రూ.10 లక్షల్లోపు పాపులర్‌ సెడాన్లు - మారుతి డిజైర్, హోండా అమేజ్ టాప్ వేరియంట్ల కంపారిజన్‌
మారుతి డిజైర్ ZXi+ & హోండా అమేజ్ ZX టాప్ వేరియంట్ల ధర, మైలేజ్, ఫీచర్లు, సేఫ్టీ, ఇంజిన్ వివరాల పూర్తి పోలిక ఇది. మీకు సరైన సెడాన్ ఏదో తెలుసుకోండి.
Maruti Dzire vs Honda Amaze: మన దేశంలో అందుబాటు ధరలో లభించే పాపులర్‌ సెడాన్లలో మారుతి డిజైర్ & హోండా అమేజ్ ముందు వరుసలో ఉంటాయి. ఈ రెండు కార్ల టాప్ వేరియంట్లు అయిన "డిజైర్ ZXi+" & "అమేజ్ ZX" ధరలు కూడా దాదాపు రూ.10 లక్షల పరిధిలోనే ఉన్నాయి. వీటిలో 1.2 లీటర్ పెట్రోల్ ఇంజిన్లు, మంచి ఫీచర్లు ఉన్నాయి. అయితే ధర, మైలేజ్, పనితీరు & సేఫ్టీ విషయంలో కొన్ని కీలక భేదాలున్నాయి.
పరిమాణంలో ఈ రెండు కార్లు దాదాపు ఒకేలా ఉంటాయి. డిజైర్ పొడవు 3,995mm. అమేజ్ పొడవు కూడా 3,995mm. డిజైర్ వెడల్పు 1,735mm కాగా, అమేజ్ వెడల్పు 1,733mm. డిజైర్ ఎత్తు 1,525mm. అమేజ్ ఎత్తు 1,500mm.
వీల్‌బేస్ విషయంలో అమేజ్ కాస్త ముందుంది, దీని వీల్‌బేస్ 2,470mm. డిజైర్‌లో ఇది 2,450mm. గ్రౌండ్ క్లియరెన్స్ డిజైర్‌లో 163mm. అమేజ్‌లో 172mm. బూట్ స్పేస్ కూడా అమేజ్‌కు పెద్ద ప్లస్. ఇందులో 416 లీటర్ల బూట్ స్పేస్ ఉంది. డిజైర్‌లో ఇది 382 లీటర్లు మాత్రమే. అంటే అమేజ్‌లో 34 లీటర్ల అదనపు స్థలం లభిస్తుంది. అంతేకాదు, అమేజ్ వెనుక సీట్లను మడిచి అదనపు లగేజీని కూడా తీసుకెళ్లవచ్చు.
ఇంజిన్ విషయానికి వస్తే, 1.2 లీటర్, 3 సిలిండర్ NA పెట్రోల్ ఇంజిన్ ఉంది. ఇది 82hp పవర్ & 112Nm టార్క్‌ను ఉత్పత్తి చేస్తుంది. అమేజ్‌లో 1.2 లీటర్, 4 సిలిండర్ పెట్రోల్ ఇంజిన్ ఉంటుంది. ఇది 90hp పవర్ & 110Nm టార్క్‌ను అందిస్తుంది. అంటే.. అమేజ్‌కు డిజైర్ కంటే 8hp ఎక్కువ పవర్ ఉంది. అయితే టార్క్ విషయంలో డిజైర్ 2Nm ముందుంది. డిజైర్ ఇంజిన్ తక్కువ RPM వద్దనే మంచి టార్క్‌ను అందిస్తుంది. దీంతో నగరంలో డ్రైవింగ్ చేయడం సులభంగా అనిపిస్తుంది. అమేజ్ ఇంజిన్ మాత్రం 2,000rpm కంటే తక్కువ వద్ద కొంత బలహీనంగా అనిపించినా.. మధ్యస్థాయి RPMల్లో మంచి పనితీరును అందిస్తుంది.
ఇది కూడా చదవండి: రూ.50,000 డౌన్ పేమెంట్ చేసి Maruti Swift కారును తీసుకెళ్లండి, EMI పూర్తి వివరాలు
రెండు కార్లలోనూ 5 స్పీడ్ మాన్యువల్ గేర్‌బాక్స్ ఉంది. డిజైర్‌లో 5 స్పీడ్ AMT ఆటోమేటిక్ ఇవ్వగా, అమేజ్‌లో CVT ఆటోమేటిక్ గేర్‌బాక్స్ ఇచ్చారు. AMT గేర్ మార్పుల్లో కొంత ఆలస్యం కనిపిస్తుంది, అమేజ్ CVT మాత్రం మరింత స్మూత్‌గా పనిచేస్తుంది. అయితే వేగంగా యాక్సిలరేట్ చేసినప్పుడు CVTలో సాధారణంగా కనిపించే రబ్బర్‌బ్యాండ్ ప్రభావం ఉంటుంది.
