Nellore Crime News: నెల్లూరులో కేటుగాళ్లు.. సీసీ కెమెరాలు లేని ప్రాంతాల్లోనే దోపిడీ

Nellore Thieves: సీసీ కెమెరాలకు దొరక్కుండా దొంగతనాలు చేస్తున్న నలుగురిని నెల్లూరు పోలీసులు అరెస్ట్ చేశారు. వారి ప్లాన్లు చూసి ఆశ్చర్యపోయారు.

నెల్లూరు దొంగలు అరెస్ట్

Source : whatsapp

Andhra Pradesh Crime News: ఆ నలుగురు యువకులు జల్సాలకు అలవాటు పడి దొంగతనాలు మొదలు పెట్టారు. అయితే వారు చేసిన దొంగతనాల కేసుల్లో ఎక్కడా చిన్న క్లూ కూడా వదిలేవారు కాదు. సీసీ కెమెరాలు లేని ఏరియాల్లోనే పక్కాగా రెక్కీ నిర్వహించి దొంగతనం చేసేవారు. అనుకోకుండా పోలీసులకు దొరికారు. 

క్రైమ్ సీన్ లో సీసీ కెమెరాలే ఇప్పుడు కీలక సాక్ష్యాలు. ఒకవేళ వాటిని ధ్వంసం చేసినా.. అలా చేస్తున్నప్పుడు కెమెరాల్లో కదలికలు రికార్డ్ అవుతాయి. వాటి ద్వారా ఆనవాళ్లు పట్టేస్తారు పోలీసులు. ఈ రిస్క్ అంతా ఎందుకు అనుకున్నారు నెల్లూరులో నలుగురు దొంగలు. అసలు సీసీ కెమెరాల జాడే లేని ఏరియాల్లో దొంగతనాలు చేస్తూ దర్జాగా తిరుగుతున్నారు. వైన్ షాపు దగ్గర వారి పరిచయం ఏర్పడింది. ఎవరికి వారు విడివిడిగా దొంగతనాలు చేసేవారు. ఆ తర్వాత నలుగురు జట్టు కట్టారు. గతంలో కొన్నిసార్లు అరెస్టై జైలుకి వెళ్లొచ్చారు. జైలుకెళ్లొచ్చిన తర్వాత తెలివి మీరారు. సీసీ కెమెరాలు లేని ప్రాంతాలను ఎంపిక చేసుకుని మరీ దొంగతనాలు మొదలు పెట్టారు. ఇటీవల వరుస చోరీలపై పోలీసులకు అనుమానం వచ్చింది. సీసీ కెమెరాలు లేని ప్రాంతాల్లో వరుస దొంగతనాలు జరుగుతుండే సరికి పోలీసులు నిఘా పెట్టారు. ఆ పని పాత నేరస్థులదేనని తేల్చారు. సురేష్‌ , కిశోర్‌, సిద్దూ, మహేష్‌.. ఆ నలుగురు దొంగల్ని అదుపులోకి తీసుకున్నారు.

ఇటీవల కాలంలో నెల్లూరు నగరంలోని రిత్విక్‌ ఎన్‌క్లేవ్‌ లో ఓ మోటార్‌ సైకిల్ ని వీరు దొంగిలించారు. మరో ఇంట్లో అరకేజీ వెండి వస్తువులు కాజేశారు. మాగుంట లేఅవుట్‌లోని ఓ కన్సల్టెన్సీ ఆఫీస్ లో ల్యాప్‌టాప్‌ చోరీ చేశారు. ఆకుతోట సమీపంలోని గవర్నమెంట్ వైన్ షాప్ లో 2 లక్షల రూపాయలకు పైగా దోపిడీ చేశారు. పొదలకూరు రోడ్ లోని ఓ ఇంటి తాళాలు పగులగొట్టి వెండి వస్తువులు, ల్యాప్‌ టాప్‌ లు చోరీ చేశారు. నెల్లూరులోనే కాదు.. చుట్టుపక్కల ప్రాంతాల్లో కూడా వీరు పక్కా ప్లానింగ్ తో దొంగతనాలు చేస్తున్నారు. మనుబోలు గ్రామంలో సబ్‌ పోస్టాఫీసులో క్యాష్‌ బాక్స్‌ ని కూడా దోచుకున్నారు. మరో చోట కేజీ 300 గ్రాముల వెండి దోచుకున్నారు. వెంకటాచలంలో కూడా వైన్ షాప్ వాచ్‌ మెన్‌ పై కత్తులతో దాడిసి అతడిని గాయపరిచారు. షాప్ నుంచి రెండున్నర లక్షల రూపాయలు, వైన్ బాటిల్స్ దోచుకెళ్లారు. 

ఆ నలుగురిని పోలీసులు అరెస్ట్ చేశారు. వారి వద్ద నుంచి 3 కేజీల వెండి వస్తువులు, బైక్‌, మూడు ల్యాప్‌టాప్‌లు, రూ.60 వేల క్యాష్.. సెల్ ఫోన్లు స్వాధీనం చేసుకున్నారు నెల్లూరు పోలీసులు. మొత్తం రూ.6 లక్షల విలువైన సొత్తు రికవరీ చేశామని తెలిపారు. వీరిలో ఇద్దరిపై చెరో 20 కేసులు ఉన్నాయి, మరో నిందితుడిపై 11 పాత కేసులున్నాయి. ఇంకొకడిపై 8 కేసులున్నాయి. వీరంతా పాతికేళ్ల లోపువారే. జల్సాలకు అలవాటు పడి, నేరస్థులుగా జీవితం గడుపుతున్నారు. జైలుకి వెళ్లొచ్చినా, తిరిగి దొంగతనాలకు పాల్పడుతూ జీవనం సాగిస్తున్నారు.