IPL 2024: టాస్‌ గెలిచిన ఢిల్లీ, బ్యాటింగ్‌కు దిగిన గుజరాత్‌

GT vs DC : ఐపీఎల్‌ 17 సీజన్‌లో భాగంగా గుజరాత్‌తో ఢిల్లీతో తలపడనుంది. ఢిల్లీ కెప్టెన్ రిషభ్‌ పంత్ టాస్‌ గెలిచి బౌలింగ్ ఎంచుకున్నాడు.

ఢిల్లీ క్యాపిటల్స్‌ Vs గుజరాత్‌ టైటాన్స్‌ ( Image Source : Twitter )

GT vs DC IPL 2024  Delhi Capitals opt to bowl: ఐపీఎల్‌(IPL)లో  అహ్మదాబాద్‌ వేదికగా గుజరాత్‌ టైటాన్స్‌(GT)తో జరుగుతున్న మ్యాచ్‌లో టాస్‌ గెలిచిన ఢిల్లీ క్యాపిటల్స్‌(DC) బౌలింగ్‌ ఎంచుకుంది. పిచ్‌ బౌలింగ్‌కు సహకరిస్తుందన్న అంచనాలు ఉన్న వేళ టాస్‌ గెలిచిన ఢిల్లీ... గుజరాత్‌ను బ్యాటింగ్‌కు ఆహ్వానించింది. గుజరాత్‌ను తక్కువ పరుగులకే కట్టడి చేయాలని ఢిల్లీ భావిస్తోంది. పాయింట్ల పట్టికలో ఆరు స్థానంలో ఉన్న గుజరాత్‌ టైటాన్స్‌తో...తొమ్మిదో స్థానంలో ఉన్న ఢిల్లీ క్యాపిటల్స్‌తో అమీతుమీ తేల్చుకోనుంది. ఇప్పటివరకూ ఆరు మ్యాచ్‌లు అడిన గుజరాత్‌ మూడు విజయాలు, మూడు పరాజయాలతో ఆరు స్థానంలో ఉంది. ఇప్పటివరకూ ఆరు మ్యాచ్‌లే ఆడిన ఢిల్లీ క్యాపిటల్స్‌ కేవలం రెండు మ్యాచుల్లో విజయం సాధించి..నాలుగు మ్యాచుల్లో పరాజయం పాలైంది. దీంతో ఇరు జట్లకు ఈ మ్యాచ్‌ చాలా కీలకంగా మారింది. ఈ మ్యాచ్‌లో గెలిచి ప్లే ఆఫ్‌ రేసులో మరింత ముందుకు వెళ్లాలని గుజరాత్‌ భావిస్తుండగా.. ఈ మ్యాచ్‌లో విజయం సాధించి ప్లే ఆఫ్‌ రేసులో నిలవాలని ఢిల్లీ జట్టు పట్టుదలగా ఉంది. రాజస్థాన్‌ రాయల్స్‌తో జరిగిన మ్యాచ్‌లో చివరి బంతికి విజయం సాధించిన గుజరాత్‌.. ఆత్మ విశ్వాసంతో బరిలోకి దిగనుంది.

