బజాజ్ పల్సర్ 150 vs టీవీఎస్ అపాచీ 160.. మీ స్టైల్‌కి ఏది సరిగ్గా సెట్‌ అవుతుందో తెలుసా?
Bajaj Pulsar 150, TVS Apache RTR 160 మధ్య ధర, ఇంజిన్, మైలేజ్, బరువు, బ్రేకులు, ఫీచర్లలో తేడాలను తెలుసుకోండి. మీకు సరైన బైక్ ఏదో ఇక్కడ తెలుసుకోండి.
Bajaj Pulsar 150 vs TVS Apache RTR 160: టూవీలర్‌ మార్కెట్‌లో బజాజ్ పల్సర్ & టీవీఎస్ అపాచీ మధ్య ఏళ్లుగా గట్టి పోటీ కొనసాగుతోంది. ముఖ్యంగా 150cc నుంచి 160cc విభాగంలో ఈ రెండు బైక్‌ల మధ్య పోటీ ఆసక్తికరంగా ఉంటుంది. తాజాగా, కొత్త మార్పులతో వచ్చిన బజాజ్ పల్సర్ 150కి టీవీఎస్ అపాచీ RTR 160 2V గట్టి పోటీ ఇస్తోంది.
బజాజ్ ఆటో, 2001లో తొలిసారిగా పల్సర్ 150ని తీసుకొచ్చింది. టీవీఎస్ 2005లో అపాచీ 150ని పరిచయం చేసింది. ఆ తర్వాత 2006లో 160cc మోడల్‌ను తీసుకొచ్చింది. పల్సర్ 150 25వ వార్షికోత్సవం సందర్భంగా బజాజ్ ఈ బైక్‌ను పూర్తిగా కొత్తగా డెవలప్‌ చేసింది. పాత మోడల్‌తో పోలిస్తే భారీ మార్పులు చేసింది.
టీవీఎస్ కూడా అపాచీ RTR 160 2Vలో కొత్త టాప్ వేరియంట్‌ను తీసుకొచ్చింది. ఇందులో ట్రాక్షన్ కంట్రోల్ ఫీచర్‌ను అందించింది. ధర పరంగా చూస్తే రెండు బైక్‌ల మధ్య పెద్దగా వ్యత్యాసం లేదు. కొన్ని వందల రూపాయల తేడాతోనే ఇవి మార్కెట్‌లో ఉన్నాయి.
ఇంజిన్
పల్సర్ 150లో 149.5cc సింగిల్ సిలిండర్, ఆయిల్ కూల్డ్ ఇంజిన్ ఉంది. ఇది 8,000rpm వద్ద 14hp శక్తిని అందిస్తుంది. 6,500rpm వద్ద 14.1Nm టార్క్‌ను ఉత్పత్తి చేస్తుంది. ఇందులో 5 స్పీడ్ గేర్‌బాక్స్ ఉంటుంది.
అపాచీ RTR 160లో 159.7cc సింగిల్ సిలిండర్, ఎయిర్ కూల్డ్ ఇంజిన్ ఉంది. ఇది 8,750rpm వద్ద 16.04hp శక్తిని అందిస్తుంది. 7,000rpm వద్ద 13.85Nm టార్క్‌ను ఇస్తుంది. ఇందులోనూ 5 స్పీడ్ గేర్‌బాక్స్ ఉంది.
పవర్ పరంగా అపాచీ ముందంజలో ఉంది. పవర్ టు వెయిట్ రేషియోలోనూ టీవీఎస్ బైక్‌దే పైచేయి. అయితే అపాచీ గరిష్ఠ పవర్ & టార్క్‌ను పల్సర్ కంటే ఎక్కువ RPM వద్ద అందిస్తుంది.
ఇది కూడా చదవండి: టయోటా అతి తక్కువ ధర కారు ఇదే! రూ.6.73 లక్షలే.. ఫీచర్లు మాత్రం అదుర్స్!
సైజ్‌
పల్సర్ 150లో 15 లీటర్ల ఇంధన ట్యాంక్ ఉంది. అపాచీలో ఇది 12 లీటర్లు మాత్రమే. అంటే పల్సర్‌లో మూడు లీటర్ల అదనపు సామర్థ్యం ఉంది. రోజువారీ ప్రయాణాల్లో ఇది ఉపయోగపడుతుంది.
