Spirituality : అప్పులు,కష్టాలు, ఆర్థిక నష్టాలు, అనారోగ్యం తొలగిపోవాలంటే ఈ తిథుల్లో ఇలా చేయండి

వారంలో ఏడు రోజులూ ఒక్కో రోజు ఒక్కో దేవుడికి కేటాయించి పూజలు చేస్తుంటారు. మరి అలాగే 16 తిథులకు కూడా ప్రత్యేకంగా దేవుళ్లున్నారు తెలుసా. ఏ తిథి రోజు ఏ దేవుడిని పూజించాలో ఇక్కడ తెలుసుకోండి.

Spirituality

తేదీలు, రోజుల కన్నా తిథుల ఆధారంగానే పండుగలు, పెళ్లిళ్లు, పుట్టినరోజులు, ఇతర ముహూర్తాలు నిర్ణయించేవారు. ఇప్పుడు తిథులపై పెద్దగా అవగాహన లేక డేట్స్ హడావుడి మొదలైంది. ఇప్పటికీ దేవతల పుట్టిన రోజులన్నీ జన్మతిథిని బట్టి నిర్ణయిస్తారు. అంటే ప్రతి తిథికి ఓ దేవుడు ప్రాతినిథ్యం వహిస్తాడన్నమాట. మరి ఏ తిథి రోజు ఏ దేవుడిని పూజించాలి, ఎలాంటి ఫలితాలు ఉంటాయో చూద్దాం...

మొత్తం తిథులు 16
పాడ్యమి, విదియ, తదియ, చవితి, పంచమి,షష్టి, సప్తమి, అష్టమి, నవమి, దశమి, ఏకాదశి, ద్వాదశి, త్రయోదశి, చతుర్దశి, పౌర్ణమి, అమావాస్య . అమావాస్య నుంచి పౌర్ణమి వరకు 15 రోజులను శుక్ల పక్షం అని, పౌర్ణమి నుంచి అమావాస్య వరకు  15 రోజులను కృష్ణపక్షం అని పిలుస్తారు.

ఏ తిథిరోజు ఏ దేవుడిని పూజించాలంటే

• పాడ్యమి రోజు అగ్ని దేవుడిని పూజించడం వల్ల అపరిమితమైన సంపద కలుగుతుంది.
• విదియ రోజు బ్రహ్మదేవుడిని పూజిస్తే అన్ని రకాల విద్యల్లో ముందుంటారు
• తదియ రోజు గౌరీదేవిని ఆరాధిస్తారు. గౌరీ కళ్యాణం తదియనాడు జరిగినందున ఈ తిథి అంటే అమ్మవారికి ఇష్టం
• చవితి రోజు వినాయకుడిని పూజిస్తే తలపెట్టిన పనుల్లో విఘ్నాలు తొలగి విజయం సాధిస్తారు
• పంచమి రోజు నాగదేవతను ఆరాధిస్తే..సర్పదోషాలు తొలగిపోతాయి
• షష్టి రోజు కార్తికేయుడిని పూజిస్తే కీర్తి ప్రతిష్టలు పొందుతారు
• సప్తమి సూర్యభగవానుడికి ఇష్టమైన తిథి. ఈ రోజు సూర్యారాధన చేస్తే అనారోగ్య సమస్యలు తొలగిపోతాయి
• అష్టమి దుర్గాదేవి అష్టమాతృకలు ఆవిర్భవించిన తిథి. అష్టమాతృకలను, దుర్గాదేవిని పూజిస్తే శుభం కలుగుతుంది.
• నవమి రోజు దుర్గామాతను పూజిస్తే చెడును నశింపచేసి విజయాన్నిస్తుంది
• దశమి రోజు దిక్కుల సృష్టి జరిగింది. ఇంద్రాదిదేవతలు ఈ దిక్కులకు పాలకులు. అష్టదిక్పాలకులను పూజిస్తే పాపాలు తొలగిపోతాయి
• ఏకాదశి రోజు కుబేరుడిని పూజిస్తే సిరిసంపదలు కలుగుతాయి. ఎందుకంటే కుబేరుడు సంపదకు మూలకారకుడు
• ద్వాదశి రోజు విష్ణువుకు ఇష్టమైన తిథి. ఈ తిథిరోజే విష్ణుమూర్తి, వామన రూపంలో జన్మించాడు. ద్వాదశినాడు ఆవునెయ్యితో వ్రతం చేస్తే పుణ్యం లభిస్తుంది.
• త్రయోదశి యమధర్మరాజు పుట్టిన తిథి.ఈ రోజు ఇష్టదైవాన్ని ప్రార్థిస్తే మరణబాధలు తప్పిపోతాయి.
• చతుర్దశి- రుద్రుని తిథి. ఈ రోజు రుద్రాభిషేకం చేస్తే శివానుగ్రహం లభిస్తుంది
• పౌర్ణమి కి చంద్రుడు అధిపతి. ఈ రోజు పగలంతా ఉపవాసం ఉండి రాత్రికి చంద్రుడిని పూజిస్తే ధనధాన్యాలు, ఆయురారోగ్యాలు, భోగభాగ్యాలు సిద్ధిస్తాయి.
• అమావాస్య పితృదేవతలకు ఇష్టమైన తిథి. దర్భలు, నువ్వులు, నీళ్ళతో పితృదేవతలకు తర్ణణమిస్తే వారు సంతోషించి సంతానసౌఖ్యం అనుగ్రహిస్తారు.

నోట‌్: కొన్ని పుస్తకాలు, పండితుల సూచనల మేరకు రాసిన వివరాలివి...వీటిని ఎంతవరకూ పరిగణలోకి తీసుకోవాలన్నది పూర్తిగా మీ వ్యక్తిగతం