Kavitha ED Enquiry: ఎమ్మెల్సీ కవిత ఫోన్లను పరిశీలిస్తున్న ఈడీ అధికారులు - అడ్వకేట్ భరత్ సమక్షంలోనే!

Kavitha ED Enquiry: ఢిల్లీ లిక్కర్ స్కాం కేసులో ఎమ్మెల్సీ కవిత ఫోన్లు స్వాధీనం చేసుకున్న ఈడీ అధికారులు వాటిని ఈరోజు పరిశీలించబోతున్నారు. అడ్వకేట్ భరత్ ఆధ్వర్యంలో ఫోన్లలో ఉన్న డేటాను సేకరిస్తున్నారు.

ఎమ్మెల్సీ కవిత ఫోన్లను పరిశీలిస్తున్న ఈడీ అధికారులు - అడ్వకేట్ భరత్ ఆధ్వర్యంలోనే!

Kavitha ED Enquiry: ఢిల్లీ లిక్కర్ స్కామ్ కేసులో ఎమ్మెల్సీ కవితను ఇప్పటికే ఈడీ అధికారులు పలుమార్లు విచారించిన విషయం అందరికీ తెలిసిందే. అయితే ఈ క్రమంలోనే ఆమె వాడిన తొమ్మిది ఫోన్లను ఆమె ఈడీ అధికారులకు అప్పగించారు. వారికి అప్పగించే కంటే ముందు కవర్లలో వేసి ఉన్న ఆ ఫోన్లను కవిత మీడియాకు కూడా చూపించారు. అయితే ఈరోజు ఆ ఫోన్లలో ఏముందో తెలుసుకునేందుకు ఈడీ అధికారులు సిద్ధమయ్యారు. ఈ క్రమంలోనే ఎమ్మెల్సీ కవిత లేదా ఆమె తరఫున ఎవరైన ఈడీ కార్యాలయానికి రావాలని సూచించారు. ఇందులో భాగంగానే కవిత అడ్వకేట్ సోమ భరత్ రెండో రోజు కూడా ఈడీ ఆఫీసుకు చేరుకున్నారు. ఇదే కేసు విషయమై మంగళవారం ఈడీ ఆఫీసుకు వెళ్లిన ఈయన.. నేడు రెండోసారి వెళ్లారు. సోమ భరత్ సమక్షంలో ఈడీ అధికారులు ఎమ్మెల్సీ కవిత ఫోన్లను చెక్ చేయబోతున్నారు. అందులో ఉన్న డేటాను అధికారులు సేకరిస్తున్నారు. 

ఇటీవలే అంటే మార్చి 21వ తేదీన మూడోసారి ఈడీ విచారణ కోసం ఎమ్మెల్సీ కవిత ఢిల్లీలోని ఈడీ కార్యాలయానికి వెళ్లారు. ఉదయం 11.30 గంటల సమయంలో ఆమె తన కారులో తండ్రి కేసీఆర్ నివాసం నుంచి ఈడీ కార్యాలయానికి బయలుదేరి వెళ్లారు. వెళ్లే ముందు తాను గతంలో వాడిన ఫోన్లను చూపించారు. రెండు కవర్లలో దాదాపు 10 ఫోన్లను మీడియాకు చూపించారు. ఈ కేసులో ఆధారాలు దొరక్కుండా తన ఫోన్లను కవిత ధ్వంసం చేశారని గతంలో ఆరోపణలు వచ్చిన సంగతి తెలిసిందే. తాజాగా విచారణకు వెళ్లే ముందు ఆ ఫోన్లు ప్రత్యేకంగా రెండు కవర్లలో వేసి చూపించడం ప్రాధాన్యం సంతరించుకుంది. ఆ ఫోన్లకు స్టిక్కర్లు కూడా అతికించి ఉన్నాయి. ఇంటి నుంచి బయలుదేరే ముందే కాకుండా, ఈడీ కార్యాలయానికి చేరుకున్నాక, లోనికి వెళ్లే ముందు కూడా ఆ ఫోన్లు ఉన్న కవర్లను మరోసారి కవిత పైకి ఎత్తి చూపించారు. 

ఆ తర్వాత ఈడీ దర్యాప్తు అధికారి జోగేంద్రకు లేఖ..

ఢిల్లీ లిక్కర్ స్కామ్ కేసులో ఈడీ దర్యాప్తు అధికారి జోగేంద్రకు కల్వకుంట్ల కవిత సంచలన లేఖ రాశారు. తాను ఫోన్లను ధ్వంసం చేశానని ఆరోపణ చేయడాన్ని కవిత  తీవ్రంగా తప్పుపట్టారు. ఈడీ అధికారులు దురుద్దేశ పూర్వకంగా వ్యవహరిస్తున్నారని, అందుకని తాను గతంలో వాడిన ఫోన్లను సమర్పిస్తున్నానని అన్నారు. అయినా ఒక మహిళ ఫోన్‌ను స్వాధీనం చేసుకోవడం గోప్యత హక్కుకు భంగం కలగదా? అని కవిత ప్రశ్నించారు. దుర్బుద్ధితో వ్యవహరిస్తున్న దర్యాప్తు సంస్థ ఈడీ తాను ఫోన్లను ధ్వంసం చేశానని పేర్కొందని లేఖలో పేర్కొన్నారు. తనను కనీసం సమన్ చేయకుండా లేదా అడగకుండానే ఏ పరిస్థితుల్లో ఎందుకు దర్యాప్తు సంస్థ ఈ ఆరోపణలు చేసిందని కవిత ప్రశ్నించారు. తప్పుడు ఆరోపణను ఉద్దేశపూర్వకంగా లీకేజీ ఇవ్వడం వల్ల తన రాజకీయ ప్రత్యర్థులు తనను ప్రజల్లో నిందిస్తున్నారని కవిత వాపోయారు. తద్వారా తన ప్రతిష్ఠకు తీవ్ర భంగం కలగడమే కాకుండా తన పరువును, తమ పార్టీ ప్రతిష్ఠను ప్రజల్లో తగ్గించే ప్రయత్నం జరిగిందని అన్నారు.