విదుర నీతి: మీలో ఈ లక్షణాలుంటే నేరుగా నరకానికే!

కొన్ని పనులు చెయ్యడం నేరుగా మరణాన్ని కోరి తెచ్చుకున్నట్టే అని మహాభారతంలోని విదుర నీతి చెబుతోంది. అవేమిటో చూడండి.

Representational Image/Pixabay

మన ప్రమేయం పెద్దగా లేకుండానే జీవన శైలీ క్రమంగా మార్పు చెందుతూ వస్తోంది. ఈ మార్పులు మన జీవితం మీద నేరుగా ప్రభావం చూపుతున్నాయని శాస్త్రాలు చెబుతున్నాయి. కొన్ని పనులు చెయ్యడం నేరుగా మరణాన్ని కోరి తెచ్చుకున్నట్టే అని మహాభారతంలోని విదుర నీతి చెబుతోంది. అవేంటో చూడండి. 

⦿ తనని తాను గొప్పవాడిగా ఊహించుకుంటూ ఇతరులను తక్కువగా చూసేవాళ్లు చావుకు దగ్గరగా ఉంటారట. ఎందుకంటే వీళ్లకు జీవితంలో విలువైనది ఏదీ ఉండదు.

⦿ అతిగా మాట్లాడేవాళ్లు కూడా అనేక సమస్యలకు కారణమవుతారు. ఇలాంటి వ్యక్తులు ఇతరుల గురించి చెడుగా ప్రచారం చేస్తారు. వీరిని కూడా మృత్యువు వెంటాడుతుంది. అతిగా మాట్లాడడం నరకానికి దగ్గరి దారి.

⦿ తన కోపమే తన శత్రువు. ఇది మానవుని అతిపెద్ద దుర్గుణాల్లో ఒకటి. ఎలాంటి కారణం లేకుండా ఇతరులపై ఆగ్రహం వ్యక్తం చేసేవాళ్లు నేరుగా నరకానికే పోతారట.

⦿ ఇతరులకు సేవ చేయనివారు, సహాయపడనివారు కూడా నేరుగా నరకానికి పోతారట. ఎదుటివాళ్లను గౌరవించని వ్యక్తి మానవ జీవితానికి పనికిరాడట.

⦿ విదురుడు చెప్పిన దాని ప్రకారం స్నేహితులను, కుటుంబాన్ని మోసం చేయడం చాలా పెద్ద తప్పు. ఇలాంటి వ్యక్తులకు నరక ద్వారాలు బార్లా తెరచి ఉంటాయట. ముఖ్యంగా స్నేహితులతో నిజాయితీగా ఉండాలి.

⦿ మనిషి దుర్గుణాల్లో అసూయ, స్వార్థం కూడా ఉన్నాయి. ఇలాంటి వాళ్లు ఎప్పుడూ తన స్వార్థం కోసమే ఆలోచిస్తారు. కాబట్టి నరకమే వీరికి ఆహ్వానం పలుకుతుంది. ఈ లక్షణాలను వదిలించుకుంటే జీవితంలో విజయం సాధించడమే కాదు, ఆర్థికంగా, మానసికంగా బలంగా ఉంటారు.

⦿ జీవితంలో మార్పు కోరుకుంటే దాని కోసం ఏదైనా ఆలోచన చెయ్యాలి. అది ఆచరణలో ఉంచాలి. సరైన సమయంలో నిర్ణయం తీసుకోవాలి. మంచి జరగడం కోసం చెడు సమయాల్లో నిర్ణయాలు తీసుకోవద్దు.

⦿ జీవితమంటే మంచి, చెడులు, కష్టసుఖాల కలయిక. కాబట్టి ఎలాంటి వాటినైనా ఎదుర్కోడానికి సిద్ధంగా ఉండాలి. చెడు గురించి విచారం వద్దు, అది ఎల్లకాలం ఉండదు.

⦿ డబ్బు శాశ్వతం కాదని గుర్తు పెట్టుకోవాలి. ఇది వస్తూ ఉంటుంది, పోతూ ఉంటుంది. ఆర్థికంగా స్థిరంగా ఉండాలనే లక్ష్యం కేవలం డబ్బుతో మాత్రమే సాధ్యం కాదు. అందుకు తగిన ఆలోచనా విధానం, ఆచరణ జీవన విధానం ఉండాలి.

⦿ ఎప్పుడూ కొత్త విషయాలను నేర్చుకోడానికి ప్రయత్నిస్తుండాలి. నేర్చుకునే వాటితో తృప్తి చెందితే అభివృద్ధి అక్కడితో ఆగిపోతుంది.

⦿ ఎక్కడైతే సౌకర్యంగా ఉండడం మొదలవుతుందో ఇక అక్కడ ఉండడం వల్ల నేర్చుకోవడం ఆగిపోతుందని  తెలుసుకోవాలి. జీవితంలో మార్పు సహజం. దానికి సర్వదా సన్నధ్దంగా ఉండాలి.

⦿ భౌతికంగా, ఆర్థికంగా, మానసికంగా మీరు మీ అదుపులోనే ఉండేట్టు జాగ్రత్త పడాలి. అందువల్ల మీ ప్రయాణం మీ అదుపాజ్ఞలలో సాగుతుంది. ప్రతి మలుపు మీ ఎరుకలో ఉంటుంది.

⦿ మీరు మీతో నిజాయితీగా ఉన్నారో లేదో ప్రశ్నించుకోవాలి. ఇతరులకు చెప్పే ముందు ఆత్మ పరిశీలన ద్వారా మనల్ని మనం అంచనా వేసుకోవాలి. అత్మ ప్రబోధానికి మించిన జ్ఞాన బోధ లేదు.

⦿ కాస్త ఒత్తిడి మంచి జీవితానికి దారి ఏర్పాటు చేసుకునేందుకు అవసరం. కాబట్టి కొన్ని విషయాల్లో ఒత్తిడి విజయానికి దోహదం చేస్తుంది. విజయం కావాలనుకుంటే కాస్త ఒత్తిడిని భరించే శక్తి కలిగి ఉండడం మంచిదే.