హీరో డెస్టిని 110 పెర్ఫార్మెన్స్‌ టెస్ట్‌: నగర ప్రయాణాలకు సరైన స్కూటరేనా? బ్రేకింగ్, స్పీడ్‌ పూర్తి విశ్లేషణ

Hero Destini 110 performance:హీరో డెస్టిని 110 యాక్సిలరేషన్, రోల్ ఆన్ వేగం, బ్రేకింగ్ పనితీరు ఎలా ఉంది? ధర ఎంత? హైదరాబాద్, విజయవాడ ధరలతో పూర్తి వివరాలు ఇక్కడ తెలుసుకోండి.

హీరో డెస్టిని 110 పెర్ఫార్మెన్స్‌కు అసలైన పరీక్ష - సిటీ యూజ్‌ కోసం ఎంతవరకు సరిపోతుంది?

Source : Social Media

Show Quick Read

Key points generated by AI, verified by newsroom

• హీరో డెస్టిని 110: 110.9cc ఇంజిన్ 8.1hp, 8.7Nm టార్క్ ఉత్పత్తి చేస్తుంది.
• 0-60kmph వేగం 8.59 సెకన్లు, నగర ప్రయాణాలకు తగిన పనితీరు.
• బ్రేకింగ్ 60-0kmph 20.62 మీటర్లు, అత్యవసరాల్లో జాగ్రత్త అవసరం.
• ధర రూ.72,000 నుంచి రూ.79,750, రెండు వేరియంట్లలో లభ్యం.

Hero Destini 110 performance: తెలుగు రాష్ట్రాల్లో, 125cc కంటే 110cc స్కూటర్లకే మంచి డిమాండ్ ఉంది. ముఖ్యంగా నగరాల్లో రోజువారీ ప్రయాణాలకు తక్కువ ఖర్చుతో, సౌకర్యంగా తీసుకెళ్లే వాహనం కావాలనుకునే వారికి ఇది మంచి ఆప్షన్‌. ఈ క్రమంలో, నిజమైన రోడ్డు పరిస్థితుల్లో హీరో డెస్టిని 110 పనితీరు ఎలా ఉందో తెలుసుకోవడానికి ఆటో ఎక్స్‌పర్ట్‌లు ఈ స్కూటర్‌ను టెస్ట్‌ డ్రైవ్‌ చేశారు.

ఇంజిన్ & ఫీచర్లు

హీరో డెస్టిని 110లో 110.9cc, సింగిల్ సిలిండర్, ఎయిర్ కూల్డ్ ఇంజిన్ అందించారు. ఈ ఇంజిన్ 7,250 rpm వద్ద 8.1 hp శక్తిని, 5,750 rpm వద్ద 8.7 Nm టార్క్‌ను ఉత్పత్తి చేస్తుంది. 12 ఇంచుల అలాయ్ వీల్స్‌తో వస్తుంది. హీరో ప్రత్యేకంగా అందించే i3S టెక్నాలజీ ఇందులో ఉంది. ట్రాఫిక్‌ సిగ్నల్ లేదా ఎక్కడైనా బండిని కొన్ని సెకన్లు ఆపితే ఇంజిన్ దానంతట అదే ఆఫ్ అవుతుంది. థ్రాటిల్ తిప్పి బ్రేక్ వదిలితే మళ్లీ స్టార్ట్ అవుతుంది. దీనివల్ల ఇంధనం ఆదా అవుతుంది.

యాక్సిలరేషన్ టెస్ట్ ఫలితాలు

ఎక్స్‌పర్ట్‌లు ఈ బండిని పరీక్షించే సమయంలో వాతావరణ పరిస్థితులు పొడిగానే ఉన్నాయి. డెస్టిని 110 0 నుంచి 40 కి.మీ. వేగాన్ని 3.83 సెకన్లలో చేరింది. 0 నుంచి 60 కి.మీ. వేగానికి 8.59 సెకన్లు పట్టింది. 0 నుంచి 80 కి.మీ. వేగానికి 18.18 సెకన్లు తీసుకుంది.

