Harish Rao Tweet: కాంగ్రెస్ పాలనలో పోలీసుల జీవితాలకే భద్రత లేదు - రేవంత్ రెడ్డిపై హరీష్ రావు మండిపాటు

పోలీసుల జీవితాలకే భద్రత లేకపోవడం సిగ్గుచేటు అని తెలంగాణ సీఎం రేవంత్ రెడ్డిపై బీఆర్ఎస్ నేత హరీష్ రావు మండిపడ్డారు. ఈ మేరకు ఓ వీడియో సైతం షేర్ చేశారు.

పోలీసుల జీవితాలకే భద్రత లేకపోవడం సిగ్గుచేటు - రేవంత్ రెడ్డిపై హరీష్ రావు మండిపాటు

Source : X

Harish Rao Comments on Revanth Reddy | హైదరాబాద్: తెలంగాణ సీఎం రేవంత్ రెడ్డి హోంమంత్రిగానూ దారుణంగా విఫలమయ్యారని మాజీ మంత్రి హరీష్ రావు (Harish Rao) విమర్శించారు. రిటైర్డ్ పోలీసు ఉద్యోగి (ASI) సాధిక్ అలీ తనకు రావాల్సిన బెనిఫిట్స్ కోసం 8 నెలల నుంచి ఎదురుచూస్తున్నానని, ఇక ఆత్మహత్యే శరణ్యం అంటూ ఆవేదన వ్యక్తం చేశారు. అయినా రేవంత్ రెడ్డి ప్రభుత్వం పట్టించుకోకపోవడం దుర్మార్గం అన్నారు సిద్దిపేట ఎమ్మెల్యే హరీష్ రావు. కాంగ్రెస్ పాలన రైతులు, మహిళలు, అన్ని వర్గాలతో పాటు రిటైర్మెంట్ ఉద్యోగులకు కూడా శాపంగా మారిందన్నారు. విశ్రాంత జీవితాన్ని కుటుంబ సభ్యులతో కలిసి ఎంతో సంతోషంగా గడిపాల్సిన రోజుల్లోనూ రిటైర్డ్ ఉద్యోగులకు మానసిక క్షోభకు గురి చేయడం హేయమైన చర్యగా బీఆర్ఎస్ నేత అభివర్ణించారు.

రిటైర్మెంట్ బెనిఫిట్స్ కోసం వేల మంది ఎదురుచూపులు

దాదాపు 7,000 మంది ప్రభుత్వ ఉద్యోగులు వారికి హక్కుగా రావలసిన రిటైర్మెంట్ బెనిఫిట్స్ (Retirement Benefits) కోసం ఏడాది నుంచి ఎదురుచూస్తున్నారు. కానీ కాంగ్రెస్ ప్రభుత్వం పట్టించుకోకపోవడం వారి నిర్లక్ష్యానికి నిదర్శనం. కోర్టుకు వెళ్లి ఆర్డర్ తెచ్చుకుంటే గాని రిటైర్మెంట్ బెనిఫిట్స్ పొందలేని దుస్థితికి రిటైర్డ్ ఉద్యోగులను నెట్టడం దారుణం. మరోవైపు నెట్వర్క్ ఆసుపత్రులకు బిల్లులు చెల్లించక ఉద్యోగులకు, జర్నలిస్టులకు, పోలీసులకు వైద్యం అందించే ఇహెచ్ఎస్ (EHS), జేహెచ్ఎస్, ఆరోగ్య భద్రత పథకాలను సేవలను సైతం అటకెక్కించే పరిస్థితి   కనిపిస్తోందని.. అత్యవసర వైద్య సేవలు అందకుండా చేశారని రేవంత్ రెడ్డి పాలనపై హరీష్ రావు విమర్శలు గుప్పించారు.

హోంమంత్రిగా కూడా ఉన్న ముఖ్యమంత్రి రేవంత్ రెడ్డి గారూ.. మీ పాలనలో ప్రజల ప్రాణాలు కాపాడిన పోలీసుల జీవితాలకే 'భద్రత' లేకుండా పోవడం సిగ్గు చేటు.

రిటైర్డ్ పోలీసు ఉద్యోగి (ASI) సాధిక్ అలీ 8 నెలల నుంచి తనకు రావాల్సిన బెనిఫిట్స్ కోసం ఎదురుచూస్తున్నానని, ఇక అతహత్యే శరణ్యం అంటూ ఆవేదన… pic.twitter.com/lW94vjsNEH

— Harish Rao Thanneeru (@BRSHarish) January 8, 2025

ప్రభుత్వం ఇకనైనా కళ్లు తెరవాలన్న హరీష్ రావు
ఇప్పటికైనా కాంగ్రెస్ ప్రభుత్వం కళ్లు తెరిచి వెంటనే బకాయిలు చెల్లించాలని డిమాండ్ చేశారు. రిటైర్మెంట్ ఉద్యోగులకు పెండింగ్ లో ఉన్న బెన్ఫిట్స్ ని వెంటనే చెల్లించాలని, ఉద్యోగులు, జర్నలిస్టులు, పోలీసులకు వైద్య సేవలు కొనసాగేలా చూడాలని బీఆర్ఎస్ తరఫున హరీష్ రావు డిమాండ్ చేశారు. దశాబ్దాల పాటు సేవలు అందించి ఉద్యోగాలు పూర్తిచేసి, జీవితంలో విజయం సాధించిన మీ సమస్యలకు ఆత్మహత్యలు పరిష్కారం కావు అని హరీష్ రావు సూచించారు. సమస్యలు ఉంటే పోరాడి పరిష్కారం చేసుకుందాం, బిఆర్ఎస్ పార్టీ అన్ని వర్గాల వారికి అండగా ఉంటుందని స్పష్టం చేశారు. మరోవైపు ఫార్ములా ఈ కారు రేసు (Formula E Car Race in Hyderabad)లో విచారణ అంశం తెలంగాణ రాజకీయాల్లో దుమారం రేపుతోంది.