మన దేశంలో టాప్-5 మిడ్ సైజ్ SUVలు ఇవే - నంబర్-1 స్థానంలో ఏ కారు ఉందో తెలుసా?
భారత్లో ప్రస్తుతం అమ్మకాల్లో ఉన్న బెస్ట్ 5 మిడ్ సైజ్ SUVల జాబితా ఇదే. Kia Seltos నుంచి Renault Duster వరకు ధరలు, ఫీచర్లు, పనితీరు, ప్రత్యేకతలు తెలుసుకోండి.
Top-5 midsize SUVs India 2026: భారత్లో మిడ్ సైజ్ SUV సెగ్మెంట్కు భారీ ఆదరణ ఉంది. ప్రస్తుతం ఈ విభాగంలో ఏకంగా 13 మోడళ్లు అందుబాటులో ఉన్నాయి. పెట్రోల్, డీజిల్, CNG, స్ట్రాంగ్ హైబ్రిడ్ & ఎలక్ట్రిక్ పవర్ట్రెయిన్లతో ఎన్నో ఎంపికలు ఉండటంతో ఏ మోడల్ను ఎంచుకోవాలనే విషయంలో చాలా మంది సందిగ్ధంలో పడుతున్నారు. అలాంటి వారి కోసం ప్రస్తుతం మార్కెట్లో అందుబాటులో ఉన్న ICE ఇంజిన్లతో వచ్చే టాప్-5 మిడ్ సైజ్ SUVల జాబితాను అందిస్తున్నాం.
మొదటి స్థానంలో Kia Seltos నిలిచింది. రూ.10.99 లక్షల నుంచి రూ.21.82 లక్షల ధరతో లభిస్తున్న ఈ SUV అన్ని విభాగాల్లో సమతుల్య పనితీరుతో ఆకట్టుకుంటోంది. ఇందులో 1.5 లీటర్ నేచురల్లీ ఆస్పిరేటెడ్ పెట్రోల్, 1.5 లీటర్ టర్బో పెట్రోల్, 1.5 లీటర్ డీజిల్ ఇంజిన్ ఎంపికలు ఉన్నాయి. ప్రీమియం ఇంటీరియర్, విశాలమైన క్యాబిన్, ఆధునిక టెక్నాలజీ, అద్భుతమైన UI, విభిన్న గేర్బాక్స్ ఎంపికలు దీనికి ప్రధాన బలాలు. అయితే టాప్ వేరియంట్ ధర కొంత ఎక్కువగా ఉండటం & సస్పెన్షన్ స్వల్పంగా గట్టిగా అనిపించడం మాత్రమే చిన్న లోపాలు.
రెండో స్థానంలో Hyundai Creta నిలిచింది. రూ.10.91 లక్షల నుంచి రూ.19.95 లక్షల మధ్య ధర కలిగిన ఈ SUV ఇప్పటికీ మార్కెట్లో బలమైన పోటీని ఇస్తోంది. Kia Seltosలో ఉన్న అదే ఇంజిన్ ఎంపికలు ఇందులో కూడా లభిస్తాయి. సౌకర్యవంతమైన డ్రైవింగ్ అనుభవం, ఫీచర్లతో నిండిన క్యాబిన్, విశ్వసనీయమైన ఆఫ్టర్ సేల్స్ సర్వీస్ దీనికి ప్లస్ పాయింట్లు. స్పోర్టీ డ్రైవింగ్ కోరుకునే వారికి N Line వేరియంట్ కూడా అందుబాటులో ఉంది.
ఇది కూడా చదవండి: నిస్సాన్ గ్రావైట్ కొనాలనుకుంటున్నారా? సిటీలో, హైవేపై ఈ కారు నిజమైన మైలేజ్ వివరాలు ఇవిగో!
