Kurnool Wakf Tribunal : కర్నూలులో వక్ఫ్ బోర్డు ట్రిబ్యూనల్‌ ఏర్పాటు చేయకూడదనే చట్టం ఉందా? పిటిషనర్‌కు ఏపీ హైకోర్టు ప్రశ్న !

కర్నూలులో వక్ఫ్ బోర్డు ట్రిబ్యూనల్ ఏర్పాటు చేయాలన్న జీవోపై మధ్యంతర ఉత్తర్వులు ఇచ్చేందుకు ఏపీ హైకోర్టు నిరాకరించిది. కార్యాలయాలను ఎక్కడ ఏర్పాటు చేయాలన్న అంశంపై ప్రభుత్వానికి నిర్ణయాధికారం ఉందన్నారు.

కర్నూలులో వక్ఫ్ బోర్డు ట్రిబ్యూనల్‌ ఏర్పాటుపై జోక్యం చేసుకునేందుకు హైకోర్టు నిరాకరణ

కర్నూలులో వక్ఫ్ బోర్డు ట్రిబ్యూనల్ ఏర్పాటు చేయకూడదని ఏ చట్టంలో ఉందని ఆంధ్రప్రదేశ్ హైకోర్టు పిటిషనర్‌ను ప్రశ్నించింది. ఏపీ ప్రభుత్వం  రాష్ట్ర వక్ఫ్‌ ట్రిబ్యునల్‌ను కర్నూలులో ఏర్పాటు చేస్తూ ప్రభుత్వం గత నెల 25న జీవో జారీ చేసింది. దీన్ని నిలిపివేయాలని కోరుతూ విజయవాడకు చెందిన మహ్మద్‌ ఫరూక్‌ షుబ్లీ  ప్రజా ప్రయోజన వ్యాజ్యం దాఖలు చేశారు. ఈ ట్రిబ్యూనల్‌ను విజయవాడలో ఏర్పాటు చేస్తూ 2016లోనే జీవో జారీ అయిందని..ఇప్పుడు కర్నూలుకు తరలించడం మైనార్టీల హక్కులను హరించడమేనని పిటిషనర్ తరపు న్యాయవాది ధర్మాసనం సృష్టికి తీసుకెళ్లారు.

 అయితే ప్రభుత్వ నిర్ణయంలో  జోక్యం చేసుకునే పరిధి తమకెక్కడిదని పిటిషనర్ తరపు న్యాయవాదిని ప్రశ్నించింది. కర్నూలులో ట్రిబ్యునల్‌ ఏర్పాటు వల్ల పిటిషనర్‌కొచ్చిన నష్టం ఏమిటని ప్రశ్నించింది. కర్నూలులో  ట్రిబ్యూనల్ ఏర్పాటు  చేయకూడదని ఏ చట్టంలో ఉందని ప్రశ్నించింది.  కర్నూలులో ట్రిబ్యునల్‌ ఏర్పాటుకు స్పష్టమైన కారణాలున్నాయని  ప్రభుత్వం తరపున వాదించిన ఏజీ శ్రీరామ్ తెలిపారు.  అత్యధిక ముస్లిం జనాభా కర్నూలులో ఉందన్నారు.  ఈ వివరాలను అఫిడవిట్ రూపంలో సమర్పించాలని ఆదేశించింది.   జీవో 16 అమలును నిలిపివేస్తూ మధ్యంతర ఉత్తర్వులు జారీ చేసేందుకు హైకోర్టు నిరాకరించింది. 

కర్నూలులో వక్ఫ్‌ ట్రిబ్యునల్‌ ఏర్పాటు చేయకూడదని ఏ చట్టంలో ఎలాంటి నిషేధం లేదని తేల్చిచెప్పింది. ప్రభుత్వ నిర్ణయం వల్ల ఏ ఒక్కరి ప్రాథమిక హక్కులకు భంగం కలగడం లేదంది. విశాఖపట్నం, అనంతపురం నుంచి హైకోర్టుకు వస్తున్నారని, అలాంటప్పుడు కర్నూలుకు వెళ్లడానికి ఇబ్బంది ఏమిటని పిటిషనర్‌ను ప్రశ్నించింది. గతంలో  వక్ఫ్‌బోర్డు ఏర్పాటు చేయకపోవడాన్ని సవాలు చేస్తూ దాఖలైన వ్యాజ్యంతో జత చేయాలని రిజిస్ట్రీని ఆదేశించింది.  తదుపరి విచారణ జనవరి మూడో తేదీకి వాయిదా వేసింది. 

 

 

 

ఇంట్రస్టింగ్‌ వీడియోలు, విశ్లేషణల కోసం ABP Desam YouTube Channel సబ్‌స్క్రైబ్‌ చేయండి