నగర ప్రయాణాలకు ఇది సరిపడే పనితీరు అందిస్తుంది. 30 నుంచి 60 కి.మీ. వేగం మధ్య రైడింగ్ చేస్తే స్కూటర్ మంచి స్పందన ఇస్తుంది. హైవే మీద కూడా క్రూయిజ్ వేగం అందుకుంటుంది కానీ ఓవర్‌టేక్ చేసే సమయంలో కొంత ప్లానింగ్ అవసరం.

రోల్ ఆన్ యాక్సిలరేషన్

20 నుంచి 50 కి.మీ. వేగానికి 4.74 సెకన్లు పట్టింది. 30 నుంచి 70 కి.మీ. వేగానికి 11.56 సెకన్లు తీసుకుంది. పవర్ డెలివరీ లీనియర్‌గా ఉంటుంది. థ్రాటిల్ స్పందన సాఫ్ట్‌గా ఉండటంతో కొత్త రైడర్లకు, పెద్దవారికి సులభంగా నియంత్రించగలిగే విధంగా ఉంది.

అయితే అధిక వేగాల్లో ఫ్లోర్‌బోర్డ్ వద్ద స్వల్ప వైబ్రేషన్లు కనిపిస్తాయి. నగర ప్రయాణాల్లో మాత్రం స్మూత్ అనుభూతి ఇస్తుంది.

బ్రేకింగ్ పనితీరు

టాప్ ZX వేరియంట్ ముందు డిస్క్ బ్రేక్‌తో వస్తుంది. 60 నుంచి 0 కి.మీ. వేగానికి ‍‌(పూర్తిగా) ఆగేందుకు 20.62 మీటర్ల దూరం తీసుకుంది. బ్రేకింగ్ సెట్‌అప్ నగర ప్రయాణాలకు సరిపోతుంది. అత్యవసర పరిస్థితుల్లో రెండు బ్రేక్ లీవర్లు ఒకేసారి బలంగా పట్టుకుంటే ముందు చక్రం లాక్ అయ్యే అవకాశం ఉంది. కాబట్టి జాగ్రత్త అవసరం.

వేరియంట్లు & ధర

హీరో డెస్టిని 110 ధర రూ.72,000 నుంచి ప్రారంభమై రూ.79,750 వరకు ఉంది (ఎక్స్‌-షోరూమ్‌ ధర). హైదరాబాద్‌లో ఆన్ రోడ్ ధర సుమారు రూ.85,000 నుంచి ప్రారంభమయ్యే అవకాశం ఉంది. విజయవాడలో కూడా ఇదే స్థాయిలో ఉంటుంది. ఖచ్చితమైన ధర కోసం సమీప డీలర్‌ను సంప్రదించడం మంచిది.

ఇది రెండు వేరియంట్లలో అందుబాటులో ఉంది. టాప్ ZX వేరియంట్‌లో ముందు డిస్క్ బ్రేక్, పిలియన్ బ్యాక్‌రెస్ట్ ఉన్నాయి. రెండు వేరియంట్లలో డిజి అనలాగ్ డ్యాష్ అందించారు. మొత్తం ఐదు కలర్ ఆప్షన్లు ఉన్నాయి. VX వేరియంట్ బ్లాక్, బ్లూ, వైట్ రంగుల్లో వస్తుంది. ZX వేరియంట్ గ్రే, రెడ్ రంగుల్లో అందుబాటులో ఉంటుంది.

మొత్తానికి రోజువారీ నగర ప్రయాణాలకు సౌకర్యంగా, సింపుల్ పనితీరు కావాలనుకునే వారికి హీరో డెస్టిని 110 సరైన ఎంపికగా కనిపిస్తోంది. ఇంధన పొదుపు, సౌకర్యవంతమైన రైడింగ్, తక్కువ నిర్వహణ ఖర్చు వంటి అంశాలు దీనికి ప్లస్ పాయింట్లు.

ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.

 

మరిన్ని చదవండి

హీరో డెస్టిని 110 మైలేజ్‌ టెస్ట్‌ - నిజంగా సిటీలో ఎంత ఇస్తుంది? హైవే ఎక్కితే ఎంత వస్తుంది?

TVS Radeon నుంచి Hero HF 100 వరకు ఫుల్‌ట్యాంకుతో 750 కి.మీ రేంజ్.. రూ.60 వేలకే 5 బెస్ట్ మైలేజ్ బైక్స్