AGV కొత్త హెల్మెట్‌ గురూ, రోడ్డుపై మంటలే! - యూత్‌కి సరిపోయే స్పోర్టీ పార్ట్‌నర్‌
AGV K1 S హెల్మెట్‌ డిజైన్‌, సేఫ్టీ, కంఫర్ట్‌, ఫిట్‌, వెంటిలేషన్‌ ఎలా ఉన్నాయి? రూ.25 వేల బడ్జెట్‌లో ఈ ప్రీమియం హెల్మెట్‌ యూత్‌కు సరిపోతుందా లేదా పూర్తి రివ్యూ.
AGV K1 S Helmet Review: బైక్‌ రైడింగ్‌లో హెల్మెట్‌ అంటే కేవలం చట్టపరమైన అవసరం మాత్రమే కాదు - అది రైడర్‌ వ్యక్తిత్వాన్ని చూపించే భాగం కూడా. ముఖ్యంగా యూత్‌లో స్టైల్‌, సేఫ్టీ, బ్రాండ్‌ విలువ... ఈ మూడూ కలిసొస్తే ఆ హెల్మెట్‌కు డిమాండ్‌కు ఆకాశమే హద్దు. ఇప్పుడు మార్కెట్‌లోకి వచ్చిన AGV K1 S హెల్మెట్‌ చాలామంది దృష్టిని ఆకర్షిస్తోంది.
ఇది AGV లైనప్‌లో ఎంట్రీ లెవల్‌ మోడల్‌ అయినప్పటికీ, తయారీలో రాజీ పడ్డారేమో అన్న ఫీలింగ్‌ మాత్రం ఇవ్వదు. రూ.25,000 బడ్జెట్‌లో ప్రీమియం బ్రాండ్‌ హెల్మెట్‌ కొనాలనుకునే వారికి ఇది నిజంగా సరైన ఆప్షన్‌ కావచ్చు.
డిజైన్‌ - రేసింగ్‌ DNA స్పష్టంగా కనిపిస్తుంది
AGV K1 S డిజైన్‌ చూస్తే మొదటే రేసింగ్‌ హెల్మెట్‌ ఫీలింగ్‌ వస్తుంది. షార్ప్‌ లైన్స్‌తో ఉన్న చిన్‌ సెక్షన్‌, ఇంటిగ్రేటెడ్‌ రియర్‌ స్పాయిలర్‌ దీనికి స్పోర్టీ లుక్‌ ఇస్తాయి. ఈ షెల్‌ ఆకారాన్ని విండ్‌ టన్నెల్‌ టెస్టింగ్‌ ద్వారా డెవలప్‌ చేయడం గమనార్హం.
గ్లోస్‌ ఫినిష్‌లో ఈ హెల్మెట్‌ ఇంకా ఆకర్షణీయంగా కనిపిస్తుంది. భారతీయ రోడ్లపై, నగర ట్రాఫిక్‌లో గ్లోస్‌ ఫినిష్‌ ఎక్కువ కాలం కొత్తదనాన్ని నిలుపుకుంటుంది.
సేఫ్టీ - ఇక్కడే అసలు బలం
AGV K1 Sలో థర్మోప్లాస్టిక్‌ షెల్‌ వాడారు. ఖర్చు తగ్గించేందుకు తీసుకున్న నిర్ణయమే అయినా, సేఫ్టీ విషయంలో ఎలాంటి రాజీ లేదు. ఇది ECE 22.06 తాజా భద్రతా ప్రమాణాలకు అనుగుణంగా ఉంటుంది. అదనంగా 5 స్టార్‌ SHARP రేటింగ్‌ కూడా పొందింది.
భారత BIS సర్టిఫికేషన్‌ లేకపోవడం కొంతమందికి మైనస్‌గా అనిపించవచ్చు. అయితే అంతర్జాతీయ ప్రమాణాలు చూసేవాళ్లకు ఇది పెద్ద సమస్య కాదు.