పల్సర్ 150 గ్రౌండ్ క్లియరెన్స్ 186mm. అపాచీది 180mm. సీటు ఎత్తు పల్సర్‌లో 795mm కాగా, అపాచీలో 790mmగా ఉంది. బరువు పరంగా అపాచీ కొంత తేలికగా ఉంటుంది. పల్సర్ బరువు 141kg. అపాచీ బరువు 139kg.
బ్రేకులు & టైర్ల విషయంలో కూడా అపాచీకి కొన్ని ప్రయోజనాలు ఉన్నాయి. అపాచీలో ముందు 270mm, వెనుక 240mm డిస్క్ బ్రేకులు ఉన్నాయి. పల్సర్‌లో ముందు 260mm, వెనుక 230mm డిస్క్ బ్రేకులు ఉన్నాయి. అపాచీ టాప్ వేరియంట్లలో డ్యూయల్ ఛానల్ ABS కూడా లభిస్తుంది. పల్సర్‌లో సింగిల్ ఛానల్ ABS మాత్రమే ఉంది.
సస్పెన్షన్ విషయంలో మాత్రం పల్సర్ ప్రత్యేకతను చూపిస్తుంది. కొత్త ఫ్రేమ్ కారణంగా ఇందులో మోనోషాక్‌ను అందించారు. అపాచీలో ట్విన్ షాక్ సెటప్ కొనసాగుతోంది.
ఫీచర్లు
కొత్త పల్సర్ 150 గణనీయంగా ముందుకు వచ్చింది. టాప్ వేరియంట్‌లో 5 అంగుళాల TFT స్క్రీన్ ఉంది. ఇందులో Google Maps మిర్రరింగ్ సపోర్ట్ ఉంటుంది. ISG టెక్నాలజీ ద్వారా నిశ్శబ్దంగా ఇంజిన్‌ను స్టార్ట్ చేయవచ్చు. ఆటో స్టాప్ & స్టార్ట్ సిస్టమ్ కూడా ఉంది.
అపాచీలో LCD ఇన్‌స్ట్రుమెంట్ క్లస్టర్ ఉంటుంది. టాప్ వేరియంట్లలో బ్లూటూత్ కనెక్టివిటీ ఉంది. ఫోన్‌కు కనెక్ట్ చేసి కాల్ & SMS అలర్ట్‌లను పొందవచ్చు. తక్కువ వేగంలో బైక్‌ను సులభంగా నడిపేందుకు పల్సర్‌లో క్రాల్ మోడ్, అపాచీలో GTT ఉన్నాయి. అయితే ట్రాక్షన్ కంట్రోల్ మాత్రం అపాచీ ప్రత్యేకత.
ఇది కూడా చదవండి: Toyota Glanza కొనేవాళ్లకు బోలెడన్ని EMI ఆఫర్లు.. రూ.1.60 లక్షలు డౌన్‌పేమెంట్‌ చేస్తే చాలు!
ధర
పల్సర్ 150 ధర రూ.1,15,233 నుంచి రూ.1,28,650 వరకు ఉంది. అపాచీ RTR 160 ధర రూ.1,13,890 నుంచి రూ.1,27,990 వరకు ఉంది. అంటే ప్రారంభ ధరలో అపాచీ సుమారు రూ.660 తక్కువ.
మొత్తంగా చూస్తే.. పవర్, బ్రేకులు, డ్యూయల్ ఛానల్ ABS & ట్రాక్షన్ కంట్రోల్ విషయంలో అపాచీ ముందుంది. ఫీచర్లు, పెద్ద ఇంధన ట్యాంక్ & కొత్త మోనోషాక్ విషయంలో పల్సర్ 150 ఆకట్టుకుంటుంది. ధరలోనూ పెద్ద తేడా లేదు. కాబట్టి మీ ప్రాధాన్యతలను బట్టి ఈ రెండింటిలో సరైన బైక్‌ను ఎంచుకోవచ్చు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ కోసం "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
