Mahindra XUV 3XO CNG Variant: మహీంద్రా నుండి ఫస్ట్ సీఎన్జీ ఎస్‌యూవీ.. మార్కెట్లోకి ఎక్స్‌యూవీ 3XO సరికొత్త మోడల్! టాటా, మారుతి కార్లకు గట్టి పోటీ
మహీంద్రా తన పాపులర్ ఎక్స్‌యూవీ 3XO మోడల్‌లో సీఎన్జీ వేరియంట్‌ను తీసుకురాబోతోంది. ఇది 2026 చివరి నాటికి విడుదలయ్యే అవకాశం ఉండటంతో వినియోగదారుల్లో ఆసక్తి పెరిగింది.
Mahindra XUV 3XO CNG Variant Launch Expected by Late 2026 ఇండియ‌న్ ఆటోమొబైల్ మార్కెట్లో బడ్జెట్ ధరలో లభించే గ్రీన్ ఫ్యూయల్ ఆప్షన్లకు డిమాండ్ విపరీతంగా పెరుగుతోంది. ఈ క్రమంలోనే ప్రముఖ దేశీయ తయారీ సంస్థ మహీంద్రా తన మోస్ట్ పాపులర్ కాంపాక్ట్ ఎస్‌యూవీ ఎక్స్‌యూవీ 3XO (XUV 3XO) లో సీఎన్జీ వేరియంట్‌ను లాంచ్ చేయడానికి సిద్ధమవుతోంది. ఇప్పటికే ఈ సెగ్మెంట్‌లో ఇతర కంపెనీలు తమ సీఎన్జీ మోడళ్లతో దూసుకుపోతుండగా, మహీంద్రా కొంచెం ఆలస్యంగానైనా పక్కా ప్లాన్ తో ఈ బరిలోకి దిగుతోంది. పర్యావరణ హితమైన ఇంధనం వైపు మళ్లుతున్న కస్టమర్లను ఆకర్షించడమే ఈ నిర్ణయం వెనుక ఉన్న ప్రధాన ఉద్దేశ్యం.
ఇంజిన్ సామర్థ్యం ఎలా ఉంటుంది?
ప్రస్తుతం ఎక్స్‌యూవీ 3XO మోడల్ 1.2 లీటర్ ఎంపీఎఫ్ఐ (MPFi) టర్బో పెట్రోల్ ఇంజిన్ తో లభిస్తోంది. ఇది 111 హెచ్‌పీ పవర్, 200 ఎన్ఎమ్ టార్క్‌ను ఉత్పత్తి చేస్తుంది. అలాగే ఇందులో 1.2 లీటర్ టీజీడీఐ (TGDi) పెట్రోల్ ఇంజిన్ తో పాటు 1.5 లీటర్ డీజిల్ ఇంజిన్ ఆప్షన్లు కూడా ఉన్నాయి. అయితే రాబోయే సీఎన్జీ కిట్ ను బేస్ వేరియంట్ అయిన 111 హెచ్‌పీ ఎంపీఎఫ్ఐ పెట్రోల్ యూనిట్ కు జత చేసే అవకాశం కనిపిస్తోంది. ఇది టాటా నెక్సాన్ ఐసీఎన్జీ (Nexon iCNG) వంటి ప్రత్యర్థుల పద్ధతిలోనే ఉండబోతోంది అని అటో మొబైల్ నిపుణుల వర్గాల అంచనాగా తెలుస్తోంది.
లాంచ్ ఎప్పుడు? అంచనా ధర ఎంత?
తాజా నివేదిక ప్రకారం, ఎక్స్‌యూవీ 3XO సీఎన్జీ వేరియంట్ 2026 చివరిలో లేదా 2027 ఆరంభంలో మార్కెట్లోకి వచ్చే అవకాశం ఉంది. మహీంద్రా నుండి వస్తున్న మొట్టమొదటి ప్యాసింజర్ సీఎన్జీ ఎస్‌యూవీ ఇదే కావడం విశేషం. ఇది మార్కెట్లోకి వస్తే టాటా నెక్సాన్ సీఎన్జీ, మారుతి బ్రెజా వంటి మోడళ్లకు గట్టి పోటీనిస్తుంది. ప్రస్తుతం పెట్రోల్ వేరియంట్ ప్రారంభ ధర రూ. 7.54 లక్షలు (ఎక్స్‌షోరూమ్) ఉండగా, సీఎన్జీ వేరియంట్ ధర రూ. 9 లక్షల నుండి రూ. 12 లక్షల మధ్య ఉండే అవకాశం కనిపిస్తోంది అని నిపుణులు అభిప్రాయం వ్యక్తం చేస్తున్నారు.
ఫీచర్ల విషయంలో తగ్గేదే లే..
సీఎన్జీ వేరియంట్ అయినప్పటికీ, ఫీచర్ల విషయంలో మహీంద్రా ఎక్కడా కాంప్రమైజ్ కావడం లేదు. ఇందులో డ్యూయల్ 10.25-ఇంచ్ స్క్రీన్లు, లెవల్-2 అడాస్ (ADAS), పనోరమిక్ సన్‌రూఫ్, ఆరు ఎయిర్ బ్యాగులు, 360-డిగ్రీ కెమెరా వంటి అడ్వాన్స్‌డ్ టెక్నాలజీ ఫీచర్లు అలాగే ఉండబోతున్నాయి. సీఎన్జీ ట్యాంక్ కోసం బూట్ స్పేస్ లో చిన్నపాటి మార్పులు జరిగినా, ప్రీమియం లుక్ లో ఎటువంటి తేడా ఉండదు. బీఎస్6 ప్రమాణాలకు అనుగుణంగా తయారవుతున్న ఈ కారు, మహీంద్రా గ్రీన్ పోర్ట్‌ఫోలియోను మరింత బలోపేతం చేయనుంది. తక్కువ ఖర్చుతో ఎక్కువ దూరం ప్రయాణించాలనుకునే మధ్యతరగతి కుటుంబాలకు ఈ కారు ఒక బెస్ట్ ఆప్షన్ కానుంది అని విశ్లేషకులు పేర్కొంటున్నారు. ఏదేమైనా సీఎన్జీ వేరియంట్ ద్వారా ఆ రంగంలో పోటీకి మహీంద్ర తెర లేపిందని ఆటో మోబైల్ రంగ నిఫుణులు అభిప్రాయం వ్యక్తం చేస్తున్నారు.
టాప్ హెడ్ లైన్స్
ట్రెండింగ్ వార్తలు
