Vizianagaram Train Accident: విజయనగరం రైలు ప్రమాదం - ట్విట్టర్ వేదికగా సీఎం జగన్ ప్రశ్నల వర్షం

Vizianagaram Train Accident: విజయనగరం రైలు ప్రమాద ఘటనపై సీఎం జగన్ ట్విట్టర్ వేదికగా ప్రశ్నల వర్షం కురిపించారు. సిగ్నలింగ్ వ్యవస్థలో లోపాలు, రైళ్ల కమ్యూనికేషన్ వ్యవస్థ పని తీరుపై ప్రశ్నలు సంధించారు.

విజయనగరం ప్రమాదంపై సీఎం జగన్ ప్రశ్నల వర్షం

విజయనగరం జిల్లా కంటకాపల్లి వద్ద జరిగిన రైలు ప్రమాదంపై సీఎం జగన్ తీవ్ర దిగ్భ్రాంతి వ్యక్తం చేశారు. ఈ ప్రమాదం జరిగిన తీరు కొన్ని ప్రశ్నలను లేవనెత్తుతోందని ఆయన పేర్కొన్నారు. ఈ క్రమంలో ట్విట్టర్ వేదికగా ఆయన ప్రశ్నల వర్షం కురిపించారు. 'ఆ సమయంలో బ్రేకింగ్ సిస్టమ్, అలర్ట్ సిస్టమ్ ఎందుకు పని చేయలేదు?, సిగ్నలింగ్ వ్యవస్థ ఎందుకు విఫలమైంది?, రైళ్ల కమ్యూనికేషన్ వ్యవస్థ ఎలా పని చేయకుండా పోయింది?, దీనిపై ఉన్నత స్థాయి ఆడిట్ కమిటీ వేయాలి. దేశంలోని అన్ని మార్గాల్లోనూ ఈ ఆడిట్ జరగాల్సి ఉంది. ఇలాంటి ప్రమాదాలు మరోసారి జరగకుండా చూడాలి.' అంటూ ట్విట్టర్ లో ప్రధాని మోదీ, రైల్వే మంత్రిని జగన్ కోరారు.

The devastating train accident that occurred in Vijayanagaram district last night has caused me great pain.
A running train collided with another stationed train, both of which were running in the same direction.
This horrifying accident gives rise to certain obvious questions:…

— YS Jagan Mohan Reddy (@ysjagan) October 30, 2023

తీవ్ర ఆవేదన

విజయనగరం జిల్లాలో ఘోర రైలు ప్రమాదం ఘటనపై సీఎం జగన్ తీవ్ర ఆవేదన వ్యక్తం చేస్తూ మరో ట్వీట్ చేశారు. ఈ ఘటన చాలా బాధాకరమని, వారి కుటుంబాలకు ప్రభుత్వం అండగా ఉంటుందని స్పష్టం చేశారు. 'మృతుల కుటుంబాలకు నా ప్రగాఢ సానుభూతి తెలియజేస్తున్నా. ఈ ఘటనలో గాయపడి విజయనగరం ప్రభుత్వాస్పత్రిలో చికిత్స పొందుతున్న వారిని పరామర్శించాను. వారు కోలుకునేంత వరకూ ప్రభుత్వం అండగా ఉంటుంది. వారికి మెరుగైన వైద్యం అందించడం సహా, మృతుల కుటుంబాలకు, క్షతగాత్రులకు ఎక్స్ గ్రేషియా సత్వరమే అందించాలని అధికారులను ఆదేశించాను.' అంటూ సీఎం జగన్ ట్విట్టర్ లో పేర్కొన్నారు.

విజయనగరం జిల్లా రైలు ప్రమాద ఘటనలో పలువురు మరణించడం బాధాకరం. వారి కుటుంబాలకు నా ప్రగాఢ సంతాపం తెలియజేస్తున్నాను. ఈ ఘటనలో గాయపడి విజయనగరం ప్రభుత్వాసుపత్రిలో చికిత్స పొందుతున్న వారిని పరామర్శించాను. వారు కోలుకునేంతవరకూ ప్రభుత్వం తోడుగా నిలుస్తుంది. వారికి మంచి వైద్యం అందించ‌డంతో…

— YS Jagan Mohan Reddy (@ysjagan) October 30, 2023

సీఎం ఏరియల్ వ్యూ

అంతకు ముందు ప్రభుత్వాస్పత్రిలో బాధితులను పరామర్శించిన అనంతరం సీఎం జగన్ ప్రమాద స్థలాన్ని ఏరియల్ వ్యూ ద్వారా పరిశీలించారు. ప్రమాదం జరిగిన తీరును అధికారులను అడిగి తెలుసుకున్నారు. 

విజయనగరం జిల్లా కంటకాపల్లి రైలు ప్రమాద ఘటనా స్థలం వద్ద ముఖ్యమంత్రి వైఎస్ జగన్‌ ఏరియల్‌ సర్వే. విజయనగరం ప్రభుత్వాసుపత్రిలో క్షతగాత్రులను పరామర్శించిన తర్వాత విశాఖ ఎయిర్‌పోర్టుకు చేరుకునేముందు ఏరియల్‌ సర్వే నిర్వహించిన సీఎం. pic.twitter.com/TwsPC46JZd

— CMO Andhra Pradesh (@AndhraPradeshCM) October 30, 2023

కాగా, విజయనగరం జిల్లాలో కంటకాపల్లి వద్ద ఆదివారం రాత్రి విశాఖ - పలాస ప్యాసింజర్ రైలును విశాఖ - రాయగడ ప్యాసింజర్ ఢీకొన్న ఘటనలో 14 మంది మృతి చెందగా, వంద మందికి పైగా గాయపడిన సంగతి తెలిసిందే. ప్రమాదంపై రైల్వే ఉన్నత స్థాయి విచారణ చేపట్టింది.