మైలేజ్ విషయంలో మాత్రం డిజైర్ స్పష్టమైన ఆధిక్యంలో ఉంది. డిజైర్ మాన్యువల్ వెర్షన్ 24.79kmpl & AMT వెర్షన్ 25.71kmpl ఇస్తుందని కంపెనీ చెబుతోంది. అమేజ్ మాన్యువల్ వెర్షన్ 18.65kmpl & CVT వెర్షన్ 19.46kmpl మైలేజ్ ఇస్తుందని ఆ కంపెనీ వెల్లడించింది. అంటే ఆటోమేటిక్ వెర్షన్లలో డిజైర్ ఏకంగా 6.25kmpl ఎక్కువ మైలేజ్ ఇస్తుంది.
ఎక్స్‌టీరియర్ ఫీచర్లలో రెండు కార్ల టాప్ వేరియంట్లలో LED లైటింగ్, 15 అంగుళాల అల్లాయ్ వీల్స్ & పవర్డ్ ORVMs ఉన్నాయి. అమేజ్‌లో ప్రొజెక్టర్ LED హెడ్‌లైట్లు & ఫాగ్ ల్యాంప్స్ ఉన్నాయి. రెండు కార్లలోనూ LED టెయిల్ లైట్లు & డేటైమ్ రన్నింగ్ ల్యాంప్స్ ఉంటాయి.
ఇంటీరియర్ ఫీచర్లలో డిజైర్‌కు కొన్ని ప్రత్యేక ప్రయోజనాలు ఉన్నాయి. ఇందులో 9 అంగుళాల ఇన్ఫోటైన్‌మెంట్ స్క్రీన్ ఉంది. అమేజ్‌లో 8 అంగుళాల స్క్రీన్ ఉంటుంది. రెండు కార్లలోనూ వైర్‌లెస్ ఆండ్రాయిడ్ ఆటో & యాపిల్ కార్‌ప్లే, 6 స్పీకర్ల ఆడియో సిస్టమ్, వైర్‌లెస్ ఫోన్ ఛార్జర్, ఆటోమేటిక్ క్లైమేట్ కంట్రోల్ & క్రూయిజ్ కంట్రోల్ ఉన్నాయి.
ఇది కూడా చదవండి: RE Hunter 350 ఫైనాన్స్ ఆప్షన్లు - తెలుగు రాష్ట్రాల్లో హంటర్ 350 ధర, బెస్ట్‌ EMI ప్లాన్స్ ఇవే!
డిజైర్‌లో సింగిల్ పేన్ సన్‌రూఫ్ కూడా ఉంది. ఈ ఫీచర్ అమేజ్‌లో లేదు. అలాగే డిజైర్‌లో టెలిస్కోపిక్ స్టీరింగ్ సర్దుబాటు ఉంది. అమేజ్‌లో CVT వేరియంట్‌కు ప్యాడిల్ షిఫ్టర్లు ఉన్నాయి, డిజైర్ AMTలో ఈ ఫీచర్ లేదు.
సేఫ్టీ విషయంలో రెండు కార్లూ బలంగా ఉన్నాయి. రెండింటికీ భారత్ NCAPలో 5 స్టార్ క్రాష్ సేఫ్టీ రేటింగ్ ఉంది. రెండు కార్లలోనూ 6 ఎయిర్‌బ్యాగ్స్, డ్యూయల్ ఛానల్ స్థాయి భద్రతా వ్యవస్థ, టైర్ ప్రెజర్ మానిటరింగ్, హిల్ హోల్డ్ అసిస్ట్ & ESC ఉన్నాయి.
అయితే అమేజ్‌లో లెవల్ 1 ADAS ఉంది. ఈ విభాగంలో ఇది ప్రత్యేకమైన ఫీచర్. మరోవైపు డిజైర్‌లో 360 డిగ్రీ కెమెరా ఉంది. అమేజ్‌లో రియర్ కెమెరాతో పాటు ఎడమ ORVMపై LaneWatch కెమెరా ఉంటుంది.
ధర విషయంలో డిజైర్‌కు స్పష్టమైన ఆధిక్యం ఉంది. డిజైర్ ZXi+ మాన్యువల్ ధర రూ.8.96 లక్షలు. AMT ధర రూ.9.41 లక్షలు. హోండా అమేజ్ ZX మాన్యువల్ ధర రూ.9.39 లక్షలు. CVT ధర రూ.10 లక్షలు. అంటే ఆటోమేటిక్ వెర్షన్‌లో డిజైర్ ఏకంగా దాదాపు రూ.59,000 తక్కువ ధరకే వస్తుంది.
తక్కువ ధర, మెరుగైన మైలేజ్, మంచి లో-ఎండ్ టార్క్, సన్‌రూఫ్ & 360 డిగ్రీ కెమెరా కావాలనుకునేవాళ్లకు మారుతి డిజైర్ మంచి ఎంపిక. ఎక్కువ పవర్, పెద్ద బూట్ స్పేస్, CVT సౌకర్యం & లెవల్ 1 ADAS కావాలనుకునేవారికి అమేజ్ మ్యాచ్‌ అవుతుంది.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
