అతి త్వరలోనే క్రిస్‌ సిటీ తొలి దశ నిర్మాణం ప్రారంభం!

జగన్‌ ప్రభుత్వం ఎంతో ప్రతిష్టాత్మకంగా నిర్మించదలచిన భారీ పారిశ్రామిక నగరం అభివృద్ధికి శ్రీకారం చుట్టబోతోంది. చెన్నై- బెంగళూరు పారిశ్రామిక కారిడార్లో భాగంగా ఈ నగరాన్ని మూడు దశల్లో నిర్మించడం జరుగుతుంది.

క్రిస్‌ సిటీ

జగన్‌ ప్రభుత్వం ఎంతో ప్రతిష్టాత్మకంగా నిర్మించదలచిన భారీ పారిశ్రామిక నగరం అభివృద్ధికి శ్రీకారం చుట్టబోతోంది. చెన్నై- బెంగళూరు పారిశ్రామిక కారిడార్ లో భాగంగా ఈ నగరాన్ని మూడు దశల్లో నిర్మించడం జరుగుతుంది. దీనికి సంబంధించిన మొదటి దశ అభివృద్దికి పర్మిషన్‌ ఇచ్చింది.

కృష్ణపట్నం నోడ్‌ అభివృద్ధికి కేంద్ర ప్రభుత్వ నేషనల్‌ ఇండస్ట్రీయల్‌ కారిడార్‌ డెవలప్‌మెంట్‌ కార్పొరేషన్‌ లిమిటెడ్‌ ఏపీఐఐసీతో కలిసి క్రిస్‌ సిటీ  పేరుతో ఓ ప్రత్యేక కంపెనీని ఏర్పాటు చేసింది. ఈ క్రిస్ సిటీలో కొన్ని ప్రత్యేకతలున్నాయి. ఈ సిటీలో భారీ పరిశ్రమలతో పాటు వాక్‌ టు వర్క్‌ విధానంలో అక్కడే నివాసముండేలా ఓ నగరాన్ని కూడా నిర్మాణం చేపట్టింది.

పరిశ్రమలతోపాటు అక్కడ ఉండే నివాస ప్రాంతానికి కూడా అత్యాధునిక వసతులు ఏర్పాటు చేస్తుంది. ఈ సిటీ మొత్తం 10,834.5 ఎకరాల విస్తీర్ణంలో ఏర్పాటవుతుంది. ముందు దశలో రూ.1,503.16 కోట్లతో సుమారు 2,500 ఎకరాల అభివృద్ధికి రాష్ట్ర ప్రభుత్వం అనుమతులిచ్చింది.

ఈపీసీ విధానంలో క్రిస్‌ సిటీలో కీలక మౌలిక వసతుల కల్పనకు రూ. 1,021.41 కోట్ల విలువైన పనులకు ఏపీఐఐసీ త్వరలో టెండర్లు పిలవనుంది. 2022-23 ఎస్‌వోఆర్‌ ధరల ప్రకారం టెండర్లను పిలవనున్నట్లు అధికారులు మీడియాకి తెలిపారు. 

ఈ టెండర్లను జ్యుడిషియల్ ప్రివ్యూకు కూడా పంపినట్లు చెప్పారు. ఈ టెండర్లలో కాంట్రాక్టు పొందిన సంస్థ ఏదైతే ఉందో ఆ సంస్థ ఇక్కడ అవసరమైన మౌలిక వసతులన్నింటిని ఏర్పాటు చేసి వాటిని అభివృద్ధి చేయాల్సి ఉంటుంది.

క్రిస్ సిటీలో మొత్తంగా 2,006 ఎకరాలు అందుబాటులో ఉండగా అందులో రహదారులుకు సుమారు 494 ఎకరాలు పోగా 2,006 ఎకరాలు అందుబాటులో ఉంటాయని అధికారులు అంచనా వేశారు. ఇందులో 872.7 ఎకరాలు పారిశ్రామిక అవసరాల కోసం వినియోగిస్తే..మిగిలిన ప్రాంతాన్ని వివిధ వసతుల కోసం వినియోగిస్తామని అధికారులు తెలిపారు.

ఈ క్రిస్‌ సిటీ తొలి దశలో పూర్తి స్థాయిలో అందుబాటులోకి వస్తే 78,900 మందికి ఉపాధి లభిస్తుందని అంచనా. ఇందులో సుమారు 77,300 మంది అక్కడే నివాసం ఉంటూ  ఈ సిటీలోనే పని చేస్తారని అధికారులు వివరించారు. 

దీనికి అనుగుణంగా సుమారు 21 వేల కుటుంబాలు నివాసం ఉండేలా గృహ సముదాయాలు, షాపింగ్‌ కాంప్లెక్స్ లు, స్కూల్స్, హాస్పిటల్స్, రవాణా వంటి సదుపాయాలను కూడా కల్పించనున్నారు. 3 సంవత్సరాలలో తొలి దశను ప్రజలకు అందుబాటులోకి తీసుకుని రావాలని ఏపీ ప్రభుత్వం సంకల్పించింది.