Tirumala News: తిరుమలలో విపరీతమైన అవినీతి అంటూ రమణదీక్షితులు ట్వీట్- వెంటనే డిలీట్!

Tirumala News: ప్రముఖ పుణ్యక్షేత్రం అయిన తిరుమలలో ప్రస్తుతం విపరీతమైన అవినీతి మాత్రమే ఉందంటూ శ్రీవారి ఆలయ ప్రధాన అర్చకుడు ఏవీ రమణదీక్షితులు ట్వీట్ చేశారు. ప్రస్తుతం ఆ ట్వీట్ సంచలనంగా మారింది. అయితే శ్రీవారి ఆలయంలో వివిధ కులాలకు చెందిన 54 కుటుంబాలు వంశపారంపర్యంగా సేవలు అందించేవి. యాదవులు, కుమ్మరి, బుట్టలు అల్లేవారు, తోటమాలీలు, వాహన బేరర్లు, వడ్రంగులు, నేత కార్మికులు వంటి ఉండేవారు. అయితే 30/87 యాక్టుతో ఆ వ్యవస్థలు తుడిచి పెట్టుకుపోయాయి. ప్రస్తుతం విపరీతమైన అవినీతి మాత్రమే ఉంది" అంటూ రమణ దీక్షితులు ట్వీట్ చేశారు. ఈ ట్వీట్ ప్రస్తుతం వైరల్ గా మారింది. 

అయితే ఈ విషయంపై నెటిజెన్లలో చర్చ జరుగుతుండగా.. కొద్ది గంటల్లోనే రమణ దీక్షితులు ఆ ట్వీట్ ను తొలగించారు. తాను కేవలం తిరుమలలో రద్దు చేసిన వారసత్వ వ్యవస్థలు గురించి మాత్రమే మాట్లాడినట్లు తెలిపారు. యాక్ట్ ద్వారా వాటిని తొలగించారు కానీ అవినీతిని నిర్మూలించలేకపోయారని మాత్రమే చెప్పానని అన్నారు. అయితే ఈ విషయాన్ని కూడా ట్వీట్ ద్వారానే వెల్లడించారు. కానీ ఆ తర్వాత మరికొన్ని గంటలకు దీన్ని కూడా డిలీట్ చేసేశారు. 

కాసేపటి క్రితం అవినీతి బంధుప్రీతిపై వేరేవాళ్లు చేసిన ట్వీట్‌ను రీ ట్వీట్ చేశారు రమణ దీక్షితులు. భారతదేశంలోని వంశపారంపర్య పూజారులు సంస్కృతి సంప్రదాయాలను పరిరక్షించడం... రాజకీయ బంధుప్రీతి. అవినీతి ప్రభావాన్ని ఎదుర్కోవడంలో కీలక పాత్ర పోషిస్తారని సైంటిస్ట్ ప్రీస్ట్ అనే వ్యక్తి చేసిన  ట్వీట్‌ను రమణదీక్షితులు షేర్ చేశారు. అవును. ఇది నిజమేనని.. కానీ పాత రాక్షసుడి లాంటి స్వార్థపూరిత వ్యక్తులు మాత్రం జీర్ణించుకోలేనిదంటూ సెటైర్లు వేశారు. 

Yes. This is the fact but not digestible to the selfish self centered lot like our old asuras. https://t.co/BKRqBDsGZe

— Ramana Dikshitulu (@DrDikshitulu) December 9, 2022

తిరుమలలో పెరిగిన భక్తుల రద్దీ..!

తిరుమలలో‌ భక్తుల రద్దీ పెరిగింది. గురువారం అంటే డిసెంబర్ 8వ తేదీ రోజ 54 వేల 609 మంది స్వామి వారిని దర్శించుకున్నారు. ఇక స్వామి వారికి 26 వేల 718 మంది తలనీలాలు సమర్పించగా, 3.39 కోట్ల రూపాయలు భక్తులు హుండీ ద్వారా కానుకలుగా సమర్పించారు. ఇక సర్వదర్శనం భక్తులతో వైకుంఠం క్యూ కాంప్లెక్సులోని అన్ని కంపార్ట్మెంట్లు భక్తులతో నిండిపోవడంతో బయట ఎంబసీ వరకూ క్యూలైన్సులో వేచి ఉన్నారు. దీంతో స్వామి వారి సర్వ దర్శనానికి 36 గంటల సమయం‌ పడుతోంది.‌ ఇక ప్రత్యేక ప్రవేశ దర్శనానికి మూడు గంటల సమయం పడుతుంది.

శుక్రవారం స్పెషల్ పూజలివే..!

శ్రీవారి ఆలయంలో వైఖానస ఆగమ శాస్త్రం ప్రకారం శ్రీ వేంకటేశ్వరుడికి కైంకర్యాలు నిర్వహిస్తున్నారు. శుక్రవారం ప్రత్యూషకాల ఆరాధనతో ఆలయ ద్వారము తెరిచిన అర్చకులు.. బంగారు వాకిలి వద్ద శ్రీ వేంకటేశ్వర సుప్రభాత స్త్రోతంతో స్వామి వారిని మేలు కొలిపారు. అనంతరం ఆకాశ జలాలతో శ్రీ వేంకటేశ్వరుడికి అభిషేక సేవను ఆలయ అర్చకులు శాస్త్రోక్తంగా నిర్వహించారు.‌ అటుతరువాత తోమాల, అర్చన సేవలు నిర్వహించిన అర్చకులు.. ప్రాతఃకాల ఆరాధనలో‌ భాగంగా స్నపన మండపంలో శ్రీకొలువు శ్రీనివాసమూర్తిని వారి సమక్షంలో దర్భార్ నిర్వహించారు. శ్రీవారికి పంచాంగ శ్రవణం, హుండీ జనాకర్షణ విన్నవించి, బెల్లంతో కలిపిన నువ్వుల పిండిని స్వామి వారికి నైవేద్యంగా సమర్పించారు. నవనీత హారతి సమర్పించి అనంతరం శ్రీనివాసమూర్తిని తిరిగి సన్నిధిలో వేంచేపు చేశారు. ప్రాతఃకాల ఆరాధనలో భాగంగా మొదటి ఘంటా నివేదనలో "బెల్లం పూర్ణం బోండాలు, పోలీల" శుక్రవారం ప్రత్యేకంగా నివేదిస్తారు. ఇక వీటితో పాటుగా అన్నప్రసాదం, లడ్డూ, వడలు స్వామి వారికి నైవేద్యంగా సమర్పించారు.