Rains: మరో అల్పపీడనం - ఏపీలోని ఈ జిల్లాల్లో వర్షాలు

Andhra News: దక్షిణ అండమాన్ మీదుగా ఉపరితల ఆవర్తనం ప్రభావంతో ఈ నెల 15 నాటికి అల్పపీడనంగా మారే ఛాన్స్ ఉందని వాతావరణ శాఖ తెలిపింది. సోమవారం ప్రకాశం, నెల్లూరు, రాయలసీమల్లో భారీ వర్షాలు కురిసే ఛాన్స్ ఉంది.

అల్పపీడన ప్రభావంతో ఏపీకి వర్ష సూచన

Source : Twitter (X)

Rains In Ap Districts Due To Low Pressure: దక్షిణ అండమాన్ సముద్రం మీదుగా శనివారం నాటికి ఉపరితల ఆవర్తనం విస్తరించే ఛాన్స్ ఉందని ఏపీ వాతావరణ శాఖ (AP Weather Department) తెలిపింది. ఇది ఈ నెల 15 నాటికి అల్పపీడనంగా మారి.. అనంతరం 48 గంటల్లో పశ్చిమ - వాయువ్య దిశగా తమిళనాడు తీరం వైపు కదిలే అవకాశం ఉందని అంచనా వేసింది. ఈ ప్రభావంతో సోమవారం.. ప్రకాశం, నెల్లూరు, రాయలసీమ జిల్లాల్లో అక్కడక్కడ మోస్తరు నుంచి భారీ వర్షాలు కురిసే ఛాన్స్ ఉందని తెలిపింది. మంగళవారం కోస్తా, రాయలసీమల్లో విస్తారంగా మోస్తరు వర్షాలు కురిసే అవకాశం ఉందని వెల్లడించింది. చాలా చోట్ల చెదురుమదురుగా భారీ వర్షాలు కురిసే సూచనలు ఉన్నాయని.. రైతులు వ్యవసాయ పనుల్లో తగిన జాగ్రత్తలు తీసుకోవాలని అధికారులు సూచిస్తున్నారు.

'ప్రజలు అప్రమత్తంగా ఉండాలి'

అటు, బంగాళాఖాతంలో అల్పపీడనంతో భారీ వర్షాలు కురుస్తోన్న క్రమంలో హోంమంత్రి వంగలపూడి అనిత అధికార యంత్రాంగాన్ని అలర్ట్ చేశారు. తిరుపతి జిల్లా ప్రజలు అప్రమత్తంగా ఉండాలన్నారు. ఘాట్ రోడ్లలో ప్రయాణించే శ్రీవారి భక్తులు సహా వాహనదారులు జాగ్రత్తగా ప్రయాణించాలని కోరారు. కొండ చరియలు విరిగిపడే ప్రమాదం ఉన్న ప్రాంతాల ప్రజలు, అధికారులను అప్రమత్తంగా ఉండాలని సూచించారు.