Yuvraj Singh on Dhoni: ధోనీతో స్నేహంపై యువీ సంచలన వ్యాఖ్యలు

Yuvraj Singh on Dhoni: మహేంద్ర సింగ్‌ ధోనీ సారధ్యంలో యువరాజ్‌ ఎన్నో చిరస్మరణీయ ఇన్నింగ్స్‌లు ఆడాడు. ధోనీతో తన స్నేహ బంధం గురించి యువీ సంచలన వ్యాఖ్యలు చేశాడు. 

ధోనీతో స్నేహంపై యువీ సంచలన వ్యాఖ్యలు (File) ( Image Source : Twitter )

యువరాజ్‌సింగ్‌... భారత క్రికెట్‌ చరిత్రలో ఓ సునామీ. ఒకే ఓవర్లో ఆరు సిక్సులు కొట్టిన విధ్వంసకర బ్యాట్స్‌మెన్‌. క్యాన్సర్‌ నుంచి కోలుకుని మైదానంలో చెలరేగిన యువీ అందరికీ స్ఫూర్తి దాయకం. క్లిష్ట సమయాల్లో భారత జట్టును ఎన్నోసార్లు తన బ్యాటింగ్‌తో విజయ తీరాలకు చేర్చిన పోరాట  యోధుడు. భారత క్రికెట్ చరిత్రలో యూవరాజ్ సింగ్ ఓ మైలురాయి. టీ 20 వరల్డ్ కప్‌లో ఇంగ్లాండ్‌తో జరిగిన మ్యాచ్ భారతత క్రికెట్ అభిమానుల జీవితం లో మరువలేనిది. మహేంద్ర సింగ్‌ ధోనీ సారధ్యంలో యువరాజ్‌ ఎన్నో చిరస్మరణీయ ఇన్నింగ్స్‌లు ఆడాడు. ధోనీతో తన స్నేహ బంధం గురించి యువీ సంచలన వ్యాఖ్యలు చేశాడు. 

 మహేంద్ర సింగ్ ధోనీతో తనకున్న స్నేహానికి సంబంధించి యువరాజ్ సింగ్ ఓ ఇంటర్వ్యూలో సంచలన వ్యాఖ్యలు చేశాడు. తనకు, ధోనీకి మధ్య ఎప్పుడూ సన్నిహిత స్నేహం లేదని యువీ తెలిపాడు. తాను.. ధోనీ కలిసి క్రికెట్ ఆడినందున మాత్రమే స్నేహితులం అయ్యామని, అయితే ఎప్పుడూ సన్నిహితంగా ఉండలేదని స్పష్టం చేశాడు. తాను, మహీ సన్నిహిత మిత్రులం కాదన్న  యువరాజ్‌.. ధోనీ, తాను చాలా భిన్నమైన జీవనశైలిని కలిగిన వాళ్లమని అన్నాడు. అందుకే తమ మధ్య సన్నిహిత స్నేహం కుదరలేదని వెల్లడించాడు. ఫీల్డ్ వెలుపల మీ సహచరులు మీకు మంచి స్నేహితులుగా ఉండాల్సిన అవసరం లేదన్న యువీ.. ప్రతి ఒక్కరి జీవన విధానం భిన్నంగా ఉంటుందని అన్నాడు. ఏదైనా ఒక జట్టులో 11 మంది ఆటగాళ్ళు సన్నిహిత స్నేహితులు కాలేరని యువరాజ్‌ అన్నాడు.

 మహి, తాను ఫీల్డ్‌లోకి వచ్చినప్పుడల్లా దేశం కోసం 100 శాతం కష్టపడ్డామని, కెప్టెన్‌గా తను, వైస్‌ కెప్టెన్‌గా నేను అనేకసార్లు కలిసి ప్రయాణించామని యువరాజ్ తెలిపాడు. తమ నిర్ణయాల్లో భిన్నాభిప్రాయాలు ఉండేవని, ధోనీ నిర్ణయాలు కొన్ని తనకు నచ్చేవి కావని, తన నిర్ణయాలు కొన్ని మహీకి నచ్చేవి కావని యువీ గుర్తు చేసుకున్నాడు. ఇది ప్రతి జట్టుతో జరుగుతుందన్నాడు. ఒకప్పుడు ధోనీ.. తాను సెంచరీ పూర్తి చేసేందుకు ఎలా సహకరించాడో కూడా యువరాజ్‌ గుర్తు చేసుకున్నాడు. తాను కెరీర్ చివరి దశలో ఉన్నప్పుడు తన భవిష్యత్తు గురించి ధోనీతో చర్చించానని యువీ తెలిపాడు. దాని కోసం ధోనీని తాను సలహా అడిగానని.. సెలక్షన్ కమిటీ ప్రస్తుతానికి నీ గురించి ఆలోచించడం లేదని ధోనీ నాకు చెప్పాడని యువరాజ్‌ అన్నాడు. అసలు పరిస్థితి, ఏం జరుగుతోందో తెలుసుకోవాలనే ధోనిని అడిగానని మహీ కుండబద్దలు కొట్టినట్లు నిజం చెప్పడంతోనే తాను రిటైర్‌మెంట్‌ గురించి ఆలోచించానని అన్నాడు.  

ఇప్పుడు ధోనీ రిటైర్ అయ్యాడని, తాను కూడా రిటైరయ్యానని ఇప్పుడు మేం స్నేహితుల్లా అప్పుడప్పుడు కలుస్తామని యువరాజ్‌ తెలిపాడు. ఇటీవలే తామిద్దరం కలిసి ఓ యాడ్‌ని షూట్‌ చేశాం. ఈ సమయంలో పాత విషయాలను గుర్తు చేసుకుంటూ సరదాగా గడిపాం.

 యువీ 17 ఏళ్ల అంత‌ర్జాతీయ కెరీర్‌లో 402 మ్యాచ్‌ల‌ు ఆడాడు. 11, 778 ప‌రుగులు చేసి త‌న కెరీర్‌లో 17 సెంచ‌రీలు, 71 అర్థసెంచ‌రీలున్నాయి. స్పిన్ ఆల్‌రౌండ‌ర్ గ అద‌ర‌గొట్టిన యువ‌రాజ్‌ త‌న కెరీర్‌లో 148 వికెట్లు తీశాడు. వన్డే క్రికెట్‌లో ఏడు సార్లు మ్యాన్ ఆఫ్ ది సిరీస్ టైటిల్స్ గెలిచాడు. ముఖ్యంగా భార‌త వ‌న్డే ప్రపంచ‌క‌ప్‌ 2003, 2011 భార‌త జ‌ట్టులో కీల‌క పాత్ర పోషించారు. 2003లో భార‌త్ ఫైన‌ల్ చేరుకోవ‌డంలో యువీ కార‌ణ‌మ‌నే చెప్పవ‌చ్చు. 2011 ప్రపంచకప్‌ను టీమిండియా కైవసం చేసుకోవడం యువరాజ్‌ కీలక  పాత్ర పోషించాడు.