TG Assembly Session: తెలంగాణ అసెంబ్లీ సమావేశాలు ప్రారంభం.. 22ఏ భూముల అస్త్రంతో ప్రతిపక్షాలు రెడీ!

TG Assembly Session: తెలంగాణ అసెంబ్లీ సమావేశాలు ప్రారంభం అయ్యాయి. 22ఏ భూముల వ్యవహారం, కాంగ్రెస్ 1000 రోజుల పాలనపై సభలో ప్రధానంగా చర్చ జరిగే అవకాశం ఉంది.

తెలంగాణ అసెంబ్లీ సమావేశాలు ప్రారంభం.. 22ఏ భూముల అస్త్రంతో ప్రతిపక్షాలు రెడీ!

Source : Twitter

Show Quick Read

Key points generated by AI, verified by newsroom

• ప్రతిపక్షాలు ప్రభుత్వ 1000 రోజుల పాలన వైఫల్యాలపై పట్టు.

TG Assembly Session: తెలంగాణ అసెంబ్లీ సమావేశాలు ఇవాళ్టి నుంచి ప్రారంభం అయ్యాయి. 1000 రోజుల పాలనలో సాధించిన విజయాలను ప్రజలకు తెలియజేయాలని కాంగ్రెస్ ప్రభుత్వం సన్నద్ధమవుతోంది. సంక్షేమ పథకాలు, అభివృద్ధిపై అంశాల వారీగా ప్రజలకు వివరించనున్నట్లు తెలుస్తోంది. అలాగే 22ఏ భూముల వ్యవహారంపై సభలో చర్చించడానికి ప్రభుత్వం అన్ని విధాలుగా సిద్ధమవుతోంది. ఈ విషయంపై చర్చకు ప్రతిపక్షాలు డిమాండ్‌ చేస్తున్నాయి. 22ఏపై ప్రతిపక్షాల విమర్శలు, ఆరోపణలకు దీటుగా బదులిచ్చేందుకు కాంగ్రెస్ సర్కారు రెడీ అయినట్లు సమాచారం. బీఆర్ఎస్, బీజేపీ కూడా 22ఏ భూముల వ్యవహారంపై చర్చించాలని పట్టుబడుతున్నాయి. ఈ భూముల వ్యవహారంపైనే రెండు రోజులు చర్చించే అవకాశం ఉందని సమాచారం. కాంగ్రెస్‌ 1000 రోజుల పాలనా వైఫల్యాల లక్ష్యంగా చేసుకుని బీఆర్ఎస్, బీజేపీ చర్చకు రెడీ అవుతున్నాయి. 

4 నుంచి 6 రోజుల పాటు 

తొలిరోజు సమావేశానికి ముందు కొత్తగా నిర్మించిన ‘సెంట్రల్‌ హాల్‌’ను సీఎం రేవంత్‌రెడ్డి ప్రారంభించారు. ఈ హాల్‌కు మాజీ స్పీకర్, దివంగత నేత దుద్దిళ్ల శ్రీపాదరావు పేరుపెట్టారు. ఈ కార్యక్రమం అనంతరం శాసనసభ, మండలి ఉదయం 10 గంటలకు ప్రారంభం అయింది. తొలిరోజు ఇరుసభల్లోనూ ప్రశ్నోత్తరాలను నిర్వహిస్తారు. తెలంగాణ సమగ్ర శిక్షణ, పీఎం స్కూల్‌ ఫర్‌ రైజింగ్‌ ఇండియా, మెట్రో రైలుకు సంబంధించి ఆడిట్‌ రిపోర్టులను సభలో ప్రవేశపెట్టనున్నారు. అనంతరం అసెంబ్లీ వాయిదా పడనుంది. అనంతరం శాసనసభ, శాసన మండలికి వేర్వేరుగా బిజినెస్‌ అడ్వైజరీ కమిటీ(బీఏసీ) సమావేశాలు జరుగుతాయి. ఈ సమావేశాల్లో అసెంబ్లీ ఎన్ని రోజులు నిర్వహించాలి, ఏ అంశాలను చర్చించాలి? అనే దానిపై నిర్ణయం తీసుకుంటారు. అసెంబ్లీ సమావేశాలు సుమారు 4 నుంచి 6 రోజుల పాటు జరిగే అవకాశాలున్నట్లు సమాచారం. చర్చలను బట్టి  సభ నిర్వహణ రోజులను పొడిగించే అవకాశం ఉంది. 

