LSG Vs RR: సమిష్టిగా రాణించిన రాజస్తాన్ బ్యాటర్లు - ఒక్క అర్థ సెంచరీ లేకుండా భారీ స్కోరు - లక్నో టార్గెట్ ఎంతంటే?

ఐపీఎల్‌లో లక్నో సూపర్ జెయింట్స్‌తో జరుగుతున్న మ్యాచ్‌లో రాజస్తాన్ రాయల్స్ 20 ఓవర్లలో ఆరు వికెట్లు నష్టపోయి 178 పరుగులు చేసింది.

మ్యాచ్‌లో యశస్వి జైస్వాల్, సంజు శామ్సన్ (Image Credits: IPL/BCCI)

ఐపీఎల్‌లో లక్నో సూపర్ జెయింట్స్‌తో జరిగిన మ్యాచ్‌లో రాజస్తాన్ భారీ స్కోరు చేసింది. మొదట బ్యాటింగ్ చేసిన రాయల్స్ 20 ఓవర్లలో ఆరు వికెట్లు నష్టపోయి 178 పరుగులు చేసింది. రాజస్తాన్ బ్యాటర్లలో యశస్వి జైస్వాల్ (41: 29 బంతుల్లో, ఆరు ఫోర్లు, ఒక సిక్సర్), దేవ్‌దత్ పడిక్కల్ (39: 18 బంతుల్లో, ఐదు ఫోర్లు, రెండు సిక్సర్లు) రాణించారు. లక్నో విజయానికి 120 బంతుల్లో 179 పరుగులు కావాలి.

టాస్ గెలిచి బ్యాటింగ్ ఎంచుకున్న రాజస్తాన్‌కు ఆరంభంలోనే ఎదురుదెబ్బ తగిలింది. ఫాంలో ఉన్న ఓపెనర్ జోస్ బట్లర్ (2: 6 బంతుల్లో)... అవేష్ ఖాన్ బౌలింగ్‌లో ర్యాంప్ షాట్‌కు ప్రయత్నించి క్లీన్ బౌల్డయ్యాడు. కానీ యశస్వి జైస్వాల్, కెప్టెన్ సంజు శామ్సన్ (32: 24 బంతుల్లో, ఆరు ఫోర్లు) వేగంగా ఆడుతూ రన్‌రేట్ తగ్గనివ్వలేదు. వీరిద్దరూ రెండో వికెట్‌కు 40 బంతుల్లోనే 64 పరుగులు జోడించారు.

అయితే సంజు శామ్సన్, యశస్వి జైస్వాల్ ఇద్దరూ రెండు పరుగుల వ్యవధిలోనే అవుటయ్యారు. ఈ దశలో బ్యాటింగ్‌కు వచ్చిన దేవ్‌దత్ పడిక్కల్ కాసేపు విధ్వంసం సృష్టించాడు. ఉన్నది కాసేపే అయినా ఫోర్లు, సిక్సర్లతో చెలరేగాడు. రవి బిష్ణోయ్ బౌలింగ్‌లో భారీ షాట్‌కు ప్రయత్నించిన దేవ్‌దత్ పడిక్కల్... కృనాల్ పాండ్యా చేతికి చిక్కాడు.

ఆ తర్వాత రియాన్ పరాగ్ (17: 16 బంతుల్లో, ఒక సిక్సర్), జిమ్మీ నీషం (14: 12 బంతుల్లో, రెండు ఫోర్లు) ఆశించినంత వేగంగా ఆడకపోయినా ఆఖర్లో ట్రెంట్ బౌల్ట్ (17 నాటౌట్: 9 బంతుల్లో, రెండు ఫోర్లు) చిన్నపాటి మెరుపు ఇన్నింగ్స్ ఆడాడు. దీంతో రాజస్తాన్ 20 ఓవర్లలో ఆరు వికెట్ల నష్టానికి 178 పరుగులు చేసింది. ట్రెంట్ బౌల్ట్ ఐపీఎల్ కెరీర్‌లో మొదటి ఫోర్ ఈ మ్యాచ్‌లోనే కొట్టాడు. గతంలో తన ఖాతాలో ఒక సిక్సర్ మాత్రమే ఉంది. 

రాజస్తాన్ తరఫున ఏకంగా ఎనిమిది మంది బౌలింగ్ చేశారు. రవి బిష్ణోయ్ రెండు వికెట్లు తీయగా... అవేష్ ఖాన్, జేసన్ హోల్డర్, అయుష్ బదోనిలకు తలో వికెట్ దక్కింది.

 

 

 

 

 

View this post on Instagram

 

 

 

 

 

 

 

 

 

 

 

A post shared by IPL (@iplt20)