OnePlus Nord 2T: వన్‌ప్లస్ కొత్త బడ్జెట్ ఫోన్ వచ్చేస్తుంది - మనదేశంలో అతి త్వరలోనే!

వన్‌ప్లస్ తన కొత్త స్మార్ట్ ఫోన్‌ను మనదేశంలో లాంచ్ చేయనుంది. అదే వన్‌ప్లస్ నార్డ్ 2టీ 5జీ.

వన్‌ప్లస్ నార్డ్ 2టీ మనదేశంలో లాంచ్ కానుంది. (Image Credits: OnePlus)

వన్‌ప్లస్ నార్డ్ 2టీ 5జీ స్మార్ట్ ఫోన్ గ్లోబల్ మార్కెట్లలో గత నెలలోనే లాంచ్ అయిన సంగతి తెలిసిందే. ఇప్పుడు తాజాగా వినిపిస్తున్న లీకుల ప్రకారం ఈ ఫోన్ మనదేశంలో జూన్ 27వ తేదీన లాంచ్ కానుంది. దీని ధర వివరాలు కూడా ఆన్‌లైన్‌లో లీకయ్యాయి. ఇందులో మీడియాటెక్ డైమెన్సిటీ 1300 ప్రాసెసర్‌ను అందించారు.

వన్‌ప్లస్ నార్డ్ 2టీ 5జీ ధర
ఈ స్మార్ట్ ఫోన్ మనదేశంలో రెండు వేరియంట్లలో లాంచ్ కానుందని తెలుస్తోంది. వీటిలో ప్రారంభ వేరియంట్ అయిన 8 జీబీ ర్యామ్ + 128 జీబీ స్టోరేజ్ వేరియంట్ ధర రూ.28,999గానూ, 12 జీబీ ర్యామ్ + 256 జీబీ స్టోరేజ్ వేరియంట్ ధర రూ.31,999గానూ ఉండనున్నట్లు సమాచారం. గ్రే షాడో, జేడ్ ఫాగ్ కలర్ ఆప్షన్లలో ఈ ఫోన్ కొనుగోలు చేయవచ్చు.

దీంతోపాటు వన్‌ప్లస్ ఎంపిక చేసిన బ్యాంకు కార్డులపై రూ.4,000 వరకు క్యాష్ బ్యాక్ కూడా అందిస్తున్నట్లు సమాచారం. జులై 3వ తేదీ నుంచి జులై 5వ తేదీ మధ్య ఈ ఫోన్ సేల్ జరిగే అవకాశం ఉంది. అయితే ఈ ఫోన్ ఇండియా లాంచ్ గురించి వన్‌ప్లస్ అధికారికంగా ప్రకటించలేదు.

వన్‌ప్లస్ నార్డ్ 2టీ గ్లోబల్ లాంచ్ కూడా రెండు వేరియంట్లలోనే అయింది. వీటిలో 8 జీబీ ర్యామ్ + 128 జీబీ స్టోరేజ్ వేరియంట్ ధర 399 యూరోలుగా (సుమారు రూ.32,600) ఉంది. 12 జీబీ ర్యామ్ + 256 జీబీ స్టోరేజ్ వేరియంట్ ధరను 499 యూరోలుగా (సుమారు రూ.40,800) నిర్ణయించారు.

వన్‌ప్లస్ నార్డ్ 2టీ స్పెసిఫికేషన్లు (అంచనా)
ఆండ్రాయిడ్ 12 ఆధారిత ఆక్సిజన్ఓఎస్ 12.1 ఆపరేటింగ్ సిస్టంపై వన్‌ప్లస్ నార్డ్ 2టీ పనిచేయనుంది. 6.43 అంగుళాల అమోఎల్ఈడీ డిస్‌ప్లేను ఇందులో అందించనున్నారు. 90 హెర్ట్జ్ స్క్రీన్ రిఫ్రెష్ రేట్ కూడా ఉండనుంది. హెచ్‌డీఆర్10+ సపోర్ట్, కార్నింగ్ గొరిల్లా గ్లాస్ 5 ప్రొటెక్షన్ ఫీచర్లు కూడా ఈ ఫోన్‌లో అందించారు. 12 జీబీ వరకు ర్యామ్, 256 జీబీ వరకు స్టోరేజ్ ఉన్నాయి.

దీని బ్యాటరీ సామర్థ్యం 4500 ఎంఏహెచ్‌గా ఉంది. 80W సూపర్ వూక్ చార్జింగ్‌ను ఇది సపోర్ట్ చేయనుంది. మీడియాటెక్ డైమెన్సిటీ 1300 ప్రాసెసర్‌పై ఈ ఫోన్ పనిచేయనుంది. ఇన్‌డిస్‌ప్లే ఫింగర్ ప్రింట్ సెన్సార్‌ను ఇందులో అందించారు. వైఫై 6, బ్లూటూత్ వీ5.2, ఎన్ఎఫ్‌సీ వంటి ఫీచర్లు ఇందులో అందించారు. యాక్సెలరోమీటర్, యాంబియంట్ లైట్ సెన్సార్, గైరోస్కోప్, మ్యాగ్నెటో మీటర్, ప్రాక్సిమిటీ సెన్సార్లు ఉన్నాయి.

ఇక కెమెరాల విషయానికి వస్తే... ఫోన్ వెనకవైపు మూడు కెమెరాలు ఉన్నాయి. వీటిలో ప్రధాన కెమెరా సామర్థ్యం 50 మెగాపిక్సెల్‌గా ఉంది. దీంతోపాటు 8 మెగాపిక్సెల్ సోనీ ఐఎంఎక్స్355 అల్ట్రా వైడ్ యాంగిల్ సెన్సార్, 2 మెగాపిక్సెల్ మోనోక్రోమ్ సెన్సార్ కూడా ఉన్నాయి. సెల్ఫీలు, వీడియో కాల్స్ కోసం ముందువైపు 32 మెగాపిక్సెల్ సోనీ ఐఎంఎక్స్615 సెన్సార్ కూడా అందించారు.