Pawan Kalyan: ఎన్డీయే నుంచి జనసేన ఔట్? - ఎట్టకేలకు స్పందించిన పవన్ కళ్యాణ్

Pawan kalyan: ఎన్డీయేకు పవన్ కళ్యాణ్ కటీఫ్ చెప్పనున్నారనే వార్తలు జోరుగా వస్తున్నాయి. ఈ వార్తలపై ఇవాళ పవన్ కళ్యాణ్ స్పందించారు.

పవన్ కళ్యాణ్

Pawan Kalyan: మొత్తం 175 సీట్లు వైసీపీకే వస్తాయని ఆ పార్టీలు నేతలు చెబుతున్నారని, అలాంటప్పుడు జనసేనకు భయపడాల్సిన అవసరం లేదని జనసేన అధినేత పవన్ కళ్యాణ్ తెలిపారు. టీడీపీ, జనసేన కలిస్తే వైసీపీ భయపడాల్సిన అవసరం లేదన్నారు. మొత్తం సీట్లు మీకు వస్తే టీడీపీ, జనసేనకు భయపడనక్కర్లేదు కదా? అని ప్రశ్నించారు. ఎన్డీయే కూటమిలో మేము ఉంటే ఏంటి..? లేకపోతే మీకు ఏంటి? అని వైసీపీ నేతలను నిలదీశారు. జనసేనకు 170 ఎమ్మెల్యే సీట్లు, 30 ఎంపీ సీట్లు ఉంటే ప్రతిపక్షాల ఊసే ఎత్తనని, రాబోయే ఎన్నికల్లో ఖచ్చితంగా వైసీపీ భవిష్యత్తు తేలుస్తానని అన్నారు. తనపై దాడి చేయడానికి వైసీపీ శ్రేణులు కార్యాలయం చుట్టూ మోహరించారని. ఆ సమయంలోనే తాను పారిపోకుండా ఆఫీసులోనే కూర్చున్నట్లు పవన్ స్పష్టం చేశారు.

నాలుగో విడత వారాహి విజయ యాత్రలో భాగంగా కృష్ణా జిల్లాలోని ముదినేపల్లిలో పవన్ కళ్యాణ్ ఇవాళ బహిరంగ సభ నిర్వహించారు. ఈ సందర్బంగా మాట్లాడుతూ.. జనసేన అధికారంలోకి రాగానే పెంచిన మద్యం ధరలను తగ్గిస్తామని హామీ ఇచ్చారు. మద్యపాన నిషేధం చేస్తామనే అబద్దపు మాటలు తాను చెప్పనన్నారు.  వైసీపీ ప్రభుత్వం దాడులను ప్రోత్సహిస్తుందని, తాము గెలిచిన తర్వాత మీరు నిలబడి ఉంటారా? లేదా? చూడండి అని హెచ్చరించారు. ధైర్యం ఉంటే తాము గెలిచాక మీరు మీ కార్యాలయాల్లోనే ఉండండి అని సవాల్ విసిరారు. కైకలూరులో జనసైనికులను ఇబ్బందులకు గురిచేశారని ఆరోపించారు. కైకలూరులో ఒక వంతెన కూడా నిర్మించలేకపోయారని, వంతెనకు 80 శాతం ఖర్చు చేసినా ఇప్పటికీ పూర్తి కాలేదన్నారు. రోడ్లు వేయలేని ముఖ్యమంత్రికి ఓట్లు వేయాలా? అని ప్రశ్నించారు. ఒక వంతెన కట్టలేక 45 గ్రామాలను ఇబ్బంది పెడుతున్నారని, కైకలూరు ఎమ్మెల్యే, ఆయన కుమారుడికి కొమ్ములు విరగ్గొడతామని పవన్ హెచ్చరించారు.

ఐదేళ్లు అధికారంలో ఉంటేనే ఇక్కడి ఎమ్మెల్యే, ఆయన కుమారుడికి కొమ్ములు వచ్చాయని, వారి కొమ్ములను విరిచి కింద కూర్చోబెడతామని పవన్ కళ్యాణ్ హెచ్చరించారు. వైసీపీ రహిత ఆంధ్రప్రదేశ్‌ను ఏర్పాటు చేస్తామని, ప్రభుత్వం మారిన రోజున కొల్లేరు మొత్తం తిప్పిస్తామన్నారు. ఓ ఎమ్మెల్యే.. వైఎస్‌కే ఎదురునిలిచినవాడిని.. నువ్వెంత..? నీ బతుకెంత? అంటూ కైకలూరు ఎమ్మెల్యేకు వార్నింగ్ ఇచ్చారు. వైసీపీ అద్బుతంగా పాలిస్తే వచ్చే ఎన్నికల్లో గెలవాలని, భయపడుతున్నారంటే తమకు బలం ఉందని ఒప్పుకున్నట్లేనని అన్నారు. ఏపీలో వైసీపీ జెండా తప్ప వేరేది ఉండకూడదా? ఏపీలో ఫ్యాక్షనిజం చేయాలనుకుంటున్నారా? అని పవన్ ప్రశ్నించారు. 

జనసేన క్యాడర్‌పై ఎస్సీ, ఎస్టీ కేసులు నమోదు చేస్తున్నారని, ఎవరిపై ఏ కేసులు పెట్టారో అన్ని గుర్తు ఉన్నాయని  పవన్ వ్యాఖ్యానించారు.. వారసత్వ రాజకీయాల పల్ల తనకు ఇబ్బందేమీ లేదని, వైఎస్సార్‌ను ఎదురించి కూడా తాను ఎక్కడికీ పోలేదని అన్నారు.  సీఎం జగన్ అంచెలంచెలుగా ప్రజల జీవితాలను గుప్పిట్లో పెట్టుకుంటున్నారని ఆరోపించారు. పవన్ బహిరంగ సభకు భారీగా కార్యకర్తలు, ప్రజలు హాజరయ్యారు. కృష్ణా జిల్లాలో చివరి రోజు యాత్ర కావడంతో జనాలు పోటెత్తారు. అంతుకుముందు పవన్ భారీ ర్యాలీ నిర్వహించారు. ఈ ర్యాలీలో జనసైనికులు భారీగా పాల్గొన్నారు.