Micro Art: సూక్ష్మ కళలో సిద్ధహస్తుడు.. నెల్లూరు ముసవీర్..

సెలబ్రేషన్ ఏదైనా, పండగ ఎలాంటిదైనా ఆయన చాలా ప్రత్యేకంగా చూపిస్తాడు. శుభాకాంక్షలు చెప్పడానికి.. ఆల్‌ది బెస్ట్ చెప్పడంలో ఆయనదే స్పెషల్ హ్యాండ్. ప్రతి అంశాన్ని సూక్ష్మంగా చూడటం ఆయనకు ఉన్న స్పెషాలిటీ.

Micro_Artist

బంగారు వస్తువులు కానీ, ఆభరణాలు కానీ అందరికీ కనిపించేలా, అందరూ గుర్తించేలా ఉండాలనుకుంటారు చాలామంది. కానీ నెల్లూరు నగరానికి చెందిన ముసవీర్ మాత్రం కంటికి కనిపించనంత సూక్ష్మమైన బంగారు వస్తువుల్ని, జ్ఞాపికలను తయారు చేస్తూ అందరితో శభాష్ అనిపించుకుంటున్నారు. ఈ సూక్ష్మ కళలో నెల్లూరు జిల్లాకే కాదు, ఆయన ఆంధ్రప్రదేశ్‌కే ప్రత్యేక గుర్తింపు తెచ్చారు. తెలుగు రాష్ట్రాల్లో ఉన్న ఏకైక సూక్ష్మ స్వర్ణ కళాకారుడు ముసవీర్ ఒక్కరే. 

క్రికెట్ వరల్డ్ కప్ బీజం వేసింది..

క్రికెట్‌ వరల్డ్ కప్ సందర్భంగా కప్ నమూనాను సూక్ష్మమైన జ్ఞాపికగా తయారు చేసి టీమ్ ఇండియాకి శుభాకాంక్షలు చెప్పడంతో ముసవీర్ సూక్ష్మ స్వర్ణ కళ వెలుగులోకి వచ్చింది. అప్పటి వరకు అందరు స్వర్ణకారులలాగే తాను కూడా ఆభరణాలు తయారు చేసేవాడు. ఆ తర్వాత మాత్రం అతను కేవలం సూక్ష్మమైన జ్ఞాపికల తయారీకే పరిమితం అయ్యారు. 

అన్ని పండగలకీ శుభాకాంక్షలు..

సంక్రాంతి అయినా, రంజాన్ అయినా, క్రిస్మస్ అయినా.. అన్ని మతాల పండగలకు తన జ్ఞాపికలతో శుభాకాంక్షలు చెబుతుంటారు ముసవీర్. నెల్లూరు పక్షుల పండగ సందర్భంగా ఆయన తయారు చేసిన ఫ్లెమింగోస్ కి అరుదైన గుర్తింపు లభించింది. ఇక కను రెప్పపై నిలబడేలా ఆయన తయారు చేసిన తాజ్ మహల్ నమూనా నిజంగా అద్భుతం. ఒకటి కాదు, రెండు కాదు... ఇలా వందలకొద్దీ సూక్ష్మ కళారూపాలను తయారు చేశారు, చేస్తున్నారు ముసవీర్. 

కళ.. కళ కోసమే.. 

ఇప్పటి వరకూ తాను తయారు చేసిన సూక్ష్మ కళారూపాలను ఎక్కడా ఎవరికీ అమ్మలేదు ముసవీర్. వాటికోసం చాలామంది తనను సంప్రదించినా.. అమ్మకానికి పెట్టలేదని, కళను అమ్ముకోబోనని చెబుతారాయన. ప్రభుత్వ సాయం ఉంటే.. తన కళారూపాలతో ఎగ్జిబిషన్ పెట్టాలనే ఆలోచన ఆయనకు ఉంది. 

అవార్డులు, రివార్డు లు లెక్కలేనన్ని.. 

సూక్ష్మ కళతో అందరి దృష్టినీ ఆకర్షించిన ముసవీర్ కి అవార్డులు, రివార్డులు లెక్కలేనన్ని వచ్చాయి. జిల్లా అధికార యంత్రాంగం నుంచి ఆయనకు సత్కారాలు కూడా దక్కాయి. లిమ్కా బుక్ ఆఫ్ రికార్డ్స్, ఇండియన్ బుక్ ఆఫ్ రికార్డ్స్ ఆయన సొంతం. 1 గ్రాము 400 మిల్లీగ్రాముల బరువు ఉండే బంగారంతో.. జాతీయ గీతంలోని అన్ని అక్షరాలను రూపొందించి అరుదైన రికార్డ్ సృష్టించారు ముసవీర్. ఇప్పటి వరకు 30 ప్రపంచ రికార్డులు సొంతం చేసుకున్నారు. గిన్నిస్ బుక్ రికార్డ్స్ లో స్థానం సంపాదించాలనేదే తన జీవితాశయం అంటారు ముసవీర్.