Hyderabad News: వైఎస్‌ సహాయకుడు సూరీడుపై హైదరాబాద్‌లో కేసు - పోలీసులపై కూడా అభియోగాలు

Hyderabad News: మాజీ సీఎం వైఎస్ రాజశేఖర్ రెడ్డి మాజీ వ్యక్తిగత సహాయకుడు సూరీడుతో పాటు ముగ్గురు పోలీసు అధికారులపై కేసు నమోదు చేశారు.

వైఎస్‌ సహాయకుడు సూరీడుపై హైదరాబాద్‌లో కేసు - పోలీసులపై కూడా అభియోగాలు

Hyderabad News: మాజీ ముఖ్యమంత్రి, దివంగత వైఎస్‌ రాజశేఖరరెడ్డి మాజీ వ్యక్తిగత సహాయకుడు అయిన ఎర్రంరెడ్డి సూర్యనారాయణ రెడ్డి అలియాస్‌ సూరీడుతోపాటు మరో ముగ్గురు పోలీసు అధికారులపై హైదరాబాద్‌ బంజారాహిల్స్‌ పోలీసు స్టేషన్‌లో కేసు నమోదు అయింది. గతంలో తనపై దాడిచేసి, ఇబ్బంది పెట్టిన సూరీడు, ముగ్గురు పోలీసులపై చర్యలు తీసుకోవాలని కోరుతూ సూరీడి అల్లుడు సురేందర్‌ రెడ్డి కోర్టును ఆశ్రయించారు. దీంతో కోర్టు ఆదేశాల మేరకు మంగళవారం వారిపై పోలీసులు కేసు నమోదు చేశారు. 

అల్లుడి సురేందర్ రెడ్డిపై మామ సూరీడు దాడి

సూరీడి కుమార్తెను కడపకు చెందిన పోతిరెడ్డి సురేందర్‌ రెడ్డితో గతంలో పెళ్లి జరిగింది. తర్వాత భార్యాభర్తల మధ్య విభేదాలు తలెత్తాయి. దీంతో సూరీడి కుమార్తె తన భర్తపై వరకట్న వేధింపుల కింద కేసు పెట్టారు. 2021 మార్చి 23న రాత్రి 7.30కు సురేందర్‌ రెడ్డి క్రికెట్‌ ఆడిన తర్వాత కుమార్తెను చూడడానికి జూబ్లీహిల్స్‌ లోని తన మామ ఇంటికి వెళ్లారు. అక్కడ సూరీడు, సురేందర్ రెడ్డి మధ్య గొడవ జరిగింది. ఈ క్రమంలో అల్లుడు సురేందర్ రెడ్డిపై మామ సూరీడు దాడి చేశారు.

సురేందర్ రెడ్డిని అదుపులోకి తీసుకున్న పోలీసులు

అదే సమయంలో జూబ్లీహిల్స్‌ పోలీసులు అక్కడికి చేరుకున్నారు. ఆ క్రమంలో సురేందర్‌ రెడ్డి చేతిలో ఉన్న క్రికెట్ బ్యాట్ ను తీసుకుని సురేందర్ రెడ్డిని అదుపులోకి తీసుకున్నారు. అతడి ద్విచక్ర వాహనాన్ని కూడా స్వాధీనం చేసుకున్నారు. అనంతరం సురేందర్ రెడ్డిని పోలీసు స్టేషన్ కు తరలించారు. ఆ సమయంలో జూబ్లీహిల్స్‌ ఇన్‌స్పెక్టర్‌ గా పని చేసిన రాజశేఖర్‌ రెడ్డి, ఎస్సై నరేష్‌ .. ప్రస్తుతం ఆంధ్రప్రదేశ్‌ లో ఐజీగా పని చేస్తున్న జి.పాలరాజుతో కలిసి తనను అక్రమంగా నిర్బంధించి, దాడికి పాల్పడ్డారని సురేందర్‌ రెడ్డి ఆరోపణలు చేశారు. 

సూరీడు, ఏపీ ఐజీ పాలరాజు సహా మరో ముగ్గురు పోలీసుల అరెస్ట్

తనను అక్రమంగా కస్టడీలోకి తీసుకొని, తనపై తప్పుడు కేసులు పెట్టిన సూర్య నారాయణ రెడ్డి అలియాస్ సూరీడు, అప్పటి ఇన్ స్పెక్టర్ రాజశేఖర్‌ రెడ్డి, ఎస్సై నరేష్‌, ప్రస్తుతం ఏపీ ఐజీ పాలరాజులపై చర్యలు తీసుకోవాలని కోరుతూ గత మంగళవారం సురేందర్‌ రెడ్డి మూడో అదనపు చీఫ్‌ మెట్రోపాలిటన్‌ మేజిస్ట్రేట్‌ దృష్టికి తీసుకెళ్లారు. దీనిపై విచారించిన న్యాయమూర్తి.. సురేందర్ రెడ్డి వాంగ్మూలాన్ని పరిశీలించి కేసు నమోదు చేయాలని బంజారాహిల్స్‌ పోలీసులను ఆదేశించారు. ఈ మేరకు బంజారాహిల్స్‌ డివిజన్‌ ఏసీపీ సుబ్బయ్య నేతృత్వంలో పోలీసులు కేసు నమోదు చేసి దర్యాప్తు చేస్తున్నారు. గతంలోనూ పాలరాజుపై సురేందర్‌రెడ్డి ఫిర్యాదు చేయగా, సైఫాబాద్‌ పోలీసు స్టేషన్‌లో కేసు నమోదు అయింది.