Karimnagar: ప్రాజెక్టు కాలవతో నీరొచ్చింది- ఉపాధి పోయింది, నిత్యం ముంపు బారిన పడ్డ ఓ పల్లె కష్టం ఇది

ఆ గ్రామానికి నీటితోపాటు సమస్యలు వచ్చాయి. ఏళ్లు గడుస్తున్నా పరిష్కరించడంలో అధికారులు విఫలమయ్యారు. చివరకు ప్రజలే చందాలు వేసుకొని తిప్పలు పడుతున్నారు.

మంగపేట గ్రామస్థులు ప్రజలు వెళ్లే దారి

కరీంనగర్ జిల్లా గంగాధర మండలంలోని మంగపేట గ్రామస్థులు దశాబ్దాలుగా ముంపు సమస్యను ఎదుర్కొంటున్నారు. కాలాలతో సంబంధం లేకుండా ఇబ్బంది పడుతున్నారు. గ్రామ చెరువుకి నీరు వదిలినప్పుడల్లా ఇళ్లలోకి నీరు వచ్చి చేరడం సాధారణమైపోయింది. 

ముంపు భయం

ఎల్లంపల్లి ప్రాజెక్టులో భాగంగా గంగాధర ఎల్లమ్మ చెరువుని ప్రతి సంవత్సరం రెండు సీజన్లలో నీటితో నింపుతున్నారు. దీంతో ఆ చెరువు పక్కనే ఉన్న మంగపేట గ్రామంలోని ఇళ్లు, వ్యవసాయ భూములు బావులు ముంపునకు గురయ్యాయి. దాదాపు 90 ఎకరాల వరకూ పచ్చని పంట పొలాలు, అందులో మునిగిపోయాయి. దీంతో రైతుల జీవనోపాధి దెబ్బతింది. అయితే ఎవరికీ కూడా సరైన నష్టపరిహారం అందలేదని రైతులు తమ బాధ వ్యక్తం చేస్తున్నారు.

రోడ్డు సౌకర్యం

ఊరికి కనీసం రోడ్డు సౌకర్యం లేదని అక్కడ ఉన్న బ్రిడ్జి వల్ల కూడా ప్రయాణం చేయాలంటేనే భయమేసే విధంగా ఉందని స్థానికులు అంటున్నారు. ఇక వర్షాకాలంలో అయితే పాములు, తేళ్లు ఇంట్లోకి రావడం సాధారణంగా తయారైందని అంటున్నారు. నాలుగేళ్ల నుంచి సర్వే పేరిట హడావుడి చేస్తున్నారు. అధికారులు వస్తున్నారు పోతున్నారే తప్ప అధికారులు కూడా తమకు ఎలాంటి హామీ ఇవ్వడం లేదని విచారం వ్యక్తం చేస్తున్నారు రైతులు. 

జీవనోపాధి దూరం

తాతలు తండ్రులు బతికిన ఊరిలో తాము మాత్రమే మిగిలే పరిస్థితి ఉందని వృద్ధులు ఆవేదన వ్యక్తం చేస్తున్నారు. కులవృత్తి చేసుకుని బతికే మహిళల పరిస్థితి మరో విధంగా ఉంది. తాము గొర్రెలు కాచుకుంటూ కుటుంబాన్ని పోషించుకుంటున్నామని.. ఇప్పుడు ఎటువైపు మేతకు తీసుకుని వెళ్లే పరిస్థితి లేదన్నారు. దీంతో జీవనోపాధి కోల్పోతున్నామనని ఆవేదన వ్యక్తం చేస్తున్నారు. 

ఫుట్‌ ఓవర్‌ బ్రిడ్జిలాంటి దారి

సాధారణంగా మెట్రో సిటీలో ఫుట్‌ ఓవర్ బ్రిడ్జికి వాడే డిజైన్‌ని ఇక్కడ ప్రధాన రహదారిగా మార్చారు అధికారులు. బైక్‌పై బ్రిడ్జి మీదుగా వెళ్ళడానికి ఏపీబీ దేశం ప్రతినిధి ప్రయత్నించారు. దీంతో గ్రామస్తుల సమస్య ఏ స్థాయిలో ఉందో అర్థమైంది. కేవలం నాలుగైదు అడుగుల వెడల్పుతో  కట్టిన బ్రిడ్జే గ్రామస్తులకు రవాణా సౌకర్యం. 

చందాలతో సమస్యకు పరిష్కారం

బ్రిడ్జి, చెరువు సమస్య నుంచి బయటపడాలన్న సంకల్పంతో ఊరంతా కలిసి చందాలు వేసుకొన్నారు. తలా కొంత వేసుకొని స్థానిక గుట్ట ప్రాంతాన్ని చదును చేసుకుని కొత్త ఊరి నిర్మాణం మొదలుపెట్టారు. పాత ఊరి జ్ఞాపకాలను వదిలి అక్కడ నుంచి వెళ్లిపోవాలని అనుకుంటున్నారు. ఒక ఊరికి వచ్చిన కష్టాన్ని ఐకమత్యంగా ఉంటేనే తాము బయట గలమని వారంతా భావిస్తున్నారు.