Revanth Reddy: ఫాక్స్‌కాన్ పనులను పర్యవేక్షించిన రేవంత్ రెడ్డి, మరిన్ని పెట్టుబుడులకు కంపెనీ ఛైర్మన్‌‌తో చర్చలు

Foxconn In Telangana | రాష్ట్రానికి వచ్చిన ప్రముఖ ప్రాజెక్టులలో ఫాక్స్ కాన్ ఒకటి. కొంగరకలాన్ లోని ఫాక్స్ కాన్ కంపెనీకి వెళ్లి సీఎం రేవంత్ రెడ్డి, మంత్రి శ్రీధర్ బాబు వెళ్లి పరిశీలించారు.

ఫాక్స్‌కాన్ పనులను పర్యవేక్షించిన రేవంత్ రెడ్డి, మరిన్ని పెట్టుబుడులకు కంపెనీ ఛైర్మన్‌‌తో చర్చలు

Source : ABP Desam

Foxconn project In Kongara Kalan | హైదరాబాద్: తెలంగాణలో పెట్టుబడులు పెట్టడానికి ముందుకొచ్చే కంపెనీలకు కావలసిన మౌలిక సదుపాయాలు కల్పిస్తామని సీఎం రేవంత్ రెడ్డి స్పష్టం చేశారు. ఈ విషయంలో సంస్థలకు ఎలాంటి అనుమానాలు అక్కరలేవన్నారు. పరిశ్రమల శాఖ మంత్రి శ్రీధర్ బాబుతో  కలిసి సీఎం రేవంత్ రెడ్డి హైదరాబాద్ శివారు కొంగరకలాన్‌లోని ఫాక్స్ కాన్ కంపెనీని సోమవారం సాయంత్రం సందర్శించారు. తెలంగాణలో మరిన్ని విభాగాల్లో పెట్టబడులకు ఫాక్స్ కాన్ ప్రతినిధులను సీఎం రేవంత్ రెడ్డి ఆహ్వానించారు.

కొంగరకలాన్ లో ఫాక్స్‌కాన్ ప్రతినిధులతో సమావేశమై (Foxconn Kongara Kalan Park) కంపెనీ పురోగతి, ఇతర అంశాలను సీఎం రేవంత్ రెడ్డి అడిగి తెలుసుకున్నారు. ఈ సందర్భంగా ఫాక్స్‌కాన్ చైర్మన్ యాంగ్ లియూతో సీఎం రేవంత్ రెడ్డి వీడియో కాన్ఫరెన్స్ ద్వారా మాట్లాడారు. రాష్ట్రంలో ఫాక్స్ కాన్ కంపెనీకి కావాల్సిన మౌలిక సదుపాయాల కల్పనలో అన్ని విధాలుగా సహకరిస్తామని స్పష్టం చేశారు. 

ఎలక్ట్రిక్, లిథియం బ్యాటరీలలో పెట్టుబడులకు ఆహ్వానం

ఫాక్స్ కాన్ కంపెనీ విస్తరణలో భాగంగా తెలంగాణలో మరిన్ని విభాగాల్లో పెట్టుబడులకు ముందుకు రావాలని వారిని సీఎం రేవంత్ రెడ్డి కోరారు. తెలంగాణలో పెట్టుబడులకు అవకాశం ఉన్న ఎలక్ట్రిక్, లిథియం బ్యాటరీ విభాగాల్లోనూ ఇక్కడ పెట్టుబడులు పెట్టాలని ఫాక్స్ కాన్ ప్రతినిధులను కోరారు. కొంగరకలాన్ లో సీఎం రేవంత్ రెడ్డి పర్యటనలో ఆయన వెంట మంత్రి శ్రీధర్ బాబు, ఎమ్మెల్సీ మహేందర్ రెడ్డి, ఎమ్మెల్యే మల్ రెడ్డి రంగారెడ్డి, ప్రభుత్వ ఐటీ విభాగం ఉన్నతాధికారులు, ఫాక్స్‌కాన్ ప్రతినిధులు పాల్గొన్నారు. 

కాగా, ఫాక్స్‌కాన్ కంపెనీ 2023లో తెలంగాణలో పెట్టుబడులు పెట్టేందుకు ముందుకు వచ్చింది. కొంగర్‌కలాన్‌లో 250 ఎకరాల్లో ఎలక్ట్రానిక్ కంపెనీని ఏర్పాటు చేయడానికి ఫాక్స్‌కాన్ గతంలోనే నిర్ణయం తీసుకుంది. తద్వారా వేల నుంచి దాదాపు లక్ష మందికి ఉద్యోగాలు రానున్నాయని స్వయంగా ఫాక్స్ కాన్ సీఈఓ యంగ్ లియు ఓ సందర్భంలో వెల్లడించారు.

యాపిల్ ఐఫోన్లు తయారుచేసే సంస్థ ఫాక్స్ కాన్

2023 మార్చిలో తెలంగాణలో పెట్టుబడులు పెడుతున్నట్లుగా  ఫాక్స్ కాన్ ప్రకటించిన సంగతి తెలిసిందే. ఎలక్ట్రానిక్ డివైజ్‌లు, ఉపకరణాలు తయారు చేసే సంస్థ సంబంధిత  కర్మాగారాలను ఏర్పాటు చేసి, ఒక లక్ష ఉద్యోగాలను కల్పిస్తామనే హామీతో రాష్ట్ర ప్రభుత్వంతో అప్పట్లోనే అవగాహన ఒప్పందం కుదుర్చుకుంది. దశలవారీగా ఉద్యోగాలు కల్పించనుంది. యాపిల్ ఐ ఫోన్లను ఫాక్స్‌కాన్ సంస్థ తయారు చేస్తుంది. వీరి ప్రధాన క్లైంట్స్ లో గూగుల్,  అమెజాన్, అలీబాబా గ్రూప్, షియోమి, సీస్కో, మైక్రోసాఫ్ట్, నోకియా డెల్, ఫేస్‌బుక్‌, సోని వంటి దిగ్గజ సంస్థలు ఉన్నాయి. అమెరికా, యూరప్, చైనా, వియత్నాం, థాయ్‌లాండ్, మలేషియా, భారత్ సహా 24 దేశాలలో ఫాక్సాకాన్ సంస్థలున్నాయి. భారత్ విషయానికి వస్తే తెలంగాణ (కొంగర కలాన్), ఏపీ (శ్రీ సిటి), కర్ణాటకలో (బెంగళూరు), తమిళనాడు (శ్రీ పెరంబుదూర్)లో ఫాక్స్‌కాన్  సంస్థకు కర్మాగారాలు ఉన్నాయి.