సీఎల్పీ సమావేశం 

అసెంబ్లీ సమావేశాల్లో ప్రతిపక్షాల ప్రశ్నలకు దీటైన సమాధానాలు ఇచ్చేందుకు కాంగ్రెస్‌ పార్టీ సిద్ధం అవుతుంది. ప్రభుత్వ కార్యక్రమాలు, సంక్షేమ పథకాలపై ప్రతిపక్షాల ఆరోపణలను అసెంబ్లీ వేదికగా తిప్పికొట్టాలని ప్రణాళిక సిద్ధం చేసింది. ఇందుకు గాను సీఎల్పీ సమావేశం కూడా నిర్వహించాలని నిర్ణయిచింది. కాంగ్రెస్ ఎమ్మెల్యేలు, ఎమ్మెల్సీలకు సీఎం రేవంత్‌ రెడ్డి ఈ సమావేశంలో దిశానిర్దేశం చేయనున్నారు. ముఖ్యంగా 22ఏ భూముల అంశంపై అసత్య ప్రచారం చేస్తుననారని, బీఆర్ఎస్ ప్రభుత్వంలోనే ఇది ఉందనే విషయాన్ని సభలో చెప్పాలని ప్రభుత్వం కసరత్తు చేస్తుందని సమాచారం. అలాగే 1000 రోజుల కాంగ్రెస్‌ పాలన గురించి చేపట్టిన సంక్షేమ పథకాలు, వాటి ప్రయోజనాలు, నిధుల వినియోగం, సాధించిన విజయాలను ప్రజలకు తెలియజేయాలని నిర్ణయించినట్లు సమాచారం. రేషన్‌కార్డులు, ఇందిరమ్మ ఇళ్లు, సన్నబియ్యం సహా పలు సంక్షేమ పథకాలను పార్టీలతో సంబంధం లేకుండా పేదలందరికీ ఇస్తున్న విషయాన్ని సభలో చెప్పాలని కాంగ్రెస్‌ వ్యూహాలు రెడీ చేసింది.

బీఆర్ఎస్ అస్త్రాలు రెడీ  

కాంగ్రెస్ 1000 రోజులు పాలనలో అన్ని వర్గాల ప్రజలకు అన్యాయమే జరిగిందని బీఆర్ఎస్ ఆరోపిస్తుంది. విద్యార్థులు, నిరుద్యోగులు, ఉద్యోగులు, రైతులు, మహిళలు, దళిత, గిరిజన, బీసీ ఇలా అన్ని వర్గాలను ప్రభుత్వం మోసం చేసిందనే నినాదాన్ని అసెంబ్లీ, మండలిలో బలంగా వినిపించాలని బీఆర్ఎస్ నిర్ణయించింది. కనీసం నెలరోజుల పాటు అసెంబ్లీ సమావేశాలు నిర్వహించాలని బీఆర్ఎస్ డిమాండ్‌ చేస్తుంది. సాగునీటి ప్రాజెక్టులు, 22ఏ భూముల నిషేధం, నిరుద్యోగులు, విద్యార్థులు, ఫీజు రీయింబర్స్‌మెంట్ పై చర్చించేందుకు బీఆర్ఎస్ సిద్ధమైంది. 

నల్ల టీషర్టులతో బీఆర్ఎస్ నిరసన 

నల్ల టీషర్టులతో బీఆర్ఎస్ ఎమ్మెల్యేలు, ఎమ్మెల్సీలు అసెంబ్లీ వచ్చారు. అసెంబ్లీ గేటు వద్ద బీఆర్‌ఎస్‌ ఎమ్మెల్యేలు, ఎమ్మెల్సీలను పోలీసులు అడ్డుకున్నారు. పోలీసులు అభ్యంతరం వ్యక్తం చేయడంతో టీషర్టులు విప్పి హరీశ్‌రావు, పలువురు ఎమ్మెల్యేలు బనియన్లతో అసెంబ్లీ గేటు వద్దే నిలబడ్డారు. దీంతో ఇరు వర్గాల మధ్య వాగ్వాదం చోటుచేసుకుంది. హరీశ్‌రావుతోపాటు బీఆర్‌ఎస్‌ ఎమ్మెల్యేలను పోలీసులు అదుపులోకి తీసుకున్నారు.  మరోవైపు అసెంబ్లీ గేటు వద్ద బీఆర్‌ఎస్‌ ఎమ్మెల్యే సునీతా లక్ష్మారెడ్డి కన్నీళ్లు పెట్టుకున్నారు. పోలీసులు తనపట్ల అమానుషంగా ప్రవర్తించారని, తన చీర లాగారని ఆవేదన వ్యక్తం చేశారు. ఆమెను మాజీ మంత్రి సబితారెడ్డి ఓదార్చారు. తోపులాటలో జగదీశ్ రెడ్డి కాలికి గాయమైంది. సీఎం రేవంత్ రెడ్డికి ఇంతకు ఇంతా చెల్లిస్తామని కేటీఆర్ హెచ్చరించారు. 

మరిన్ని చదవండి

సీఎంగానే అసెంబ్లీలో అడుగుపెడతారు! — కేటీఆర్ ప్రకటన వెనుక ఆత్మవిశ్వాసమా? కాంగ్రెస్‌కు దొరికిన పొలిటికల్ అస్త్రామా?