్ వీల్ డ్రైవ్ (4WD) సిస్టమ్తో అందించవచ్చు.
అయితే, Glosterలో లభించే 161hp సింగిల్ టర్బో డీజిల్ ఇంజిన్ మాజెస్టర్లో ఉండే అవకాశాలు తక్కువగా ఉన్నాయి.
అంచనా ధరలు
MG మాజెస్టర్ ధరలు MG Gloster కంటే ఎక్కువగా ఉండనున్నాయి. ప్రస్తుతం Gloster ఎక్స్-షోరూమ్ ధరలు రూ. 38.33 లక్షల నుంచి రూ. 43.16 లక్షల వరకు ఉన్నాయి. అదే సమయంలో Toyota Fortuner ధరలు రూ. 34.16 లక్షల నుంచి రూ. 49.59 లక్షల వరకు, Skoda Kodiaq ధరలు రూ. 39.99 లక్షల నుంచి రూ. 43.76 లక్షల వరకు ఉన్నాయి.
ఈ లెక్కన చూస్తే, MG మాజెస్టర్ ధర రూ. 45 లక్షల పైగానే ప్రారంభమయ్యే అవకాశం ఉందని ఆటో రంగ నిపుణులు అంచనా వేస్తున్నారు.
మొత్తానికి, ఫిబ్రవరి 12న లాంచ్ కానున్న MG మాజెస్టర్... డిజైన్, ఫీచర్లు, రోడ్ ప్రెజెన్స్ పరంగా Fortuner, Kodiaqలకు గట్టి పోటీ ఇవ్వడానికి సిద్ధమవుతోంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
Before You Go
Auto Expo 2023 Day 1 Highlights: ఎంతో హైప్ తో మొదలైన ఆటో ఎక్స్ పో మొదటి రోజు హైలైట్స్
టాప్ హెడ్ లైన్స్
ట్రెండింగ్ వార్తలు
