Crime News: అమ్మాయి మోసం చేసింది.. ఆత్మహత్య చేసుకుంటున్నా.. యువకుడి సెల్ఫీ వీడియో వైరల్

ప్రేమించిన అమ్మాయి మోసం చేసిందని ఓ యువకుడు ఆత్మహత్య చేసుకున్నాడు. ఆత్మహత్యకు ముందు తీసిన వీడియో ఇప్పుడు వైరల్‌గా మారింది.

అమ్మాయి మోసం చేసిందని యువకుడి ఆత్మహత్య

తూర్పుగోదావరి జిల్లా అయినవిల్లి మండలం మాగం కొప్పిశెట్టివారి పాలెంలో విషాదం నెలకొంది. ప్రేమించిన అమ్మాయి మోసం చేసిందని ఓ యువకుడు నిండు ప్రాణాన్ని తీసుకున్నాడు. సూసైడ్ చేసుకోవడానికి ముందు యువకుడు తీసిన సెల్ఫీ వీడియో కలకలం రేపుతోంది. ఇప్పుడు జిల్లాలో ఈ వీడియో వైరల్‌గా మారింది. 

అయినవిల్లి మండలం మాగం కొప్పిశెట్టివారి పాలెం వాసి కొప్పిశెట్టి శంకరరావు అనే యువకుడు ఆత్మహత్య తూర్పుగోదావరి జిల్లాలోనే సంచలనంగా మారింది. తాను ఓ అమ్మాయిని ప్రేమించి మోసపోయానంటూ సెల్ఫీ వీడియో తీసి ఆత్మహత్య చేసుకున్నాడు. 

ప్రేమపేరుతో తన వద్ద నుంచి భారీగా డబ్బులు, బంగారం తీసుకుని ఇప్పుడు వేరే పెళ్ళి చేసుకుంటుందని శంకరరావు సెల్ఫీ వీడియోలో చెప్పాడు. ఈ విషయాన్ని అందరికీ చెప్పేందుకు వాట్సాప్‌గ్రూప్‌లు క్రియేట్ చేసి అన్ని గ్రూప్‌లో కూడా ఆ అమ్మాయితో క్లోజ్‌గా ఉన్న ఫొటోలు వీడియోలు షేర్ చేశాడు. ఉంగరాలు మార్చుకున్న వీడియో కూడా షేర్ చేశాడు. 

శంకరరావుకు ఇప్పటికే పెళ్లి అయిందన్న ప్రచారం సాగుతోంది. ఆ అమ్మాయిని కూడా ప్రేమించి పెళ్లి చేసుకున్నాడని.. ఇప్పుడు వాళ్లిద్దరూ వేర్వేరుగా ఉంటున్నారని ఆమెతో విడిపోయాడని స్థానికులు చెబుతున్నారు. 

మొదటి భార్యతో విభేదాలు ఉన్న పరిస్థితుల్లో ఈ అమ్మాయికి కనెక్ట్ అయినట్టు తెలుస్తోంది. భార్య ఉందన్న విషయాన్ని చెప్పకుండానే ఈ అమ్మాయిని ప్రేమించాడని.. ఈ విషయం తెలిసిన తర్వాత అమ్మాయి వేరే పెళ్లికి ఒప్పుకుందని కూడా స్థానికులు అంటున్నారు. 

ఎవరి వాదన ఎలా ఉన్నా ఇప్పుడు నిండు ప్రాణం పోవడం ఊరిలో తీవ్ర విషాదం నింపింది. వీళ్లిద్దరు క్లోజ్‌గా ఉన్న ఫొటోలు, వీడియోలు వైరల్‌గా మారాయి. సోషల్ మీడియాలో విపరీతంగా షేర్‌ అవుతున్నాయి.