నెల్లూరులో మెకానిక్‌ కాలాన్ని వెనక్కి తిప్పేస్తున్నారు!

గడియారం ముల్లు క్లాక్ వైజ్ గానే ఎందుకు తిరగాలి, వెనక్కి తిరిగితే తప్పేంటి. ఇలా ఆలోచించేవారిని ఎవరైనా వింతగా చూస్తారు. కానీ నెల్లూరులో ఓ వ్యక్తి ముల్లు వెనక్కి తిరిగేలా గడియారం తయారు చేశాడు.

ఈ గడియారం వెనక్కి తిరుగుతుంది.

గడియారం ముల్లు క్లాక్ వైజ్ గానే ఎందుకు తిరగాలి, వెనక్కి తిరిగితే తప్పేంటి. ఇలా ఆలోచించేవారిని ఎవరైనా వింతగా చూస్తారు. కానీ గడియారం ముల్లు వెనక్కి తిరగడం అనే కాన్సెప్ట్ కాస్త కొత్తగా ఉన్నా.. అక్కడక్కడా ఇలాంటి ప్రయోగాలు చేస్తూనే ఉంటారు కొంతమంది. అలాంటి అరుదైన వ్యక్తి నెల్లూరు జిల్లా ఆత్మకూరుకి చెందిన భాషా. పదిహేనేళ్లుగా ఆత్మకూరులో వాచ్ షాప్ నిర్వహిస్తున్న ఈయన రివర్స్ క్లాక్ తయారు చేశాడు.

గోడ గడియారం కానీ, వాచ్ కానీ తిరగడానికి మెకానిజం అవసరం. కీ ఇస్తే తిరిగే వాచీలు, బ్యాటరీ సహాయంతో తిరిగే గడియారాలు.. ఇలా వీటిలో అన్ని రకాలు ఉంటాయి. అయితే వీటిలో మెకానిజం మాత్రం ఒకటే. వాల్ క్లాక్ మూమెంట్ లో సెకన్ల ముల్లు, నిమిషాల ముల్లు, గంటల ముల్లు తిరిగేందుకు వేర్వేరుగా చక్రాలు ఉంటాయి. వాటిని ఒక్కొక్కటీ వేరు చేస్తూ పోతే లోపల సర్క్యూట్ బోర్డ్ ఉంటుంది. ఆ బోర్డ్ లో ఉన్న ఎర్త్ ప్లేట్ ని రివర్స్ చేసి పెడితే ముల్లు రివర్స్ లో తిరుగుతుంది.

ముల్లు రివర్స్ లో తిరిగినా గడియారం మాత్రం సరైన సమయం చూపించాలంటే ఆ గడియారంలో కూడా మనం మార్పులు చేసుకోవాల్సి ఉంటుంది. గడియారంలో పైన 12 తర్వాత 1, 2, 3 అంకెలు కుడివైపుగా ఉంటాయి. రివర్స్ క్లాక్ లో ఈ అంకెలన్నీ తారుమారైపోతాయి. 12కి ఎడమవైపున 1 వస్తుంది. ఆ తర్వాత రెండు వస్తుంది. ఇలా అంకెలు తారుమారు చేసి గడియారంలో కొత్త అంకెలతో కూడిన షీట్ ని అతికించుకోవాలి. ఇక ఈ షీట్ కి ఎర్త్ ప్లేట్ రివర్స్ చేసిన వాల్ క్లాక్ మూమెంట్ ని బిగిస్తే అది రివర్స్ గడియారం అయిపోతుంది.

రివర్స్ గడియారాలకు క్రేజ్ కూడా బాగానే ఉంటుంది. వీటికోసం కొన్ని ఆన్ లైన్ షాపింగ్ వెబ్ సైట్స్ ప్రత్యేకంగా సేల్స్ పెడుతున్నాయి. అయితే చాలా చోట్ల స్టాక్ ఉండదు. అతి తక్కువగా మాత్రమే వీటిని అమ్మకాలకు పెడుతుంటారు. నేరుగా షాపుల్లో వీటిని కొనుగోలు చేయాలంటే మాత్రం కాస్త కష్టమే. చాలా చోట్ల పెద్దపెద్ద వాచ్ షాపుల్లో కూడా రివర్స్ క్లాక్ అంటే తమకు తెలియదనే చెబుతారు. అయితే చిన్న టెక్నిక్ తో మన వద్ద ఉన్న గోడగడియారాలను ఇలా రివర్స్ లో తిరిగేలా చేయొచ్చు.

రివర్స్ క్లాక్ ని ఇంటిలో ఉపయోగించాలంటే కాస్త కష్టమే. దీన్ని ఉపయోగించడం అలవాటయ్యే వరకు వెంటనే టైమ్ అడిగితే చెప్పలేం. అలవాటు అయితే మాత్రం మామూలు గడియారాల్ల టైమ్ చూడటం కాస్త ఇబ్బందిగా ఉంటుంది. రివర్స్ క్లాక్ ని మొట్టమొదటిసారిగా ఎవరైనా చూస్తే మాత్రం షాకవ్వాల్సిందే. ఎందుకంటే గడియారంలో అంకెలన్నీ తారుమారై ఉంటాయి. అందులోనూ గడియారం వెనక్కు తిరుగుతుంది. ఒక్కసారిగా ఇలాంటి గడియారాన్ని చూస్తే తమ కళ్లను తామే నమ్మలేరు చాలామంది. ఆసక్తి ఉన్నవారు మాత్రమే ఇలాంటి రివర్స్ గడియారాలను ఇళ్లలో పెట్టుకుంటారు. ఆ ఇంటికి వచ్చినవారందరికీ అనుకోని సర్ ప్రైజ్ ఇస్తారు.