లోపాలను సరిదిద్దుకుంటేనే..
ఢిల్లీ క్యాపిటల్స్‌తో జరిగే మ్యాచ్‌లో గుజరాత్ టైటాన్స్ సమస్యలన్నింటికీ చెక్‌ పెట్టాలని చూస్తోంది. విజయాలు సాధిస్తున్నా టైటాన్స్ ఇంకా పూర్తిగా గాడినపడినట్లు కనిపించడం లేదు. రాజస్థాన్ రాయల్స్‌పై చివరి బంతికి విజయం సాధించడం టైటాన్స్‌కు కాస్త ఊరట కలిగించింది. మరోవైపు ఢిల్లీ మొదటి ఆరు మ్యాచుల్లో కేవలం కేవలం రెండు విజయాలను మాత్రమే సాధించింది. లీగ్‌ల్లో ఇంకో ఎనిమిది మ్యాచ్‌లు మిగిలి ఉన్న వేళ ఇరు జట్లు లోపాలను సవరించుకుని గాడిన పడాలని చూస్తున్నాయి. మహ్మద్ షమీ లేకపోవడం గుజరాత్‌ బౌలింగ్ విభాగాన్ని ఆందోళన పరుస్తోంది. ఉమేష్ యాదవ్ వికెట్లు తీస్తున్నా భారీగా పరుగులు ఇచ్చేస్తుండడం గుజరాత్‌ మేనేజ్‌మెంట్‌ను ఆందోళన పరుస్తోంది. స్పెన్సర్ జాన్సన్, మోహిత్ శర్మ కూడా అంచనాలను అందుకోలేకపోతున్నారు. స్టార్ స్పిన్నర్ రషీద్ ఖాన్ చాలా పొదుపుగా బౌలింగ్‌ చేస్తూ గుజరాత్‌ అమ్ములపొదిలో ప్రధాన అస్త్రంగా మారాడు. రషీద్‌ బ్యాట్‌తోనూ రాణిస్తున్నాడు. రాజస్థాన్‌తో జరిగిన మ్యాచ్‌లో చివరి బంతికి బౌండరీ కొట్టి గుజరాత్‌కు కీలకమైన విజయాన్ని అందించాడు. 

ఢిల్లీ జట్టులో కష్టాలు
ఫామ్, ఫిట్‌నెస్ సమస్యల కారణంగా ఢిల్లీ క్యాపిటల్స్ ప్లేయింగ్ లెవన్‌ని ఎంచుకోవడంలో ఇబ్బంది పడుతోంది. గత మ్యాచ్‌లో లక్నో సూపర్ జెయింట్స్‌పై విజయం ఢిల్లీలో ఆత్మ విశ్వాసాన్ని పెంచింది. కానీ ఢిల్లీ ప్లే ఆఫ్‌కు చేరాలంటే జట్టులో ఇంకా సమతుల్యత రావాల్సి ఉంది. లక్నోతో జరిగిన మ్యాచ్‌లో అద్భుత బౌలింగ్‌తో ఆకట్టుకున్న కుల్‌దీప్‌ యాదవ్‌ మరోసారి కీలకంగా మారనున్నాడు. గత మ్యాచ్‌లో మెరుపులు మెరిపించిన మెక్‌గుర్క్‌పై ఢిల్లీ భారీ ఆశలు పెట్టుకుంది. ఢిల్లీ బౌలింగ్‌ కూడా కాస్త బలహీనంగానే కనిపిస్తోంది. ముఖేష్ కుమార్ గత అయిదు మ్యాచుల్లో ఓవర్‌కు 10 పరుగులు ఇచ్చాడు. కెప్టెన్ రిషబ్ పంత్ మెరుగ్గా రాణిస్తుండడం ఆ జట్టుకు బలంగా మారింది. డేవిడ్ వార్నర్ కూడా గాడినపడితే ఢిల్లీకి బ్యాటింగ్‌లో పెద్దగా ఇబ్బందులు ఉండవు. 

హెడ్‌ టు హెడ్‌ రికార్డులు
గుజరాత్-ఢిల్లీ ఇప్పటివరకు ఐపీఎల్‌ మూడుసార్లు తలపడ్డాయి. ఇందులో గుజరాత్‌ రెండు మ్యాచుల్లో విజయం సాధించగా.. ఢిల్లీ ఒక మ్యాచ్‌లో విజయం సాధించింది. ఇప్పటివరకు ఢిల్లీ క్యాపిటల్స్‌పై గుజరాత్ అత్యధిక స్కోరు 171. గుజరాత్‌పై ఢిల్లీ అత్యధిక స్కోరు 162. ఈ మ్యాచ్‌ల్లో శుభ్‌మన్ గిల్ 104 పరుగులు చేయగా, మహ్మద్ షమీ (9), రషీద్ ఖాన్ (5) ఎక్కువ వికెట్లు తీశారు.