మూడో స్థానంలో Maruti Victoris నిలిచింది. దీని ధర రూ.10.49 లక్షల నుంచి రూ.19.99 లక్షల వరకు ఉంది. తక్కువ నిర్వహణ ఖర్చు, విశ్వసనీయత, సులభమైన ఓనర్షిప్ అనుభవం కోరుకునే వారికి ఇది మంచి ఎంపికగా నిలుస్తుంది. 116 hp స్ట్రాంగ్ హైబ్రిడ్ పవర్ట్రెయిన్తో పాటు 1.5 లీటర్ పెట్రోల్ ఇంజిన్తో AWD ఎంపిక కూడా లభిస్తుంది. CNG వేరియంట్ కూడా అందుబాటులో ఉండటం మరో ప్రత్యేకత. అయితే పనితీరు అంతగా ఉత్సాహపరచకపోవడం & వెనుక సీటు స్థలం ప్రత్యర్థి కార్లతో పోలిస్తే తక్కువగా ఉండటం ప్రతికూల అంశాలు.
నాలుగో స్థానంలో Tata Sierra నిలిచింది. దీని ధర రూ.11.49 లక్షల నుంచి రూ.21.29 లక్షల వరకు ఉంది. ఈ సెగ్మెంట్లో అత్యంత విశాలమైన క్యాబిన్, ఎక్కువ ఫీచర్లు కలిగిన SUVగా ఇది గుర్తింపు పొందింది. ముందు ప్రయాణికుడి కోసం ప్రత్యేకంగా మూడో స్క్రీన్ ఇవ్వడం దీని ప్రత్యేకత. 160 hp టర్బో పెట్రోల్ ఇంజిన్ ఉత్తమ ఎంపికగా నిలుస్తుంది. అయితే డీజిల్ & నేచురల్లీ ఆస్పిరేటెడ్ పెట్రోల్ ఇంజిన్లు రిఫైన్మెంట్ & పనితీరు విషయంలో అంతగా ఆకట్టుకోవు. ధర కూడా కొంత ఎక్కువగా ఉండటం & సర్వీస్ అనుభవంపై కొన్ని సందేహాలు ఉండటం ప్రతికూలతలు.
ఇది కూడా చదవండి: టాటా కర్వ్ బలాలు, బలహీనతలు - కొనేముందు తప్పక తెలుసుకోవాల్సిన విషయాలు
ఐదో స్థానంలో Renault Duster నిలిచింది. రూ.10.49 లక్షల నుంచి రూ.18.69 లక్షల ధరతో లభిస్తున్న ఈ SUV బలమైన డిజైన్, అద్భుతమైన రైడ్ క్వాలిటీ, ఆధునిక ఇంటీరియర్తో మంచి విలువను అందిస్తోంది. 100 hp 1.0 లీటర్ టర్బో పెట్రోల్ & 163 hp 1.3 లీటర్ టర్బో పెట్రోల్ ఇంజిన్ ఆప్షన్లు ఉన్నాయి. అయితే రెండు ఇంజిన్లలోనూ ప్రారంభ వేగాల్లో టర్బో ల్యాగ్ కనిపిస్తుంది. బేస్ పెట్రోల్ వేరియంట్కు ఆటోమేటిక్ గేర్బాక్స్ అందుబాటులో లేకపోవడం కూడా లోపంగా చెప్పవచ్చు. అలాగే పాత డస్టర్లో ఉన్న డీజిల్ ఇంజిన్ & AWD ఎంపికలు కొత్త మోడల్లో లేకపోవడం కొంతమందిని నిరాశకు గురి చేసే అంశం.
మొత్తంగా చూస్తే, అన్ని అవసరాలకు సరిపోయే ఆల్రౌండర్ SUV కోసం చూస్తే Kia Seltos అగ్రస్థానంలో నిలుస్తుంది. సౌకర్యవంతమైన ప్రయాణం & విశ్వసనీయత కోరుకునేవారికి Hyundai Creta మంచి ఎంపిక. తక్కువ నిర్వహణ ఖర్చు & హైబ్రిడ్ టెక్నాలజీ కావాలంటే Maruti Victoris అనుకూలం. అత్యధిక ఫీచర్లు & విశాలమైన క్యాబిన్ కోసం Tata Sierraను ఎంచుకోవచ్చు. బలమైన డిజైన్, అద్భుతమైన రైడ్ క్వాలిటీ కోరుకునే వారికి Renault Duster సరైన ఎంపికగా నిలుస్తుంది.
ఇంకా ఇలాంటి ఆటోమొబైల్ వార్తలు & అప్డేట్స్ - "ABP దేశం" 'ఆటో' సెక్షన్ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
