Chess World Cup: చరిత్ర సృష్టించడానికి అడుగు దూరంలో ప్రజ్ఞానంద, తాడే పేడో తేల్చే టై బ్రేక్ నేడే
Chess World Cup: భారత్ తరఫున 18 ఏళ్ల ప్రజ్ఞానంద, ఎదురుగా అయిదు సార్లు ప్రపంచ ఛాంపియన్ మాగ్నస్ కార్ల్సన్. అయితే ఏంటి ప్రజ్ఞానందలో అదలేదు, బెదరలేదు.
ఫిడే చెస్ ప్రపంచకప్ ఫైనల్ గేమ్ అత్యంత ఉత్కంఠభరితంగా సాగుతోంది. టైటిల్ కోసం దిగ్గజం మాగ్నస్ కార్ల్సన్ (నార్వే)తో భారత చెస్ సంచలనం ప్రజ్ఞానంద పోటీ పడుతున్నాడు. వరుసగా రెండో గేమ్నూ డ్రాగా ముగించాడు. మంగళవారం జరిగిన తొలి గేమ్ కూడా ఫలితం తేలకుండా ముగిసింది. బుధవారం రెండో గేమ్ కూడా డ్రా అయింది. తెల్లపావులతో ఆడిన కార్ల్సన్ మొదటి నుంచి డ్రా దృష్టిలో పెట్టుకునే ఎత్తులు వేశాడు. మరోవైపు నల్ల పావులతో ఆడిన ప్రజ్ఞానంద కూడా సైతం పావులు కదిపాడు.
మొదటి నుంచి కార్ల్సన్ పోరును టైబ్రేక్కు మళ్లించేందుకే ప్రయత్నించాడు. సెమీస్ తర్వాత కలుషిత ఆహారం తిని అనారోగ్యం బారిన పడ్డానని చెబుతూ కార్ల్సన్ గేమ్ను టై బ్రేక్ వైపు తిప్పేందుకు యత్నించాడు. ఒక రోజు ఆగితే మరింత శక్తి వస్తుందని, అప్పుడు పూర్తిస్థాయిలో తలపడొచ్చని భావించాడు. అయితే ప్రజ్ఞానంద అంతే రక్షణాత్మకంగానే వ్యవహరించాడు.
దీంతో 30 ఎత్తుల తర్వాత ఇద్దరు ఆటగాళ్లు పాయింట్లు పంచుకునేందుకు అంగీకరించారు. రెండు గేమ్లు ముగిసిన తర్వాత ప్రజ్ఞానంద, కార్ల్సన్ 1-1తో సమానంగా ఉన్నారు. గురువారం విజేతను నిర్ణయించేందుకు టైబ్రేక్ గేమ్ జరుగనుంది. దీనిపైనే అందరి దృష్టి నెలకొంది. మరోవైపు మూడో స్థానం కోసం జరుగుతున్న పోరులో తొలి గేమ్లో కరువానా (అమెరికా)పై అబసోవ్ (అజర్బైజాన్) గెలిచాడు.
కార్ల్సన్ ఆటతీరుపై ప్రజ్ఞానంద స్పందించాడు. కార్ల్సన్ వేగంగా డ్రా చేస్తాడని అనుకోలేదని చెప్పారు. టైబ్రేక్ కోసమే అతను అలా ఆడాడని, తనకు ఎలాంటి ఇబ్బంది లేదన్నారు. ఈ టోర్నీలో చాలా టైబ్రేక్లు ఆడానని, తాను కూడా కాస్త అలసిపోయానని అన్నారు. గురువారం పోరులో పూర్తి స్థాయిలో పోరాడేందుకు మెదడును తాజాగా ఉంచుకుంటానన్నారు. ఎక్కువ గేమ్లు ఆడడంతో పాటు తక్కువ సమయంలో స్పందించాల్సి ఉంటుందన్నారు. కార్ల్సన్ పూర్తి శక్తితో ఉన్నాడనిపించలేదని, అతను కోలుకుంటాడని ఆశిస్తున్నట్లు చెప్పారు. తన తల్లి అమ్మ తనతో పాటు సోదరికి ఎప్పుడూ కొండంత అండగా ఉంటోందన్నారు.
తనకు వైద్యం అందించిన టోర్నీ నిర్వాహకులు, వైద్యులు, నర్సులకు కార్ల్సన్ కృతజ్ఞతలు తెలిపారు. బుధవారం ఆరోగ్యం కాస్త మెరుగ్గా ఉందని, కానీ పోరాడేందుకు పూర్తి శక్తి లేదనిపించిందన్నారు. అందుకే మరో రోజు విశ్రాంతి కావాలనుకున్నానని, గురువారం పూర్తి శక్తి సాధిస్తానని నమ్మకం వ్యక్తం చేశాడు. ప్రజ్ఞానంద ఇప్పటికే బలమైన ఆటగాళ్లతో చాలా టైబ్రేక్లు ఆడాడని, అతను బలమైన ఆటగాడని తెలుసన్నారు. తనకు మంచి రోజు కలిసొస్తే కచ్చితంగా గెలిచే అవకాశాలుంటాయన్నారు.
టై బ్రేక్ అంటే ఏంటి?
ఈ ప్రపంచకప్లో అంతా నాకౌట్ ఫార్మాట్లో జరుగుతుంది. ఇందులో ప్రతి రౌండ్లోనూ మొదట రెండు క్లాసికల్ గేమ్లు నిర్వహిస్తారు. ఇందులో విజేత ఎవరో తేలకపోతే అప్పుడు టైబ్రేక్ నిర్వహిస్తారు. ఈ విధానంలో మొదట ర్యాపిడ్లో పోటీ నిర్వహిస్తారు. రౌండ్కు రెండు గేమ్లు చొప్పున రెండు రౌండ్లు పోటీ ఉంటుంది. తొలి రౌండ్లో ఫలితం వస్తే పోటీ ఆపేసి విజేతను ప్రకటిస్తారు.
అయితే ర్యాపిడ్ రౌండ్లు ముగిసినా ఆటగాళ్ల పాయింట్లు సమానంగా ఉంటే బ్లిట్జ్ గేమ్లు నిర్వహిస్తారు. ఒక్కో రౌండ్కు రెండు గేముల చొప్పున ఈ పోటీలు జరుగుతాయి. రెండు రౌండ్లలో ఫలితం తేలకపోతే ఎవరో ఒకరు విజేతగా నిలిచేంతవరకూ బ్లిట్జ్ గేమ్లు కొనసాగిస్తూనే ఉంటారు.
Before You Go
VVS Laxman Breaks Silence On Nitish | నితీష్ కుమార్ రెడ్డి గాయంపై లక్ష్మణ్ కామెంట్స్
టాప్ హెడ్ లైన్స్
ట్రెండింగ్ వార్తలు
