Asia Cup, IND Vs PAK: కొలంబోలో రెయిన్ ఎఫెక్ట్ - ఫ్యాన్స్‌కు గుడ్ న్యూస్ చెప్పిన ఆసియా క్రికెట్ కౌన్సిల్

Asia Cup, IND Vs PAK: వన్డేలలో నాలుగేండ్ల తర్వాత  మ్యాచ్ ఆడిన భారత్ - పాకిస్తాన్ మ్యాచ్ చూడాలని  దాయాది దేశాల అభిమానులతో పాటు ప్రపంచవ్యాప్తంగా  క్రికెట్ ఫ్యాన్స్ అమితాసక్తితో ఎదురుచూశారు. ఆసియా కప్ - 2023లో భాగంగా ఈ నెల 2న  భారత్ - పాక్ పోరు జరిగినా వర్షం కారణంగా ఆ మ్యాచ్ అర్థాంతరంగా   రద్దైంది. అయితే  గ్రూప్ స్టేజ్‌లో పోయినా  చిరకాల ప్రత్యర్థుల మధ్య మరో పోరుకు రెండు రోజుల్లో తెరలేవనుంది.  ఈ మ్యాచ్ ‌కూ వర్షం అంతరాయం కలిగించే అవకాశముందని  వాతావరణ శాఖ హెచ్చరించిన నేపథ్యంలో ఆసియా క్రికెట్ కౌన్సిల్ (ఏసీసీ) కీలక నిర్ణయం తీసుకుంది.  ఈనెల 10‌న భారత్ - పాక్ మధ్య జరుగనున్న మ్యాచ్ వర్షం కారణంగా రద్దైతే దానికి రిజర్వ్ డే ఉందని  ప్రకటించింది. 

ఆసియా కప్ - 2023లో భాగంగా ఇటీవలే మొదలైన సూపర్ - 4 తొలి  పోరు బంగ్లాదేశ్ - పాకిస్తాన్‌ల  మధ్య లాహోర్‌లో జరిగింది. ఈ మ్యాచ్ తర్వాత  టోర్నీ పూర్తిగా శ్రీలంకకు షిఫ్ట్ అయిన విషయం తెలిసిందే. సూపర్ - 4తో పాటు  ఫైనల్ మ్యాచ్‌ కూడా కొలంబోలోని ప్రేమదాస స్టేడియంలో జరుగనున్నాయి. అయితే  ఇప్పటికే కొలంబోలో గడిచిన వారం రోజులుగా వర్షం పడని రోజులేదు. వచ్చే  పదిరోజులు కూడా అక్కడ వర్షాలు కురిసే అవకాశాలు 60 శాతమున్నాయి. భారత్ - పాక్ మ్యాచ్ జరగాల్సి ఉన్న ఆదివారం కూడా కొలంబోలో వర్షం పడే అవకాశాలు 75 శాతం ఉన్నాయి.  దీంతో ఏసీసీ మేల్కొంది. 

Reserve days in Asia Cup 2023. [Espn Cricinfo]

- India vs Pakistan in Super 4.
- Final. pic.twitter.com/aAy1QElUxA

— Johns. (@CricCrazyJohns) September 8, 2023

దాయాదుల పోరుకు ఉన్న క్రేజ్ దృష్ట్యా ఈ మ్యాచ్‌కు రిజర్వ్ డే‌ను ఏర్పాటు చేసింది.  అయితే  సూపర్ - 4లో ఈ అవకాశం ఉన్నది ఈ  ఒక్క మ్యాచ్‌కు మాత్రమే. మిగిలిన జట్లు, మ్యాచ్‌లకు ఆ ఛాన్స్ లేదు.  భారత్ - పాక్ మధ్య ఈనెల 2న  మ్యాచ్‌లో భారత్ తొలుత బ్యాటింగ్ చేసి  266 పరుగులకే ఆలౌట్ అయింది. అయితే వర్షం కారణంగా పాకిస్తాన్ బ్యాటింగ్‌కే రాలేదు.  దీంతో నిర్వాహకులు మ్యాచ్‌ను అర్థాంతరంగా నిలిపేశారు.   భారత్ - నేపాల్ మ్యాచ్‌కూ వర్షం అంతరాయం కలిగించడంతో  ఓవర్లను కుదించారు.  దీంతో ఏసీసీ తీరుపై   సర్వత్రా విమర్శలు వ్యక్తమయ్యాయి. ఈ నేపథ్యంలో ఏసీసీ.. సూపర్ - 4లో భారత్ - పాక్ మ్యాచ్‌కు రిజర్వ్ డే ను ప్రకటించింది.

Bright sunny day at Colombo.

- Great news for Cricket fans...!!!! pic.twitter.com/FX1aqPQMTQ

— Johns. (@CricCrazyJohns) September 8, 2023

రిజర్వ్ డే ఉన్న నేపథ్యంలో ఒకవేళ  మ్యాచ్ వర్షం వల్ల ఆగిపోతే అక్కడ్నుంచే తిరిగి ఆట  ప్రారంభం అవుతుంది.   అభిమానులు తర్వాతి రోజు కూడా ముందుగా కొనుగోలు చేసిన టికెట్లతోనే మరుసటి రోజు మ్యాచ్‌ను తిలకించొచ్చు.