EV Battery: ఎడారిలో ఎలక్ట్రిక్ కారు బ్యాటరీ డౌన్.. తెలివిగా ఆలోచించి పరిష్కారాన్ని కనిపెట్టిన డ్రైవర్
శాండ్రో వాన్ కుయిజ్క్ అనే ఒక యూట్యూబర్ అటకామా ఎడారిలో ప్రయాణిస్తుండగా కారు బ్యాటరీ అయిపోయింది. ఆ తర్వాత solar panels ఉపయోగించాడు.
ఈ మధ్య కాలంలో ఎలక్ట్రిక్ కార్లు, టూవీలర్లకు డిమాండ్ బాగా పెరిగింది. కానీ వీటితో జర్నీ అంటే బ్యాటరీ ఎక్కడ అయిపోతుందోననే టెన్షన్ కూడా ఉంటుంది. ముఖ్యంగా మీరు అటవీ ప్రాంతం, ఎడారి వంటి నిర్జన ప్రదేశంలో ఉన్నప్పుడు ఈ సమస్య మరింత తీవ్రం అనిపిస్తుంది. ఇటీవల ఇలాంటి ఆసక్తికరమైన సంఘటన ఒకటి జరిగింది. ఒక వ్యక్తి తన ఎలక్ట్రిక్ కారులో ప్రయాణిస్తుండగా మధ్య ఎడారిలో ఆగిపోయినప్పటికీ, తన తెలివితేటలతో ఆ కష్టం నుండి బయటపడే మార్గాన్ని గుర్తించాడు.
శాండ్రో వాన్ కుయిజ్క్ అనే యూట్యూబర్ చిలీలోని అటాకామా ఎడారి (Atacama Desert) నుంచి ప్రయాణిస్తుండగా, అతని ఎలక్ట్రిక్ కార్ బ్యాటరీ అయిపోయింది. అతను సహాయం కోసం చాలా మందికి ఫోన్ చేసినా ప్రయోజనం లేకపోయింది. అంత దూరం కావడంతో ఎవరూ సహాయం చేయడానికి రాలేదు. దిక్కుతోచని స్థితిలో యూట్యూబర్ అక్కడే ఆగిపోయి ఇబ్బంది పడ్డాడు.
కారులో లభించే సౌకర్యాలు
చిలీలోని అటాకామా ఎడారిలో శాండ్రో కారు బ్యాటరీ ఒక్కసారిగా డెడ్ అయిపోయింది. అప్పుడు బ్యాటరీని ఛార్జ్ చేయడానికి ఆ యూట్యూబర్ సోలార్ ప్యానెల్స్ను వినియోగించాడు. శాండ్రో తన 'టెస్లా మోడల్ X' (Tesla Model X) కారులో కెనడా నుండి అర్జెంటీనా వరకు లాంగ్ ట్రిప్లో ఉన్నాడు. యూట్యూబర్ కుయిజ్క్ తన కారును ఒక చిన్న ఇల్లులా మార్చుకుని, అందులో బెడ్, కిచెన్, అవసరమైన సౌకర్యాలు ఏర్పాటు చేసుకున్నాడు. అయితే అత్యవసర పరిస్థితుల్లో ఉపయోగపడుతుందని అతను కారులో ముందుగానే ఒక చిన్న సోలార్ ప్యానెల్ను కూడా సెట్ చేసుకున్నాడు. క్లిష్ట పరిస్థితుల్లో అదే అతడి సమస్యను పరిష్కరించింది.
తదుపరి ఛార్జింగ్ స్టేషన్ 42 కిలోమీటర్ల దూరంలో ఉండగా అతడు సమస్య గుర్తించాడు. కానీ అతని కారులో కేవలం 37 కిలోమీటర్ల వరకు సరిపోయే బ్యాటరీ మాత్రమే ఉంది. కొండ మార్గం, ఈదురు గాలుల కారణంగా బ్యాటరీ త్వరగా అయిపోయి, కారు దారి మధ్యలోనే ఆగిపోయింది. అలాంటి పరిస్థితుల్లో అతడు సాయం కోసం స్నేహితులకు ఫోన్ చేసినా ప్రయోజనం లేకపోయింది. కానీ అతడి తరువాత జర్నీ చాలా ఆసక్తికరంగా సాగింది.
సోలార్ ప్యానెల్ ఉపయోగించిన యూట్యూబర్
అటువంటి క్లిష్ట సమయంలో శాండ్రో వాన్ కుయిజ్క్ తాను ముందుగానే సిద్ధం చేసుకున్న సోలార్ ప్యానెల్స్ ఉన్నాయని గుర్తుచేసుకున్నాడు. రోడ్డు పక్కన సోలార్ ప్యానెల్స్ పరిచి కారును ఛార్జింగ్ చేయడం ప్రారంభించాడు. అయితే ఈ ఛార్జింగ్ చాలా నెమ్మదిగా సాగింది. ఆ తర్వాత అతనికి రోడ్డుపై పనిచేస్తున్న కొందరు కనిపించారు. వారు తమ మెషీన్ సాయంతో కారును ఛార్జింగ్ చేయడానికి సహాయం చేశారు. దీనివల్ల అతడి కారు బ్యాటరీకి మరికొంత విద్యుత్ లభించింది. చివరికి అతను తన కారును సమీపంలోని సిటీకి తీసుకెళ్లడంలో సక్సెస్ అయ్యాడు. శాండ్రో ఒక ట్రక్కు సహాయంతో కారును దగ్గరలోని సిటీకి తీసుకెళ్లాడు. ఈ మొత్తం జర్నీ, తనకు ఎదురైన అనుభవానికి సంబంధించిన వీడియోను శాండ్రో తన యూట్యూబ్ ఛానెల్లో కూడా షేర్ చేశాడు.
టాప్ హెడ్ లైన్స్
ట్రెండింగ్ వార్తలు
