Tirumala: మోహినీ అవతార దర్శనం మాయా మోహ నాశ‌నం - సాయంత్రం గరుడవాహనంపై శ్రీ‌మ‌ల‌య‌ప్ప‌స్వామి!

Tirumala Brahmotsavam: బ్రహ్మోత్సవాల్లో ఐదో రోజైన ఆదివారం ఉదయం మోహినీ అవతారంలో దర్శనమిచ్చారు శ్రీ మలయప్పస్వామి. సాయంత్రం గరుడవాహన సేవ జరగనుంది

Brahmotsavam Mohini Avataram

తిరుమల శ్రీ వేంకటేశ్వరస్వామివారి బ్రహ్మోత్సవాల్లో ఐదో రోజైన ఆదివారం ఉదయం శ్రీ మలయప్పస్వామి మోహినీ రూపంలో సర్వాలంకార భూషితుడై దర్శనమిచ్చారు.

ఉదయం 8 గంటల నుంచి 10 వరకు మాడ వీధుల్లో విహరించిన స్వామివారు భక్తులకు దర్శనభాగ్యం కల్పించారు.

వాహనం ముందు గజరాజులు నడుస్తుండగా, భక్తజన బృందాలు భజనలు, కోలాటాలు, జీయ్యంగార్ల ఘోష్టితో మంగళవాయిద్యాల నడుమ స్వామివారి వాహనసేవ కోలాహలంగా జరిగింది.

భక్తులు అడుగడుగునా కర్పూరహారతులు సమర్పించి శ్రీవారిని దర్శించుకున్నారు.

మోహినీ అలంకారం ద్వారా జగత్తు అంతా మాయామోహానికి లొంగివుందని, అదంతా తన లీలా విలాసమేనని, తన భక్తులు కానివారు ఈ జగన్మాయలోలులు కాక తప్పదని స్వామివారు ఈ రూపంలో సందేశం ఇస్తున్నారు

సెప్టెంబర్ 28 ఆదివారం సాయంత్రం 6:30 గంటలకు విశేష‌మైన గరుడవాహనంపై శ్రీ‌మ‌ల‌య‌ప్ప‌స్వామివారు కటాక్షిస్తారు.

108 వైష్ణవ దివ్యదేశాలలో గరుడసేవకు అత్యంత ప్రాముఖ్యత ఉంది.

గరుడవాహనం ద్వారా స్వామివారు దాసానుదాస ప్రపత్తికి తాను దాసుడని తెలియజెబుతారు. జ్ఞానవైరాగ్య ప్రాప్తికోరే మానవులు జ్ఞానవైరాగ్య రూపాలైన రెక్కలతో విహరించే భగదధిష్టుతుడైన గరుడుని దర్శిస్తే సర్వపాపాలు తొలగుతాయని భక్తుల విశ్వాసం