IND vs ENG 3rd ODI: ఓల్డ్‌ట్రాఫోర్డ్‌లో పాండ్యా ఫైర్ - సిరీస్‌లో మూడోసారి ఇంగ్లండ్ ఆలౌట్!

IND vs ENG 3rd ODI 1st Innings Highlights: ఇండియాతో జరుగుతున్న మూడో వన్డేలో ఇంగ్లండ్ 259 పరుగులకు ఆలౌట్ అయింది.

వికెట్ తీసిన హార్దిక్ పాండ్యాను అభినందిస్తున్న జట్టు సభ్యులు (Image credits: BCCI)

ఈ సిరీస్‌లో టీమిండియా ఇంగ్లండ్‌ను వరుసగా మూడోసారి కూడా ఆలౌట్ చేసింది. ఓల్డ్ ట్రాఫోర్డ్‌లో జరుగుతున్న మూడో వన్డేలో మొదట బ్యాటింగ్ చేసిన ఇంగ్లండ్ 45.5 ఓవర్లలో 259 పరుగులకు ఆలౌట్ అయింది. ఇంగ్లండ్ బ్యాటర్లలో కెప్టెన్ జోస్ బట్లర్ (60: 80 బంతుల్లో, మూడు ఫోర్లు, రెండు సిక్సర్లు) టాప్ స్కోరర్‌గా నిలిచాడు. భారత బౌలర్లలో పాండ్యాకు నాలుగు వికెట్లు దక్కాయి.

టాస్ ఓడి మొదట బ్యాటింగ్ చేసిన ఇంగ్లండ్‌ను ఇన్నింగ్స్ ప్రారంభంలోనే సిరాజ్ దెబ్బకొట్టాడు. ఓపెనర్ జానీ బెయిర్‌స్టో (0: 3 బంతుల్లో), జో రూట్‌లను (0: 3 బంతుల్లో) సిరాజ్ ఒకే ఓవర్లో డకౌట్‌ చేసి పెవిలియన్‌కు పంపాడు. అయితే జేసన్ రాయ్ (41: 31 బంతుల్లో, ఏడు ఫోర్లు), బెన్ స్టోక్స్ (27: 29 బంతుల్లో, నాలుగు ఫోర్లు) ఇంగ్లండ్ ఇన్నింగ్స్‌ను కుదుటపరిచారు. ముఖ్యంగా జేసన్ రాయ్ భారత బౌలర్లపై భారీ షాట్లతో విరుచుకుపడ్డాడు. మూడో వికెట్‌కు 54 పరుగులు జోడించిన అనంతరం హార్దిక్ పాండ్యా... జేసన్ రాయ్, బెన్ స్టోక్స్‌లను అవుట్ చేశాడు. దీంతో ఇంగ్లండ్ 74 పరుగులకే నాలుగు వికెట్లు కోల్పోయింది.

ఆ తర్వాత కెప్టెన్ జోస్ బట్లర్ (60: 80 బంతుల్లో, మూడు ఫోర్లు, రెండు సిక్సర్లు), మొయిన్ అలీ (34: 44 బంతుల్లో, రెండు ఫోర్లు, రెండు సిక్సర్లు) ఇన్నింగ్స్‌ను కుదుటపరిచారు. వీరిద్దరూ ఐదో వికెట్‌కు 75 పరుగులు చేశారు. త్వరగా వికెట్లు పడటంతో తమ సహజ శైలికి భిన్నంగా వీరిద్దరూ కొంచెం ఓపికగా ఆడారు. అయితే కీలక సమయంలో రవీంద్ర జడేజా మొయిన్ అలీని అవుట్ చేసి వీరి భాగస్వామ్యాన్ని విడదీశాడు.

అనంతరం జోస్ బట్లర్, లివింగ్‌స్టోన్ (27: 31 బంతుల్లో, రెండు ఫోర్లు, రెండు సిక్సర్లు) ఆరో వికెట్‌కు 49 పరుగులు జోడించారు. ఈ దశలో హార్దిక్ పాండ్యా తిరిగి ట్రాక్‌లోకి వచ్చాడు. క్రీజులో నిలదొక్కుకున్న లియామ్ లివింగ్‌స్టోన్, జోస్ బట్లర్‌లను ఒకే ఓవర్లో అవుట్ చేసి ఇంగ్లండ్‌కు పెద్ద షాకిచ్చాడు.

కానీ ఇంగ్లండ్ టెయిలెండర్లు కూడా భారత బౌలర్లను సమర్థ్యంగా ఎదుర్కొన్నారు. డేవిడ్ విల్లీ (18: 15 బంతుల్లో, ఒక ఫోర్, ఒక సిక్సర్), క్రెయిగ్ ఓవర్టన్‌లు (32: 33 బంతుల్లో, ఒక ఫోర్, ఒక సిక్సర్) ఎనిమిదో వికెట్‌కు 48 పరుగులు జోడించారు. అనంతరం చివరి వరుస బ్యాట్స్‌మెన్ సంగతి చాహల్ చూసుకున్నాడు. 12 పరుగుల వ్యవధిలో ముగ్గురినీ అవుట్ చేసి ఇంగ్లండ్ ఇన్నింగ్స్‌కు తెరదించాడు. భారత బౌలర్లలో హార్దిక్ పాండ్యా నాలుగు వికెట్లు, యుజ్వేంద్ర చాహల్ మూడు వికెట్లు తీసుకున్నారు. సిరాజ్‌కు రెండు, రవీంద్ర జడేజాకు ఒక వికెట్ దక్కింది.