Tirumala News: తిరుమలలో కైశిక ద్వాదశి గురించి తెలుసా

Kaisika Dwadasi Athanam: తిరుమలలో జరిగే ప్రతి కైంకర్యం, పూజలు చాల మంది భక్తులకు తెలియదు. నిత్యం ఏదోక్క ప్రత్యేక పూజలు జరుగుతాయి. అలాంటి ప్రత్యేక కైశిక ద్వాదశి గురించి తెలుసుకుందాం రాండి..

తిరుమలలో కైశిక ద్వాదశి గురించి తెలుసా

Source : TTD

Tirumala News: తిరుమల నిత్య కల్యాణం పచ్చతోరణంలా విరాజిల్లుతుంది. ఇలాంటి పుణ్యక్షేత్రంలో నిత్యం జరిగే ఉత్సవాల్లో ప్రత్యేకమైనది కైశిక ద్వాదశి. ఏడాదిలో ఒక్కసారి మాత్రమే గర్భాలయం నుంచి బయటకు వచ్చే ఉగ్రశ్రీనివాసమూర్తి గురించి, అసలు సూర్యోదయాని కంటే ముందు తీసుకెళ్తారు.
తిరుమల శ్రీవారి ఆలయంలో కొలువైన పంచబేరాల్లో ఒక్కటైన వేంకటతురైవార్‌, స్నపనబేరంగా పిలిచే ఉగ్రశ్రీనివాసమూర్తిని శ్రీదేవి భూదేవి సమేతంగా ఒక్క కైశిక ద్వాదశి రోజు మాత్రమే సూర్యోదయానికి ముందు మాడవీధులలో ఊరేగుతారు. బుధవారం అంటే ఈనెల 13వ తేదీన కైశిక ద్వాదశి పర్వదినాన్ని పురస్కరించుకొని శ్రీవారి ఆలయంలో సాలకట్ల కైశిక ద్వాదశి ఆస్థానాన్ని టిటిడి ఘనంగా నిర్వహించనుంది.
ఉత్సవ చరిత్ర 
తిరుమలలో జరిగే ఉత్సవాల్లో ఈ కైశిక ద్వాదశి ఎంతో ప్రాముఖ్యత ఉంది. కైశిక ద్వాదశిని ప్రబోధనోత్సవం అని, ఉత్తానద్వాదశి అని కూడా అంటారు. వివిధ గ్రంథాల్లో పేర్కొన్న విధంగా స్థితికారుడైన శ్రీమహావిష్ణువును మేల్కొల్పే పర్వదినాన్ని కైశికద్వాదశిగా వ్యవహరిస్తారు. శ్రీమహావిష్ణువు ఆషాఢశుక్ల ఏకాదశినాడు గాఢ నిద్రలోకి వెళ్ళారు. కైశికద్వాదశినాడు ఆయనను మేల్కొల్పడం రివాజు. సాక్షాత్తు శ్రీ మహావిష్ణువు స్వరూపంగా భావించే కలియుగ ప్రత్యక్ష దైవమైన శ్రీవేంకటేశ్వరస్వామి కొలువైవున్న శ్రీవారి ఆలయంలో కైశికద్వాదశి మహోత్సవాన్ని ప్రతిఏటా టిటిడి ఘనంగా నిర్వహిస్తుంది.
ప్రాశ‌స్త్యం..
పురాణాల ప్రకారం శ్రీ‌వైష్ణవ క్షేత్రాల్లో నిర్వహించే ముఖ్యమైన  పర్వ దినాల్లో  కైశిక‌ద్వాద‌శి ఒక‌టి. శ్రీ వ‌రాహ స్వామి కైశిక‌పురాణంలోని 82 శ్లోకాల‌తో శ్రీ భూదేవికి క‌థ‌గా చెప్పిన రోజును కైశిక ఏకాద‌శిగా పిలుస్తారు. ఈ క‌థ ఆధారంగా కైశిక ద్వాద‌శి ప్రత్యేకను సంత‌రించుకుంది.
నంబ‌దువాన్ క‌థ‌…
కైశికద్వాదశి పురాణ నేపథ్యం విశేష ఘట్టాలతో కూడుకున్నది. శ్రీనంబదువాన్‌ (సత్యమూర్తి) అనే భక్తుడు స్వామివారికి కైశిక రాగంలో అక్షరమాలను నివేదించడానికి వెలుతుండగా మార్గమధ్యంలో ఒక బ్రహ్మరాక్షసుడు తారసపడి తినేస్తానన్నాడు. అందుకు నంబదువాన్‌ సమాధానంగా తాను ప్రస్తుతం శ్రీవారికి సంకీర్తనార్చన చేయడానికి వెళ్తున్నానని తప్పక తిరిగివచ్చి ఆ బ్రహ్మరాక్షసుని క్షుద్బాధను తీరుస్తానని ప్రమాణం చేశాడు. చెప్పిన మాట ప్రకారం స్వామివారికి కైశిక రాగంలో అక్షరమాలను నివేదించి బ్రహ్మరాక్షసుని చెంతకు వచ్చాడు. భక్త నంబదువాన్‌ భక్తికి, సత్యనిరతికి ముగ్ధుడై స్వామివారు మోక్షం ప్రసాదించారు. ఈ విధంగా ఉత్తానద్వాదశికి కైశికద్వాదశి అనే నామకరణం కలిగింది.
సూర్యోదయానికి ముందే ఎందుకు?
14వ శ‌తాబ్దంలో ఉగ్రశ్రీ‌నివాస‌మూర్తి ఊరేగింపు జ‌రుగుతూ ఉండ‌గా సూర్య కిర‌ణాలు స్వామివారి విగ్రహంపై ప‌డ‌గానే భారీ అగ్ని ప్రమాదం జ‌రిగింది. అప్పటి నుంచి సూర్యోద‌యానికి ముందే ఊరేగింపు నిర్వహిస్తున్నారు.
ఆస్థానం
ఉగ్రశ్రీనివాసమూర్తిని శ్రీదేవి భూదేవి సమేతంగా సూర్యోదయానికి ముందే తెల్లవారుజామున ఆలయ అర్చకులు తిరుమాడ వీధులలో ఊరేగిస్తారు. అనంతరం ఆలయం లోపల ఉదయం 6  నుంచి ఉదయం 7.30 గంట‌ల వరకు కైశిక ద్వాదశి ఆస్థానాన్ని పురాణ పారాయణం ద్వారా ఘనంగా నిర్వహిస్తారు. దీనితో సాలకట్ల కైశికద్వాదశి ఉత్సవం పూర్తవుతుంది.