ఫిట్‌, కంఫర్ట్‌ - స్పోర్టీ రైడర్లకు పర్‌ఫెక్ట్‌
ఈ హెల్మెట్‌ ఫిట్‌ చాలా స్నగ్‌గా ఉంటుంది. ముఖ్యంగా, చీక్‌ ఏరియాలో గట్టిగా ఫిట్‌ అవుతుంది. మధ్యస్థ నుంచి కొంచెం ఓవల్‌ షేప్‌ హెడ్ ఉన్నవాళ్లకు ఇది బాగా సెట్‌ అవుతుంది. మొదట్లో ప్యాడింగ్‌ గట్టిగా అనిపించినా, వాడకం పెరిగే కొద్దీ సహజంగా సెట్‌ అవుతుంది.
బరువు సుమారు 1.6 కిలోలు. ఇదేమీ తక్కువ బరువు కాదు కానీ బరువు పంపిణీ బాగా ఉంటుంది. స్పోర్టీ బైక్స్‌పై ముందుకు వంగి కూర్చునే పొజిషన్‌లో ఈ హెల్మెట్‌ మెడపై ఎక్కువ ఒత్తిడి పెట్టదు. అయితే నిటారుగా కూర్చునే బైక్స్‌పై ఎక్కువసేపు రైడ్‌ చేస్తే స్వల్పంగా మెడ అలసట అనిపించవచ్చు.
వెంటిలేషన్‌, నాయిస్‌
బ్రౌ, చిన్‌ వెంట్స్‌ ఓపెన్‌ రోడ్లపై బాగా పనిచేస్తాయి. హైవే స్పీడ్స్‌లో ఎయిర్‌ ఫ్లో స్పష్టంగా అనిపిస్తుంది. నగరంలో మాత్రం వెంటిలేషన్‌ సరిపడా స్థాయిలోనే ఉంటుంది.
నాయిస్‌ విషయానికి వస్తే, ఈ ధరలో స్పోర్టీ హెల్మెట్‌ నుంచి ఆశించే స్థాయిలోనే ఉంది. సిటీలో నాయిస్‌ తక్కువగా ఉంటుంది. హైవేపై విండ్‌ నాయిస్‌ వినిపించినా, అసౌకర్యంగా అనిపించదు.
ఫీచర్లు - అవసరమైనవి తప్ప అనవసరపు ఆర్భాటాలు లేవు
AGV K1 Sలో డబుల్‌-D రింగ్‌ స్ట్రాప్‌ ఉంది. ఇది రేసింగ్‌, సేఫ్టీ పరంగా పెద్ద ప్లస్‌. ఇంటర్నల్‌ సన్‌వైజర్‌ లేదు, కానీ చాలామందికి అది డీల్‌ బ్రేకర్‌ కాదు. లైనర్‌ పూర్తిగా తీసేయవచ్చు, అయితే లాక్‌ మెకానిజం కొంచెం ఇబ్బందిగా అనిపిస్తుంది.
వైజర్‌ పిన్‌లాక్‌ రెడీ అయినప్పటికీ, AGV స్పేర్‌ పార్ట్స్‌ ధరలు కొంచెం ఎక్కువగానే ఉంటాయి.
చిన్న మైనస్‌లు కూడా ఉన్నాయి
ఈ హెల్మెట్‌ టేబుల్‌పై స్థిరంగా నిలవదు. పక్కకు ఊగుతుంది. అయితే, కాలర్‌బోన్‌ రక్షణ కోసం ఇలా డిజైన్‌ చేసినట్లు AGV చెబుతోంది.
AGV K1 S ఎంట్రీ లెవల్‌ మోడల్‌ అయినా, సేఫ్టీ, డిజైన్‌, బ్రాండ్‌ విలువ విషయంలో ఎక్కడా రాజీ పడలేదు. ఫీచర్ల కంటే రక్షణ, నమ్మకం ముఖ్యమని భావించే రైడర్లకు ఇది చాలా సరైన ఎంపిక. రూ.25,000 బడ్జెట్‌లో ప్రీమియం స్పోర్టీ హెల్మెట్‌ కావాలంటే, AGV K1 S యూత్‌కు నిజంగా పర్‌ఫెక్ట్‌ పార్ట్‌నర్‌ అని చెప్పొచ్చు.
ఇంకా ఇలాంటి ఆటోమొబైల్‌ వార్తలు & అప్‌డేట్స్‌ - "ABP దేశం" 'ఆటో' సెక్షన్‌ని ఫాలో అవ్వండి.
టాప్ హెడ్ లైన్స్
ట్రెండింగ్ వార్తలు
