Weather Updates: తెలుగు రాష్ట్రాలకు రెయిన్ అలర్ట్.. ఏపీలో అక్కడ మూడు రోజులు భారీ వర్షాలు.. తెలంగాణలో చిరు జల్లులు

AP Rains: దక్షిణ అండమాన్ సముద్రంలో మరో అల్పపీడనం నవంబర్ 29న ఏర్పడనుంది. పశ్చిమ, వాయవ్య దిశగా కదులుతూ బలపడి మరో 24 రోజుల్లో వాయుగుండంగా మారనుందని భారత వాతావరణ శాఖ తెలిపింది.

ఏపీ, తెలంగాణలో వర్షాలు (Representational Image)

Weather Updates: ఉపరితల ఆవర్తనం నైరుతి బంగాళాఖాతం నుండి శ్రీలంక వరకు సముద్ర మట్టానికి 1.5 కిలోమీటర్ల మేర విస్తరించి ఉందని భారత వాతావరణ కేంద్రం వెల్లడించింది. దీని ప్రభావంతో ఏపీలో మరో మూడు రోజులు భారీ వర్షాలు కురవనుండగా, ఒకట్రెండు చోట్ల ఓ మోస్తరు వర్షాలు కురిసే అవకాశం ఉందని అమరావతి వాతావరణ కేంద్రం వెల్లడించింది. దక్షిణ అండమాన్ సముద్రంలో మరో అల్పపీడనం నవంబర్ 29న ఏర్పడనుంది. ఈ అల్పపీడనం పశ్చిమ, వాయవ్య దిశగా కదులుతూ బలపడి మరో 24 రోజుల్లో వాయుగుండంగా మారనుందని తెలిపారు.

వరుసగా రెండు అల్పపీడనాలు ఏర్పడటంతో ఏపీ ప్రజల్లో ఆందోళన నెలకొంది. ముఖ్యంగా ఇటీవల వర్షాలతో అతలాకుతలమైన రాయలసీమ జిల్లాలైన చిత్తూరు, అనంతపురం, కడప మరియు నెల్లూరు జిల్లాల్లో వర్షాలు కురవనున్నాయి. చిత్తూరు, నెల్లూరు జిల్లాల్లో ఉరుములు, మెరుపులతో కూడిన భారీ వార్షాలు కురిసే అవకాశం ఉందని వాతావరణ కేంద్రం పేర్కొంది. 7 నుంచి 20 సెంటీమీటర్ల వరకు ఓ మోస్తరు వర్షాలు లేదా ఉరుములతో కూడిన భారీ వర్షాలు కురిసే అవకాశం ఉందని అంచనా వేశారు. ప్రకాశం, నెల్లూరు, చిత్తూరు, కడప, అనంతపురం, జిల్లాల్లో భారీ వర్షం కురవనుంది. గుంటూరు, కర్నూలు జిల్లాల్లో గరిష్టంగా 7 నుంచి 11 సెంటీమీటర్ల మేర వర్షపాతం నమోదు కానుంది.

దక్షిణ కోస్తాంద్ర, యానాంతో పాటు రాయలసీమ జిల్లాల్లో నేటి నుంచి మరో రెండు రోజులపాటు ఓ మోస్తరు వర్షాలు కురవనున్నాయి. బంగాళాఖాతం తీరంలో 40 నుంచి 50 కిలోమీటర్ల వేగంతో వేగంగా గాలులు వీస్తాయి. మత్స్యకారులను అధికారులు అలర్ట్ చేశారు. డిసెంబర్ 1 వరకు వేటకు వెళ్లకూడదని మత్స్యాకారులకు సూచించారు. వర్షాలతో పలు జిల్లాల్లో రోడ్లు జలమయం కానున్నాయని, అధికారులు చర్యలు తీసుకోవాలని సూచించింది. వర్షపు నీరు నిలిచిపోవడం ద్వారా ట్రాఫిక్‌కు అంతరాయం తలెత్తనుంది. పాత భవనాలలో ఉండకూడదని, అలాంటి బిల్డింగుల వివరాలు ప్రభుత్వానికి అందించాలని సూచించారు.

pic.twitter.com/cC93xD0vQn

— IMD_Metcentrehyd (@metcentrehyd) November 27, 2021

తెలంగాణలోనూ వర్షాలు..
దక్షిణ అండమాన్‌లో ఏర్పడున్ను అల్పపీడనం ప్రభావం తెలంగాణపై ఉంటుందని హైదరాబాద్ వాతావరణ కేంద్రం తెలిపింది. రాష్ట్రంలో పలు చోట్ల తేలికపాటి నుంచి ఓ మోస్తరు వర్షాలు కురిసే అవకాశం ఉందని అంచనా వేశారు. నేడు హైదరాబాద్‌తో వాతావరణం పొడిగా ఉండే అవకాశం ఉంది. నగర శివార్లలో కొన్ని చోట్ల తేలికపాటి నుంచి స్వల్ప వర్షపాతం నమోదు కావొచ్చునని వాతావరణశాఖ తెలిపింది. నేటి నుంచి మూడు రోజులపాటు ఓ మోస్తరు వర్షాలు కురిసే అవకాశం ఉందని అంచనా వేశారు.

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి