DCW vs GG, WPL 2023: ఢిల్లీకి ‘జెయింట్స్’ షాక్ - 11 పరుగులతో గెలిచిన గుజరాత్!

Delhi Capitals Women vs Gujarat Giants, WPL 2023: మహిళల ప్రీమియర్ లీగ్‌లో ఢిల్లీ క్యాపిటల్స్‌తో జరుగుతున్న మ్యాచ్‌లో గుజరాత్ జెయింట్స్ విజయం సాధించింది. ఈ మ్యాచ్‌లో మొదట బ్యాటింగ్ చేసిన గుజరాత్ జెయింట్స్ 20 ఓవర్లలో నాలుగు వికెట్ల నష్టానికి 147 పరుగులు చేసింది. అనంతరం ఢిల్లీ క్యాపిటల్స్ 18.4 ఓవర్లలో 136 పరుగులకు ఆలౌట్ అయింది. దీంతో గుజరాత్ 11 పరుగుల గెలుపును అందుకుంది.

ఈ మ్యాచ్ ప్రారంభానికి ముందు వరకు పాయింట్ల పట్టికలో చివరి స్థానంలో ఉన్న గుజరాత్, రెండో స్థానంలో ఉన్న ఢిల్లీని ఓడించడం నిజంగా సంచలనమే. టోర్నీలో మిగతా జట్ల విజయావకాశాలను ఇది ప్రభావితం చేయనుంది. గుజరాత్ బ్యాటర్లలో ఓపెనర్ లారా వోల్వార్డ్ట్ (57: 45 బంతుల్లో, ఆరు ఫోర్లు, ఒక సిక్సర్), యాష్లే గార్డ్‌నర్ (51 నాటౌట్: 33 బంతుల్లో, తొమ్మిది ఫోర్లు) అర్థ సెంచరీలు సాధించారు.

వికెట్లు టపటపా...
148 పరుగుల లక్ష్యంతో బరిలోకి దిగిన ఢిల్లీ ఇన్నింగ్స్ పేలవంగా ప్రారంభం అయింది. ఓపెనర్ షెఫాలీ వర్మ రెండో ఓవర్లోనే వెనుదిరిగింది. 10 పరుగుల వద్ద ఢిల్లీ మొదటి వికెట్‌ను కోల్పోయింది. ఢిల్లీ బ్యాటర్లలో మెగ్ లానింగ్ (18: 15 బంతుల్లో, మూడు ఫోర్లు), ఆలిస్ క్యాప్సీ (22: 11 బంతుల్లో, రెండు ఫోర్లు, రెండు సిక్సర్లు), మారిజానే కాప్ (36: 29 బంతుల్లో, నాలుగు ఫోర్లు, ఒక సిక్సర్), అరుంధతి రెడ్డి (25: 17 బంతుల్లో, నాలుగు ఫోర్లు) మాత్రమే రెండంకెల స్కోరు చేయగలిగారు. దీంతో ఢిల్లీ 18.4 ఓవర్లలోనే 136 పరుగులకు ఆలౌట్ అయింది.

ఈ మ్యాచ్‌లో టాస్ గెలిచిన ఢిల్లీ క్యాపిటల్స్ బౌలింగ్ ఎంచుకుంది. దీంతో గుజరాత్ జెయింట్స్‌కు బ్యాటింగ్‌కు దిగింది. అయితే మొదటి ఓవర్లోనే సోఫీ డంక్లే (4:  6 బంతుల్లో) వికెట్ తీసి మారిజానే కాప్ గుజరాత్‌కు షాక్ ఇచ్చింది. కానీ ఆ తర్వాత హర్లీన్ డియోల్ (31: 33 బంతుల్లో, నాలుగు ఫోర్లు), లారా వోల్వార్డ్ట్ (57: 45 బంతుల్లో, ఆరు ఫోర్లు, ఒక సిక్సర్) ఇన్నింగ్స్‌ను నిలబెట్టారు. కానీ పరుగుల వేగం మాత్రం నెమ్మదించింది. హర్లీన్ డియోల్ నిదానంగా ఆడటంతో స్కోరు నత్తనడకన సాగింది. వీరిద్దరూ రెండో వికెట్‌కు 47 బంతుల్లో 49 పరుగులు జోడించారు.

హర్లీన్ డియోల్ అవుటయ్యాక క్రీజులోకి వచ్చిన యాష్లే గార్డ్‌నర్ (51 నాటౌట్: 33 బంతుల్లో, తొమ్మిది ఫోర్లు) వేగంగా ఆడింది. ఆ తర్వాత మెల్లగా లారా వోల్వార్డ్ట్ కూడా దూకుడు పెంచడంతో స్కోరు పరుగులు పెట్టింది. ఈ క్రమంలోనే అర్థ సెంచరీ పూర్తి చేసుకున్నాక లారా అవుట్ అయింది. కానీ యాష్లే దూకుడు తగ్గించకపోవడంతో గుజరాత్ జెయింట్స్ 20 ఓవర్లలో నాలుగు వికెట్ల నష్టానికి 147 పరుగులు చేసింది. 

తుది జట్లు
గుజరాత్‌ జెయింట్స్‌: సోఫీ డంక్లీ, లారా, హర్లీన్‌ డియోల్‌,  యాష్లే గార్డ్‌నర్‌, సుష్మా వర్మ, దయాలన్ హేమలత, అశ్వనీ, స్నేహ రాణా, తనుజా కన్వార్‌, కిమ్‌ గార్త్‌, మాన్సీ జోషీ

ఢిల్లీ క్యాపిటల్స్‌: మెగ్‌ లానింగ్‌, షెఫాలీ వర్మ, అలిస్‌ క్యాప్సీ, జెమీమా రోడ్రిగ్స్‌, మారిజానె కాప్‌,  జెస్‌ జొనాసెన్‌, అరుంధతీ రెడ్డి, తానియా భాటియా, శిఖా పాండే, రాధా యాదవ్‌, పూనమ్‌ యాదవ్‌